Sam Joseche Devosanv

 

SAM JOSÉCHEA MANNAK tÊrs

(Mhunnuk Ruzai Saibinnichea Contar)

( Duljens 100 dis)

 

 

KHURSAR CONTACHEA:

V. Bokta José, ixtta Dhonia Jesuchea Callzachea,

R. Amche pasun vinoti kôr.

MOTTEAM  FODDEANCHER:

( Amchea Bapache suater)

V. Bokta José, Bhagivontam modhem, vinchun kaddlolo Bhagivont,

R. Zauncheak Poti Ankvar Moriêcho ani sambhallar Bapui Dhonia Jesu Christacho.

DAKTTEAM  FODDEANCHER:

(Noman Moriênchea suater)

V. Bhagivonta José, kednanch tum amkam sanddunaka,

R. Pau amkam, amchea mornachea, akantachea vellar.

MOTTEAM  FODDEANCHER:

(Onod Bapache suater)

V. Bokta José, ixtta Dhonia Jesuchea Callzachea,

R. Amche pasun vinoti kôr.

 

Panch khonn somptoch (xevttim 1 pautt mhunn)

 

Povitra Callza Jesuchea, Tum amche churchure kôr.

Khotavinn Callza Moriêchea, amche pasun vinot kôr.

 

Ladain bhagivont joséchi

( Disak 300 dis duljens )

Dhonia amchi kakut kôr, Dhonia amchi kakut kôr

Christa amchi kakut kôr, Christa amchi kakut kôr

Dhonia amchi kakut kôr, Dhonia amchi kakut kôr

Christa amkam aik, Christa doien amkam aik

Deva Sorginchea Bapa, amchi kakut kôr

Deva Putra Sonvsarachea Sorvonddara, amchi kakut kôr

Deva Spirita Santa, amchi kakut kôr

Santism Trinidadi, Êkleach Deva, amchi kakut kôr

Bhagivonti Moriê, mche pasun vinoti kôr

Bhagivonta José, amche pasun vinoti kôr

Davidachea Navadik Putra, amche pasun vinoti kôr

Patriarkanchea Porzolla, amche pasun vinoti kôr

Devache Maiêchea Poti, amche pasun vinoti kôr

Ankvar Moriêchea Nirmoll Rakhnnara, amche pasun vinoti kôr

Devachea Putrachea Posnnara, amche pasun vinoti kôr

Christachea Zagrut Sambhallnara, amche pasun vinoti kôr

Povitr Familichea Mustoka, amche pasun vinoti kôr

José, Bhov Nitivonta, amche pasun vinoti kôr

José, Bhov Nikllonka, amche pasun vinoti kôr

José, Bhov Xannea, amche pasun vinoti kôr

José, Bhov Ghottaechea, amche pasun vinoti kôr

José, Vhoddilank Sodanch Aikotelea, amche pasun vinoti kôr

José, Bhov Visvaxea, amche pasun vinoti kôr

Sosnnikaechea Arxea, amche pasun vinoti kôr

Durbollkaecho Mog Kortelea, amche pasun vinoti kôr

Vavraddeanche Dekhi, amche pasun vinoti kôr

Gharachea Jivitachea Surungara, amche pasun vinoti kôr

Ankvarinchea Rakhnnea, amche pasun vinoti kôr

Ghorabianchea Khambea, amche pasun vinoti kôr

Nirbhageanchea Buzvonddara, amche pasun vinoti kôr

Piddestanchea Bhorvanxea, amche pasun vinoti kôr

Mornank Pauleleanchea Askarea, amche pasun vinoti kôr

Deucharanchea Kamperea, amche pasun vinoti kôr

Bhagivont Igorjêchea Sambhallnara, amche pasun vinoti kôr

 

DEVACHÊ XELLIÊ sonvsarachim patkam kaddtele, amkam bhogos Saiba

DEVACHÊ XELLIÊ sonvsarachim patkam kaddtele, doien amkam aik Saiba

DEVACHÊ XELLIÊ sonvsarachim patkam kaddtele, amchi kakut kôr

 

V. Devan taka kelo, Aplea garacho Dhoni,

R. Ani Kunvor sogllea Aplea vitacho.

Prarthum–ia

Êh Deva, sangun sarunozo tosole zanvaen, Tuka puttoulem vinchun kaddcheak Bhagivonta Josék, zavuncheak to Poti Tujê Bhov Bhagivonti Maêcho; porathun magtam amim Tujê lagim, nirmi mhonn, to zaka amim mann ditam sonvsarant amcho sambhallnar mhonn to zavuncheak amcho Askari Sorga Rajant. Oxem Zanv.

MAGNNEM SAM JOSECHEA MANAK

ÊH BHAGIVONTA JOSÉ, amim tuka sodtanv amchea akantachea vellar ani mozot ghalun tujê Bhou Bhagivonti Potinichi vhodda bhorvanxean tujoi alaxiro amim magtav. He-tea mogachea ekvottan, tunvem sangat kel’loi Khot Naslele Ankvari Moriêk Devache Maiêk ani bapponnachea moga pasun, zo tunvem kel’loi Ballka Jesucho, amim tuka prat’tanv ghal mhonn tujêa bholeponnachi dixtt amcher, vortoutanv mhonn daiz, jem zhoddlam Dhonia Jesu Christan Aplea Rogtan ani amkam tum pav, diun tujê podvecho alaxiro amcheam gorzam thaim.

Éh bhou zanntikaechea raknnea Povitr Familichea, sambhall kôr Dhonia Jesun vinchun kaddlele porjecho, pois kadd mache sorxili, êh bhou mogachea Bapa, soglli pest fottinchi ani ogunnachi; êh amchea bhou bollvonta Askarea, pav tum amkam Sorgar than, zhuz korunk amim sonvsarantleam dusmanam lagim ani jê porim Magam Tempar vattailoi mornnantlo Ballka Jesuk tech porim atam nivar Santa Mat Igorjek dusmanachea vignantli ani soglleam noxttantli ani sodankal zoton amchi êk-êkleachi kôr, tujêa alaxirean hea vorvim gheun amim tuji dekh ani tujêa diran jieuncheak xantiponnim, morcheak sovostaen ani mellun gheuncheak sasnnachem sukh Sorginchem. OXEM ZANV.

Consagrasanvacho ACt

Bhagivont Josék

Onodvonta Bhagivonta José, sogleam Santam modhem tuka vodik mann diunk favo, tuzo vodik mog korunk favo, tuka vodik ulo marunk favo tujêam sumpurn segunam pasun, tujêa onodachea vhoddpona pasun ani tujê vinotiche podve pasun, hanv anink êk pautt tujêam paiam laguim sorpott poddtam ani mhaka sogloch tuka somorpitam atam ani sodam sorvotam. Nomoskaranche Trinidadi ujir, Jesu tujêa Posilelea-Putra ujir, ani Moriê tujê Khot Naslele Potini ani mhojê Maiê ujir hanv tuka somorpitam mhoji mot, mhojêm calliz, mhojim chintnam, mhojê sentiment, mhojê visove, mhojêo korneo, sorv jem asa mhojê thaim ani mhojêm soglem jivit. Hanv tuka bettoitam mhoji famil, mhozo avoi-bapui, mhojê ixtt ani mhaka borem kornar, jive ani melele, bhagivont ani patki, duble ani dukhest, vaittakar ani mornahce tonir aslele! Hanv khori bas ditam, mhojêa mogalla Bapa, Tuka kernanch visronam zauncheak, tuka mann diuncheak soglea mhojêa jivitant, ani mhaka tankta te baxen vavurcheak tujêm Devosanv kollit korunk. Hanv tuka pratitam, mhojea poddvedar Rakhnarak tujêam visvansancheam chakram modhem mhaka gheuncheak, ani mhaka pauncheak soglea jivtitant. Mhaka sandunaka, Saiba, mhojêa mornachea vellar, punn melloun ghê iek dis tujê sangata hanv razvott koriso Sorginchea Onodant ani Sukhant. Oxem Zanv.

 

Saiba Sam José

1. Saiba Sam José, tum amcho adhar,

    Za tôr tum amcho nimanno suskar

    Vaittam vignam tum amchim nivar

    Atam ani mornnachea vellar.

 

2. Saiba Sam José, tum amcho onod,

    Deva lagim ghal tuji vhôdd mozôt

    Tujêa tea gopant amkam dovor

    Atam ani mornnacho vogôt.

 

3. Saiba Sam José, Jesuchea Bapa,

    Sorgar, sonvsarant tujêm raj cholta,

    Kedinch tum amkam sanddumnaka,

    Odik-korun mornnachea vellar.

 

Bhagivont Joséchea

Devosanvacho Manual

Attapun antun Bhagivont Joséchem jivit

 

Bokta José, Bhagivontam modhem, vinchun kaddlolo Bhagivont;

zauncheak poti Ankvar Moriêcho ani sambhallnar bapui Dhonia Jesu Christacho.

 

 

Magnnem Bhagivont Josécho Adhar Magchem

Bhagivonta José tum vortoutai poti Ankvari Moriêcho, Jichea hatant Devan dileam sogllim dennim, ani bapui Mogall Jesucho zacho tuvem sambhall keloi hea sonvsarant astana, To tujêa rinnant kednanch rabchona ani asa toiar diunk sogllem jêm tum tachea laguim magxi. Tor he tujê vhoddle podver ani vhoddponar patien, hanv tuzo êk kalto ani kirkol devot magtam tujêa laguim mellun ghê mhonn mhaka ho upkar zachi mhaka chodd goroz asa… (Mag koslo to upkar).

 

1 Amchea Bapa, 1 Noman Moriê ani 1 Onod Bapak…

(Composto por autor e aprovado pelo superior)

 

Autorachim Don Utram

Bhagivont Joséchem Devosanv vortouta ekdom faideachem amkam somest bhavarteank kiteak tachea vhoddponnanchi podvi Sorgar Deva mukhar vortouta vorti heram sogleam Bhagivontam poros, zoxem tachem Bhagivontponn vortouta vortem “Bhagivontam modhem vinchun kadlolo Bhagivont”. Tachem Devosanv nhoich faideachem, bogor gorgechem amchea Salvasavank kiteak zannanr Padri Igorz Matheche sangtat ki Bhagivont Joséchem Devosanv vortouta mhonn êk sinal ou kun predestinasavchem, munghe, Salvasanvchem ani ache exemplo disti poddon ieta sabar pustokancher ki Bhagivont Joséchea modotin zaite tache devot salvar zalele. Ani hem oxem zaunk zai aslem, kiteak Dhoni Jesu and Saibinn Mai tachea rinnant asat jêdna tim jielint hea sonvsarant, tea pasot, Bhagivont Josén maglolo upkar Tancheannim nam mhunnonk zainam.

 

I

Devot Bhagivont Joséche anvdetat zannam zanvcheak histor tachea jivitachi ji Povitr Pustok  sangona, fokot mhunnta tachea jivitachi kobor uloun “Vir Justus” munghe, sogleam segunanim borlolo munis, oxem sangon ditat zannanr munis Igorz Matheche ort team donuim utrancho.

 

Zaiteam Bhagivontanim illem illem tachem jivit boroun dovorlam, tea bair Sister Emerich, madr Agostinian hika Devan ugttem kelam todem jivit Bhagivontachem ani Ave-Eva pustokacher asa kobor tachea mornanchi, hem soglem ektaim korun tachea jivitachi êk lannunch histor korun amim hea pustokar gatlea, ti vazun tache devot khuxi zatelet mhunn amkam katri asa.

 

Amchea Goeant zaitem Devosanv cholta Bhagivont Joséchem, odik korun to Marsacho muinno zo Igorz Mathen bhetoila Bhagivont Josék, to amcho lok vhodda Devosavan ani khotkhotean kortat zanv Igorzannim zanv vaddeanim ektaim zaun, ani hea kamank vampurtat pustok “Sam Josécho Muinno” mhuntlelem jêm Igorz Mathecheam vhoddilanchea ukumen chaplolem tea José Manuel Pinto annem 1901 vorsa ani tachem tisrem edisanv chaplelem B.X. Furtado annem 1927, Bombay, tem sarkench kobar zalem, ani anink tim pustokam mellona, tea pasot, thodem zait veta amchea Goeam hem Bhagivont Joséchem Devosanv.

 

Zaitea lokan amchea laguim upkar magla toslim pustokam chapunk. Tea pasot, Patriark Saibachea ukumen chaplam hem pustok “Bhagivont Joséchea Devosanvacho Manual” kaddun nial, magnnim, exempl zor disak “Bhagivont Josécho Muinno” hea pustoka velim, punn sogloch sarko kelolo, Idulzensam thuim asa tim bodorleam, thim sarkim keleam ani her magnnim, hymns, etc. dusream pustokam vele.

 

Amim somzotanv ki devot Bhagivont Joséche bhou dadoxi zatelet mhonn polloun hem pustok ani vhodda khotkhotean ani urben chalu kortelet mhonn Bhagivont Joséchem Devosanv.

 

† Pe. Estevam Rodrigues

Autor

Pe. Estevam Rodrigues

Pe. Estevam Francisco Rodrigues, nasceu em Santo Estevam 29-11-1902, filho de Domaciano Rodrigues e de Estrelina Ferrão, ordenade de Prima Tousura e ordens Menores nos dias 1, 2 e 3 de Março de 1932 no Seminario de Rachol; de Subdiacono em 2-10-1932, no Seminario de Rachol; de Diacono em 17-12-1932 na Sé Patriarcal; e de Presbitero em 8-10-1933, na Sé Patriarcal.

 

Nomeado prefeito das aulas no Seminario de Rachol, pela portaria no.65, de 9-4-1932. Vigario da Igreja de Pondá, portaria no.97 de 27-7-1942; transferido para Igreja de Azossim pela portaria no.46 de 20-4-1943. Dispensado ao seu pedido pela portaria de no.60 de 9-7-1945.

 

II

 

Bhagivont Joséchem Jivit

 

Povitr Puran bhou thodi khobor korta Bhagivont Joséchea jivitachi, fokot taka vankatta donuch utrannim mhunnon: “Vir Justus”, munghe, niropradi munis ou bhagivont munis. Pun zaitea bhagivont zannar munxeannim illi, illi khobor boroun dovorlea tachea jivitachi ti kaddun amim inga ditanv. José vortoulo amchea baxen Asiacho, ani to zolmolo Belea Xharant, 4000 vorsam Devan sonvsar rochlea uprant. Oxem mhonn sangta bhou zannar Natalis Alexander. Josécho bapui vortoulo Jacob, khaxea bhau Santan Saibinnincho zachi dhu vortouli Saibinn Mai. Mhunntoch Bhagivont José ani Saibinn Mai vortoulint poilea grauche bhapulbau (primos).

Sister Emerich, madr Agustinian, pratek Dev ollok (revelação particular divina) tika zaun, ti sangta hi khobor Joséchi: José vortoulo David Patxachea sosticho, zolmolo Beleant, tacho pai vortoulo Jacob zaka aslet so ( 6 ) putr tantulo José vortoulo tisro putr. To vortoulo bhou ginianancho, saddo, jivea bhavartacho ani ekdom boktivont.

 

Tachea thaim aslem soglleam segunnachem ani bhagivontponnanchem mull jem vortouta khalltikai, tea pasot, to vhoddponnam ani mann sodi naslo, zoxe sodi tache bhau; to vinchun kadta êk udiog bhou lanvikaecho zo vortoulo innanninponn, hem tache familik mandonaslem. Lannponninch than to magnneank ondoulolo deki vorvim Ensenios Matbhedichea (seitas de Ecsenios) je jietalet Beleant. Othra ( 18 ) vorsancho astana to aplo ganv soddun ghelo rabonk Laberiah gavant zhuim innanponnanchi art xiklo, êka uxear innannim mistri khall. Tache bhau paulet tea gavant taka bejar korun tannem to udiog sodcheak kiteak tankam lanponn boktalem mhonn, punn Josén tankam kann dilo na ani to thir rablo aplea udiogant. Thuim than to ghelo rabonk Aprec gavant, Bhagivont Tomeachem xhar (Cidade de Sam Tomé) thuim to siclo ti art vhodde supurnaen. Soglo dis magnnim ani vaur korun to sari. Sodanch aplea khotkhotlelea magnneanim mago Deva laguim dad mhonn veginch sonvsaracho Sorvonddar, ani Devan kollit taka kelem, bodvea vorvim, ki tachem magnnem aikilem mhonn, punn Bhagivont somzolonam ort hea niropacho. Aprec gavant rablo dormacho mukiaprohit (Sumo Sacerdote) apoi porian Jeruzaleak.

 

Ankvar Mori asli Templant ani ti vadtali curpen ani piraen; chouda (14) vorsam zatoch, to Summ Sacerdot usko kori tika cazar korunk. Devan taka gomoilem ki cazar zaunk zai mhonn êk David Patxache sostichea dadlea laguim, tea pasot tannem vazun pustok Davidachea kutumbachea dadleanchem (geneologia) ekthaim kelet soglleam dadleank tea sostichea ani tankam sangllem ki tumchea moddlo êklo zaunk zai nouro Ankvar Moriêcho. Sogleannim, khuxallkaen, ti boddi hatant ghetli ani Summ Sacerdotichea sinala parmonnem ti altara xim mezar dovorli, zonn êklean boddiek aplem sinal korun.

III

Summ Sacerdot, ceremon kobar zalea uprant, ankantlo polloun ki konnanchich boddi fullonk nam mhonn, ani novean ghelo ustun pollounchea Davidachi pilgi (genealogia) ani taka gomlem ki anink êk dadlo asa mhonn Davidache sosticho ani rabta poisilea gavant ani tachem nanv José. Apoun taka adlo ani adleank sanglelea pori takai sanglem ani dile tache hatint full nasleli boddi ani ceremon kortoch ti rokdich fulli, ani hea baxen, José Ankvar Moriê laguim cazar zalo. Hem asa thodeach utranim jivit Bhagivont Joséchem tea Agustinian madrin sanglelem.

 

Bhagivont José vortoulo vhodd zolmant, zanv kuddin, zanv othmean. Kuddi vatten vortoulo David Patxachea sosticho zoxem voir sangllam, ani othmea vatten, to zalo Bhagivont avoichea potant astana bogsonn tachem mull patok, Jeremias Profeta ani Bhagivont João Batista baxen, oxem boktiponnim sothmandtat. He vorvim to veguinch vhaddon ani choddon ghelo curpen ani ginianan Bhagivont João Crisostomo sangta taka asli mhonn ollok Povitr Purana oilea soglleam misteranchi; Bhagivont Tomas sangta soglleam zannvaenchi; Bhagivont Dioniz soglea sastrachi (ciencias); Bhagivont Ambrosio soglleam artinchi ani Udentichea Itiasachi, ani Bism Rosa sangta sogllea Mecanicachi.

 

Bhagivont José vortoulo vhodd kutumbi udiogant. To vortoulo poti Devache Maiêcho, Sorgar ani sonvsarache Ranniêcho, posko Bap mogal Jesucho, tankam poslint ani sambhallint hea sonvsarant astana, apli umm ani gam varoun ani vhodd tras gheun. Tea pasun soglleam rochna von vhodd vortouta vhoddponn Bhagivont Joséchem, kaddun Saibinn Mai.

 

Tachem Moron:

Ave-Eva mhuntlolem pustok sangta khobor tachea mornanchi ti hi: Ecvontis vorsanche piraer pauttoch Christo amcho Dhoni ani tachea Batisma adim, vhodd Patriark José onodvont Ankvar Moriêcho Poti ontorlo  hea sonvsarak, ason taka unnim xim sotor vorsam. Jedna paulo na vell Christan apon Devacho Putr mhonn dakhouncho sonvsarak, Tannem Bhagivontak dovorlo jivo aplo Pai koso; jedna paulo to vell, taka vattailo aplea Paixavanchea dukim khotintlo zantun tannem vantto gheuncho pottolo aslo, ho upkar Christan aplo Bhou Bhagivont Maiêk kelo na, kiteak zaiteam rezanvantlem êk tem hem: Tedna Sorginchim daram bond aslint ani sitol zago tichea othmeank naslo.

 

Êka Anjean Bhagivont Josék colit kelem paulo mhonn vell tachea mornancho, tedna tannem maglem Deva laguim aplea Anj Guarda bair pathoi mhonn Bhagivont Minguelik ascheak agir aplea mornank ani Devan aikolem tachem magnnem; orxem puro aslem agirponn Christachem ani Ankvarichem. Coslea mogacho adeus to zauncho na? Soimbachea sentimentan coslim dukam varoilim na zait Ankvarin aplea itlea mogachea Poti pasun zo vortoulo itlo bhagivont ani itlea visvasan apli chakri keli mhonn! Thuim tinnem bhas dili asteli kitlich tor apnank Devachea Maiêchem vhoddponn unch kadit sambaitelim apurbai tachi Potin vortoulim mhonn.

 

Kitlim argham Bhagivont Josén dilim na zait sogllea aplea vhodponnancho cauz vortouli mhonn Ankvar apli Potin? Kitli buzvon Bhagivontan dili na zait tika, aplea partin asa mhonn ticho sambhall korcheak Devacho Putr? Coslea godsannincheam utranim Christan taka sugur kelo na zait prem aplea Bapachi chakri kelea tacho? Apleak posla ani sambhall kela to, odik korun Ankvarik sangat korun visvasan nirmolponn tichem sambhallem dekhun? Coxe baxen Christan toiar kelo na zait taka, ani dhir dilo na zait khuxalkaen tankcheak mornancho marog! Dubau na mhunnta êk devot ki Christan taka mhunntlem mhonn: Maka sonvsarant ollkolo tuzo putr koxo, ani he soirigotiche bandpas Sorgar chodtelet zhuim khalto zatolom tujêam magnneak, zoxe baxen sonvsarant khalto zalom Tujêam formonank (mandados), ani Bapaichea nanvank pratipal zatolo onod Sorgar.

 

I

 

Mornanchea vellar asa sonvoi putran bapai lagauim besanv magchi, tem Christan munis koxe maglem astelem, punn Bhagivont Josén tem taka dinastana, portem apnem tajêa laguim maglem astem ani Christ khalto zanv tem taka dilem astelem. Kitlo sugur to othmo vetolo Munsubek zhuim tacho Putr vortouta Munsudar! Soglle bhagivont lanvikae pasun dubaueit formanank, êkloch José dubau naslo kiteak tachem tem sugur kori toch Dev. Tachean mhunnoet aslem Davida porim: “Mornanchea hea kallokant hanv biecho nam vaitank kiteak Tum, Putr, Dhonia asai mhojêa sangata;” ou Bhagivont Simianv poros odik: Sodhoi Dhonia hea tujêa chakrak, cuddichea prizanvtlo ani vor taka soukasaek kiteak nhoinch mhojêam dolleanim deklo Sorvonddar, bogor ixop nam title pautti mhojêa vengent dorlo ani itlim vorsam taka hanvem poslo.

 

“Êh Bhagivonta José, polle, bhagivont aundetat moron Jesu thaim vochonk, zoxe baxen sangta Bhagivont Paulo ani Tum moron sodtai sangat Jesucho! Aka José partin zabab dita êk zannar: Certuch Bhagivont zanna zanv ki Dev apleak kortolo mhonn hea sonvsarantlo adinch Devache khuxer raji zalo.

 

Xekim Bhagivont Josécho othmo curpechea pakteanim udon Limbant ghelo. Jesu Magdalenank polloun aplea bavachem, Lazarachem moron rodhtat tem, aponuim rodlo, tea pasun, dubau na to rodlo mhonn polloun apli Mai rodhtat ti aplea Potichem moron. Dhonian tache dolle dample, Anjeank pathoile tachi cudd mornanchea ollinim gutlauncheak, besanv taka dilem ani tem basailem jê konn tachea mornanchea disa (20) vis tarker Junhache, tachea mornanchea manank Sacrifis bhetoit tankam, teach Dhonian hem sogllem sanglam Apostlank. Bhou Bhagivont Potin ani Dev-Putr neson dukachim angostram moddea patlean interrak ghelint, tea kallachea istili parmannem, niki pili tachi cudd Josefat kondant zhuim maguir niki pili cudd Ankvarichi. Ah kitlem bhagichem moron zantun Sacerdotin adhar dilo to vortoulo Sorvonddar! Ah, kitle bhou mannachi exequias (oficio dos defuntos) zantun vantto ghetlo Sorginchea Cumvranim!

Ah, bhou onodvonta ugddasa zantun vortoulet herder ani testamenter Jesu ani Maria! Oh bhagichea othmea! Coslea festanim tuka ghetlo nam zait Abranvchea, itlea Patriarkachea, Profetanchea ani vhodda munxeanchea gopant zankam kolloilolem Anjeanim Tum konn to. Cosli khobor tujêa laguim tanim vincharli na zait Sorvonddarachi zacho Bapui zaunk tuka favo zalem, ani lagim pautali sorvon munxeacullachi! Bhagivont José vortoulo vhod Sorgar ani borobor tachi podvi. Saibinn Maim Sorgar venchea adim to also soglleam rochna unch, fokot Jesu sokla.

V

Bhagivont Joséchi modoth Sorgar bhou podvechi, kosleim magnnem tachea devotachem to Jesuk dakoita ani taka boll korta tem aikunk. Zaite exempl hem amkam dakoita, tantulo êk hanv anga ditam:

 

EXEMPLO

Soron Maria de Jesus, ika êk vizanv zalem. Hea vizavant tika disti podlo Jesu, Saibinn Maim ani Bhagivont João Evangelista. Aili thuim Bhagivont Teresa, devot Bhagivont Joséchi.Tinnem dekle zaite deuchanrannim veddo ghatlolo tachea êka Conventache madrik, tika vaitt korunk. Bhagivont Teresin hat zoddun ani dimbi ghalun maglem Jesu laguim te madri deucharanchea talneantli nivar mhonn; Jesun aikilem nam. Ti sorpoth zomnir podun ani hat sodun kursa porim challu kelem aplem magnnem, tedna Bhagivont José disti podta ani Jesuk bol korta apli devot magta tem tika di mhonn ani tika hatak dorun uthoita, uprant ti polleta deuchar nanch zalet te, ani vizanv sompta. Maguir Bhagivont José, Bhagivont Teresik ugdhapem (revelação) korta ki apleachi modoth nhoim zalear ti madr vhodd vaittak sampodtoli asli mhonn. Hi asa podvechi modoth Bhagivont Joséchi Sorgar Rajeant. Teach pasot, zannar Bhagivont Igroz Matheche sangtat ki bhagivont Joséchem Devosanv vortouta êk sinal predestinasanvchem, tea pasot nhoinch tem amkam faideachem bogor gorjechem. Bhagivont José dita modoth soglleank jê asat tachea manta khall.

Tachi modoth vortouta itli lamb, rund ani unch ki to vortouta zalele porim tem zadd Nabucodonosor Patxan deklelem vaddon tem tachi tenkxi tenkloli Sorgak ani tache kandde ximpodlole sogllea sonvsarar, ani sonvsarantlim suknnim eun bostalint tanche kandeancher ani ghetalim tachi thondai. Tor amim raboia tachea manta khall ani ghenv-ia tachi Sorginchi thondai zanv tache devot ani korun sogllea callzachea khotkhotean, tachem Devosanv, odik korun, Marsachea muinneant zo Igroz Mathen bhettoila Bhagivont Josék.

 

Pia exercitia: Vide Enchiridion Indulgenciarum de 1952, pagina 229, No. 466 …

Marsachea muineant ou adkoll asa zalear dusrea khuincheai vorsachea muineant, bavarti jê agir asot Devosanvank Bhagivont José, Poti Ankvar Moriêcho, achea manak public keleleam magnneank, tancheannim zodieta him sokoilim dulgesnam:

1)      Sat vorsanchem dulgens khuincheai disak muineanchea.

2)      Plenar dulgens zor tor (10) dha dis punn, magnnim korit, patkanchem bogsonnem zodit, Communhanv gheit, ani Papa Saibachea tensavam pormannem maggot.

Jê konn Marsachea muineant kerit magnnim ou dusreo boktiponnancheo vostu korit zalear, Bhagivont José, Poti Ankvar Moriêcho achea manank, tancheannim zodieta him dulgensam:

    1)  Pautik (5) panch vorsanchem dulgens, khuincheai disak muineanchea.

    2) Plenar dulgens sodancheam condisanvannim, ako muinno magnnim kortoleank, punn khuim devbokti vostu public kortat, ani tankam connanchean khore adkollek lagon agir asonk zaina, tachean tem plenar dulgens zodieta.

(S.C. Indulgenc. 27 de Abril de 1865; S. Paenit.Apost.21 de Nov. de 1933).

 

CHOTRAI:

Dor disa Nial ani Magnnim korchea adhim, pajn 1 aslolim magnnim korun suru kôr ‘Curpa Magcho Act’ ani ‘Aitemonanchem Magnnem’.

 

VI

 Bhagivont Josécho MuinoM

 

Curpa Magcho Act

Iô Tum, Iô Deva Spirita Santa, rig callzant tujêam bhavarteanchea, ani pethoi tanchea sovem uzo tujêa mogacho.

 

V. Pathoi tujéa Spiritak, Zo rochit sogllem,

R. Ani ho sonvsar novo korit.

 

Prarthum-ia

Êh Deva, tum zannem xikoilaim callzank bhavarteanchea Spirita Santachea uzvadda vorvim, dhi amkam teach Deva Spirita vorvim somjonnim nittaechi mellcheak sodanch tachem vhodda mollachem dadosponn. Teach amchea Dhonia Jesu Christa vorvim. Oxem Zanv.

 

Aitemonanchem Magnnem

Hanv tujê laguim magtam, êh Bhagivonta José mellun ghê mhonn mhaka favo tem aitemon bore baxen pallcheak ho muinno. Tum zo itlea pautti Jesuk sambhalltaloi to burgo astana, mhakai sambhall ani rak hea muinneant zo tuka somurpila, ani odik khotkhotlolo zaunk vavurtolom, tujê segun adartolom ani tuji modoth magtolom. Dhi, Bhagivonta mhaka tuzo podvedar alaxiro, nhoinch hea muinneant, bogor mhojêa jivitant ani mhojêa mornanchea vellar. Oxem Zanv.

 

Zonn êka disacho nial kelea uprant apapleak kerit upkar mellunk mhunnonk zai magnnem jem asa hea pustokar (31) Êktisvea Disacho nial zatoch, ani hea magnnea uprant asa dusrem mellun gheunk kosloi sonvsarantlo upkar.

I - Poilo dis

Nial ani Magnnim

 

(1) Prestau: Ho muinom Bhagivont porim

      mancheac.

(2) Con te porim ho muinom mancho to.

 

(1) POILO PONT- Jernam vorsak êkdam Marsachea muineant amim mann ditanv Jesuchea Burgueponnachea Bapak, puttovotta amkam kosleim punn Devosanv korcheak itlea vhodda Bhagivontachem zaka favo zalem bag zaunk Anjanche Ranniêcho Poti ani Ballok Jesucho mhunnonk Bapui.

 

Hea pasot, Christanv othmea, Bhagivont Joséchem vhodd Devosanv kôr hea muineant zo somorpila tachea manak. Tem tuvem corunk zai Jesuchea moga pasun, zannem (30) tis vorsam Bhagivont Josék mann dila Aplea Bapaik koxo.

 

Tem tuvem korunk zai Moriê tujê Maiêchea moga pasun jinnem Bhagivont Josék mann dilo aplea potik ani Rakneak koxo.

 

Tem tuvem korunk zai Bhagivont Joséchea moga pasun zo Jesu ani Moriê pattlean sogleam munxeam poros bhagivont ani zannem sogleam bhagivontam poros Devache chodd upcar ghetleat.

 

Xekim tem tuvem korunk zai tujêach moga pasun, kiteak, tuka tor meullolo zai iok segunancho marog dacoinar, iok buzvonddar tujêam dukinim, iok askari tujêa mornachea vellar, Bhagivont José vortoutolo tuka iok xanno rakno, iok cakutvont buzvonddar, iok podvedar askari.

Bhagivont Bernard ani Bhagivont Theresa mhunntat, “Taka noinch sogli podvi asa othmeacheam ani kuddicheam gorzanim amkam pavuncheak, punn to amkam magun gheta, amim tache laguim magtanv tache poros chodd.”

 

Pio IX vea kirtivont (famoso) Papa Saiban taka sogle Igorjêcho Patron mhonn porgottlo ani sogleam Catholik porzank budh dili soglea visvasan taka ulo marat mhonn. Tea pasot korum-ia hem Devosanv jem itlem manta Jesuk ani Moriêk ani vortouta amchea vhodda faideachem.

 

Ho muinno atam suru zala to amkam vortoutolo Moriêchea muinnea baxen, iek muinno besanvacho, curpecho ani ixopnasleleam upkarancho.

Êh Bhagivonta José, tum zo, Saiba vortoutai mhozo Bap, hanv tuka bhettoitam ho muinno mhaka curpa magun ghê hanvem to sarcheak mhojêa bhagivontponnank upkarta toso.

 

(2) DUSRO PONT- Êk vhodd podvedar rit ho muinno favo te porim sarcheak, vortouta dispotto niall koruncheak amchea Bhagivont Partonacheam segunancho.

“Tum Bhagivont Josécho mog kortai zalear”, mhunnta Bhagivont Ambrosio: “tacheam segunancho pattlau kôr”, te asat tachea callzant zoxe porim astat tim fulam êka sombrut (fertil) hortant, iek-iek segun veglo veglo niallunk zai tanchi sarki sozmoni melcheak.

 

He jinsim tanchea voddponnachi sozmoni melloun gheun, amim mann diunk pauteleanv Dhoniank zannem tem amkam ugtte keleat, ani amcheam callzanim khuxi bitor sorteli tanchi dekh gheuncheak.

Tujêa kuddant dovor Bhagivont Joséchi imaz vo regist, ani tujim sanje sokallchim magnnim tache mukhar mhunn. Tancta zalear dispottem Mis aik vo Budvarachem punn, zo dis bettoila Bhagivont Joséchea manank. Muinnea modhem Povitr Communhanv ghê ani ho Communhanv taka bhettoi, tacheam magneam vorvim tuka borem morn melcheak ani Purgotorintleam othmeam pasun. He zaundi amche nicheu ani te Bhagivont Josécheam paiam laguim dourum-ia taka prathon korun te gheuncheak, tankam besanv ghalcheak, ani amkam modoth diuncheak te sambhallunk.

 

Moriê amche Maiê! Modoth  di Saibini, Tujêa Ankvar Poticho amim mog korcheak ani taka mann diuncheak zoxe porim tuvem tacho mog keloi ani taka mann diloi.

 

MAGNNEM

Hanv tujê laguim magtam, êh Bhagivonta José, melloun ghê makam favo tem aitomon ho muinom bore baxen pallcheak, Tum zo itle pavtti Jesuk sambhalltaloi To burgo astanam, makai sambhall ani rakh odik korun hea muinneant zo tuka somorpila. Hanv vavurtolom vodik urbevont zauncheak, hanv tujê segun adartolom ani tuji modoth magtolom. Di Saiba makam tujo podvedar alaxiro, noinch hea muinneant bogor mhojêa jivitant ani mhojêa mornachea vellar. Oxem Zanv.

 

EXEMPLO

Grenoble mhuntlele firgojent, êk dubli ostori asli, jicho ghou melolo; ti vavurtali apleam burgeank segunanim vaddounk, punn ticho voddlo putr, ti taka korunk soddtali tosolo utorlo nam.Taka Paris xharant dadlolo tachem xicop kobar korunk, punn to thuim jielo êk khottem jivit ani thoddeam vorsanim bolaiki pirder korun gara ailo. Bhagivont Monica baxen tachi avoi tambonastanam magnnim kortali ani dukam golloitali aplea vichitr putrachea conversanvam pasot.Vorsachea vorsa apleam burgeank gheun ti Bhagivont Josécho muinno kori ani hea vorsa tannim vaddoilim aplim magnnim tachea conversanvam pasot.

 

Tea muineachea poilea disa tim ekttaim zalelim tea kuddant to burgo bitor sorlo, ani thuim supurlo Altar kelolo to polloun, aple avoi lagim vicharlem tem kitem gai mhonn. Tache avoin taka zabab dilo ki tim Bhagivont Joséchea muinneachem Devosanv korunk addaitalim mhonn, ani tinnem mhunnllem, amim tem cortanv tujêm conversanv melloun gheuncheak.

To burgo anslo, nhoinch tea muinneachem Devosanv korunk tim aitomon kortalim dekhun, bogor tanchea tensavank zache pasot to muinom tim bhettounk sodi.

 

Dusrea disa, ani team fuddleam disanim, tim Devosanv cortanam to hanson bitor soro laglo; punn thodeam disam uprant to hansona zalo tim magnnim mhunttalim tem porian aiconk laglo ani Santa Kursachi Kuru caddli. Tea dusrea disa to ailo, ani mhunno laglo hi jakulator, “Bhagivonta José, mhoji cakut kôr,” ani aple avoic eussilean vollun tannem mhunntlem: “kedem vhodd mhojêm pixepon vortoule nam zait hanvem xastro sandcheak, ani kitlim sontosbhorit tumim zaunk zai, ki tem itlem borem korun sambhalltat! Hanvem eujilam mhojêm jivit bodolcheak ani jieuncheak êk Christanvanchem jivit; ani hanv patietam ki Bhagivont José, zache laguim tumim mhojê pasot maglam, mhaka melloun ghetolo mhonn curpa ani nirvon.”Pallo diun Devache zapec to Cumsarak ghelo ani vhodda Devosanvan tannem Comunhanv ghetlo, zaitim vorsam tannem borem jivit adarlea uprant, tacher mornachi pidda aili, ani nimanneam Sacramentam vorvim gotai gheun tacho othmo hea sonvsarantlo bhair sorlo Sorga Rajeant sasnanchea-sasnank, porcondunk Devachi Cakut ani Bhagivont Joséchi podvi.

Teach porim hea muinneant amim magum-ia vhodda borvonxean hea Bhagivonta laguim ani to amkam zaiti curpa melloun ghetolo.

 

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

II - dusro dis

Nial ani Magnnim

KONN VORTOUTA ZAIT BHAGIVONT José?

 

(1) To Vortolo Just.

(2) To Vortolo Davidachea Sosticho.

 

(1) POILO PONT– Bhagivont Lucas Ankvar Moriêk porcondta thoddeach utranim, Jesu zolmololo Moriêk; Bhagivont Matheus Bhagivont Josék porcondta tea poros thoddeam utranim; tacho soglo porcond attapla tin utranim pun tim sogli sozmoni ditat José vortolo Just. Dev Spirit Sant heam tin utranim vhodd mann dita hea vhodda bhagivontak. Igorje Matheche Dotor sangtat just mhuntlolo titl sozmoni dita ki José vortoulo mhonn iek munis sogleam segunannim borlolo ani vhodde sompurnaen, Moriê baxen, to vortoulo Jesucho jivo rupkar.

He jinsim to vortoulo just Deva mukhar ani bavarthan, nenthukaen, borvonsean ani mogan borlolo. To vortoulo just aplea pelea sovem kiteak peleachea mogacho sogleo vostu tanem adarleot, zanv tachea othmea thaim vo kudi thaim; xekim to vortoulo just apna sovem, kiteak kainch korinastanam tannem dovorlenam jea vorvim tachean aplo ekvott korunk Devak, ani aplo othmo patkavinn dovrunk. Tea pasot sogle segun adarun, vhodda santiponan jieun ani patkavinn jivita vorvim, amchea Onodvont Patronan apnak just mhuntlolo titl zoddlo, ani teach pasot Igorz Math taka pacharta mhunnon, bhou vhodd Bhagivont, Sanctissum José zo titl ti era kuincheach Santak dinam. “Ah! kitlo vhodd,”mhunnta Bhagivont Francisco de Sales, vortouta onodvont José taka sor korunk favo Ramo mhunnlolea zadda thaim jem sogleam zaddancho patxai vortouta, ani dison eta ki supurnaen vo segunanim to vortoulo Ankvar Morié itlo porian.

 

Nial Christanv othmea, ani tujê bitor vichar kôr, vortoutai zalear just? Asa zait mhojê thaim nit ji mhojê apouneak ani bhesak zai tea pormanem? Nit ji Devak sotea asa mhojê thaim sodcheak tache lagcho hanvem uzvadd ani curpa ghetleat tanche boldek? Kitle kaide asat zankam hanvem ekannem pallo diunk nam: kaide Deva thaim, mhojêa pelea thaim, ani mhojêa othmea thaim? Asa zait mhojê thaim favo tem aitomon jea vorvim mhaka khoxi asa Bhagivont Joséchi modoth magcheak, tache vinotin mellun gheuncheak, tache thaim vostali tea jinsachi tan ani bukh nitik?

 

(2) DUSRO PONT– Bhagivont José vortoulo Davidachea sosticho, mhunnge, tea sosticho jem vinchun kaddlelem ani bhettoilelem Patxaiponnak. Tacheam purvozam thaim asat Patriarch, Cunvor, Patxai ani to zolmololo tea sostichea garaneak sodri basaileli zalelea porim tanchem sasnanchem bhes. Punn Bhagivont Josék onod ani vhoddponn vodik favo zalem to vortoulo dekhun upkar kelelea garaneacho zannem sonvsarak Sorvonddar diuncho aslo. To vortoulo tech kulliecho zoxim vortoulint Ankvar Moriê ani Jesu ticho Putr. Temp atam sorlolo ani Jesuchi talli paloun tache thaim ailoli. Tache Patxaiche kulliecho, sogleam nasanvanim otreglolo, zolmoncho aslo ani Bhagivont José zauncho aslo tacho Bapui ani Rakhno. Ani amim je vortoutanv hea patxaiache kullieche sande ji Joséchea poskea putran consagrar keleat, punn amim sozmotanv zait kedea vhodda vhoddponnak amkam tea vorvim pavoileat te? Sacrament, punn voddik korun Communhanvcho Sacrament, amcho ekvot korta amchea Dev-Sorvonddark, ani tacho amim fol kadtanv zait? Christanv othmea vollok ghe tujêa vhoddponachi ani polle tum choltai zalear tum tujêa vortea apounea pormonem. Êh Bhagivonta José melloun ghe amkam curpa tujêr besanvam simpdailelim tancho amkam foll melcheak, zancho amim vantto bogtanv, Christanv vortoutanv dekhun.

 

MAGNNEM

Êh Ankvar Moriêchea Nirmolla Poti, êk zab uloun mhojêa callzak, dista mhunntaxem Bhagivont José laguim voch. Tea pasot hanv etam ani sorpott podtam tujê mukhar ani hea curpechea muineachim poilim follam hanv tuka bhettoitam ani hanv vavurtolom tujê chakrent vodik visvasi ani urbevont zauncheak. Mhaka meloxem kôr tujêm tench vhodd Devosanv zoxem aslem Bhagivont Theresak jicho hanv adhar magtam ho muinno favo te porim sarcheak.

 

EXEMPLO

Birankul piddechea tempar, iek urbevont Padri bitor sorlo êke khomptent, zoim iek mataro munis chodd boro naslo voxeache pidden ani melleam bansireanim to gutlolo. Tache sorxem konn iek naslo, tonachea antunar to nidlolo, ani kainch gorachi mustaiki (moveis) thuim disti poddonasli, kiteak tachea vaittacheam poileam disanim tannem soglem vikun kalelem.

 

Te khomptecheam vonoticher, zankam xello mandlolo, umkoutaleo don korvonti ani iek kurard, heo vostu vortouleot tachim soglim atiaram aplem udarposon korcheak. “Buzvon ghe,” mhunnllem taka tea Padrin, “Dev tuka aiz vhodd upkar korta, thoddeanch vogtan tuvem sandcho poddtoloi ho sonvsar, zoim tuvem bogleai nhoi dusri vost, bogor dogd.”

 

Dogd! portipau kelo tea piddevontan, aikota nam aikota tosolea tallean, tum mhunnttai thoxem godonk nam; Bhagivont Josék hanvem kelo mhozo Patron ani model, ani tache baxen, mhojêa besa pasot hanvem kedinch murmurar korunk nam. Connanchi adavont ani rag mhaka nam, hanv sodanch nidlam vhodda somandanan; hanv khorap (cansado) zatalom mhojêa disachea vauran, punn ratchi hanvem soukasai ghetlea.

 

Tum atiaram polletai tim mhaka melloun ghetalim mhozo dispotto guiraz zo hanv ruchin khatalom; khorench, hanv vortoulom dubllo, punn Bhagivont José-i mhojê baxen dubllo also; ani azun poriant mhaka bori bolaiki asli. Hanv antlo boro zain zalear, hem mhaka goddotem disonam, mhozo sodancho vaur kortolom ani argham ditolom Devak zannem mhozo itlo sambhall kela.

 

Ho dubllo munis he jinsim uloita tem aikon Padre zobor ojap zalo, punn dusrean taka mhunnllem, “ixtta, zorui tujêm jivit tuka angodd lagonk nam, zoxem hanv sozmollom, torui tuvem moronk toiar zaunk zai, Devache khoxer raji zaunche passun.” “Hanv zanno aslom koso jieunk zai to,” mhunnllem tea mortelean êka gotta tallean, ani zanno zatolom koso moronk zai to, Devak hanv argham ditolom tannem mhaka jiu dila tache pasot, ani morna vorvim mhaka Apna sorxem eiso kela tea pasot.”

 

Maguir vhodda Devosanvan nimannem Sacrament gheun hea dubllea munxean zannem aplea jivitant Bhagivont Josék kelolo aplo Patron ani Model, soukasaen jiu sanddlo.

 

Tech porim amim magum-ia hea vhodda Santacho alaxiro, ani tacheam segunancho pattlau corum-ia.

 

 

 

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

 

Amchea Bapachi Somzonni

Kitea passun amim mhunntaum: “Tujem Nanv Vhodd Zaum”?

Devachem Nanv manadic zauncheac, sogott Devac ollkunc paucheac ani mann diunc callzan, boream côrneamnim ani utramnim.

 

III - tisro dis

Nial ani Magnnim

JOSĖCHEM  NANV

(1) Êk Porkondlelem Nanv.

(2) Êk Salvasanvachem Nanv.

 

(1) POILO PONT– Igorje Matheche zaite Padri sozmotat ki Joséchem nanv Devan galunk lailelem mhonn. Tea pasot, kedo vhodd vortoulonam zait Devacho mog hea Patriarkacha sovem zor to tachem nanv, jem to voronk aslo munxeam ani Anjeam mukhar, Devan vinchun kaddlelem zait? He Sorginchem nanv, zachi sozmoni Hebraik basen vortouta chodd guirestai ani vaddop, vortoulem êk bori khun curpecheam banddaranchi zantum borcho aslo hea just munxeacho othmo, ani vaddop jem tannem korchem aslem segunam modhem.

Bhagivont Bernardo mhunnta, ki Bhagivont Joséchea navanche sozmonen, ji vortouta vaddop, dubau dourinastanam rigunk favo amche motint cosoleai jinsacho munis to vortoulo to. Tachem nanv vortoulem poileantlem êk utor jem Ballok Jesu uloilo aplea posleleam bapaicheam hatancher astanam ani Maria ghetali tem nanv aplea disachea nomanant. Christanv othmea vhodda manan ghe hem nanv jem bhair sorlam Devacheam bandarantlem; hem onodvont nanv, amche motint sodanch amim gollounk favo Jesuchea ani Moriêchea Povitr nanvam sangata, ixopnasleleam Santanim hea nanvak mann dilo.

Tech porim monant dor ki Bautismant tuka Igroz Mathen nanv dilam tem vortouta êka Santachem nanv jea vorvim Igorz Math tuka dita iek rakhno Sorga Rajeant. Tea pasot vhodd Devosanv kôr tujêa nanvanchea Santachem, uchar tachem nanv mogan ani visvasan, patllau kôr tacheam segunancho ani sodankal tachi modot mag. Edou porian ho kaido tuvem pailai zait?

 

(2) DUSRO PONT– Jesuchea Nanva uprant ani te Sorgache Ranniêchea anink konnachem nanv amkam vhodd podvedar alaxiro dit, noi zalear Tichea poti Joséchem? Tem dita visvas Christanv othmeank ani vortouta zaite curpechi zhor. Iek bhagivont boropi taka mhunnta “Sorgacho Sontos, sonvsaracho borvonso ani infernacho campero”. Hem nanv thonddak monvam poros ghodd lagonam, ani aikonk muzga poros sobit?

 

Oi, hea bhagivont nanvant asa gottai ani segun Jesuchea ani Moriêchea nomoskarancheam nanvam baxen; tem vortouta prodexi othmeacho sontos, tem taka buzvon dita tacheam dukinim, tache motik uzvadd dita tacheam dubavanim, tem taka rakta tachea salvasanvachea dusmanntlo, tem taka dhir dita mornachea vellar, ani taka Sorgachim daram ugttim korta.

 

Êh José, hea nanvanchea alaxirea khal asleleak kalgivont kortolo ani niraxi (desperar) korchona.

Christanv othmea Joséchem nanv Jesuchea ani Moriêchea nanvam sangata, zanv tuzo poilo sobd tum sokallcho uttanam, ani nimano sobd tum ratcho nidchea adim. Tujêa jivitant hem nanv sodanch gollondi tujêam vonttancher, ani tujêa mornachea vellar, jernam tuzo othmo hea sonvsarantlo bhair soron sasnanchea Rajeant vetolo, tujê nimanne sobd zanv tim Mogall Nanvam: Jesus ! Maria ! José !

 

MAGNNEM

Êh Bhagivonta José, tujêm nanv ghetleleachea callzant pettoi tuzo mog. Tujêm nanv vortouta iek orasanv, ani hanvem tem visvasan ghetlear, hanv magtam tem mhaka meltelem mhojêa jivitant tem sodanch mhojêam vonttancher astelem, ani mhojêa mornachea vellar tem mhaka visvas ditelem, ani vortoutelem mhoji passa porte tea nimannea vogtar.

EXEMPLO

1863 vorsa, Dubleancheam Lanam Boininim, Barcelona xharant, dubleam matareancho sambhall korcheak iek ghor kelem, ani tem Bhagivont Joséchea adara khal dovorlem, zaka tannim titl dilo tea Garacho Provisor mhonn.

Tem ghor lan aslem dekhun, teo Boinim poileo ostoreankuch ghetaleo. Oxem astanam, iek dis tanchea darar marlem êka 80 vorsanchea matarean, ani apnak gheat mhonn tankam paratlem.“Hanv ailam, tannem mhunntlem, anga rauncheak,” punn portipau kelo Boinin, “ghor bhou lan vortouta dekhun amchean dadleank gheum nozo.”Tichem sangnem matarean kanar ghetlem nam bogor apunn angach rautolom mhunnok laglo. “Tujêm nanv kitem?” vicharlem tea garache Superiorin. Mhojêm nanv tannem sanglem, “vortouta José”. Boininim êka-mekak pollelim, tem nanv tankam ojapanchem dislem, tea bhair to dis vortoulo Budhvar zo vodik korun somorpila Bhagivont Joséchea manank; tea pasot tannim eujilem taka gheuncheak. Punn tanchean taka koxo gheum eto? To mataro korjin borlolo, ani taka dusrim hanglim diuncheak tanche lagim naslim. “Voch” Superiorin mhunnlem êke tantle boinik vo madrik, “ani bic magon tujêan xharantlim thoddim anglim addu etit zalear polle.”Gozal korta astanam, garachi kampin vazli, ani iek ollok naslolo munis iek pet dourun ghelo. Tannim ti pet usoili ani bhou ojap zalint polloun tantun iek sogloch fat!

To mataro zoboruch khoxi zalo ani tache poros teo Boinim khoxi zaleo, ani tanchanim Bhagivont Josék purim argham diunk nozo zalem hea tachea upkara pasot. Bhagivont Patriarkachea adara khal tem ghor tethun than vhaddot ghelem ani atam tem ghor sambhall korta 200 matareancho je Dubleancheam Lanam Boininche zotne khal soukasaen aple dis sartat.

Ah! Kitlem soth vortouta ki Joséchem nanv sorvoi suater dadospon addta mhonn!

 

 

 

 

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc

 

IV - chouto dis

Nial ani Magnnim

JOSé VADDLO ZANVAEN ANI PIRAEN

(1) Tachem Burguepon.

(2) Tachem Zanttepon.

 

(1) POILO PONT– Bhagivont Josék Devan voddam vostunk vinchun kaddlolo dekun zaite Igorje Matheche Padri sozmotai ki to zolmonchea adim Devan taka soimbachea patkantlo (pecca do original) dulolo mhonn. He poile curpe vorvim, Bhagivont Gerson mhunntta, Devan tache thaim nam keleo vo zaiteo unneo keleo khotteo vondhanneo jeo vortoutat soimbachea patkachim koddu follam, ani mogacheam bandpassanim Devan taka Apnak bandlo jea vorvim to Tacher portonaslo.

Zorui Povitr Pustok Joséchea burgeponachi khobor kaim sangonam, torui bore baxen amchean soth mandum-et ki sogle segun adarun tannem aplea burgeponanchim vorsam povitr kelim mhonn, Devacho bhou vorto mog kelo, tannem aplea avoi bapaik mann dilo ani tanchem sanglelem aikolem, vortoulo pelea sovem mogall, sambhallun aplea othmeachem Innocentpon, jea vorvim zannar Cornelio a Lapide tachi khobor uloitanam, tannem Josék pacharlo mhunnon ki to vortouta noich munis bogor munxea unch, Anjo. Fuit Angelus potius quam homo.

Bhagivonta José, hanv tor mhojêa burgeponantleam vorsancho ugddas korin, ani tankam tujêa burgeponantleam vorsank sor korin, bhou vhodd dukh mhaka bogta. Ah! kitlim vorsam hanvem pider kelim! Kitlo usram mhojêa Deva, hanvem tuzo mog kelo!

 

Hanv nicheu kortam hea fudde mhojê adin asa tem soglem korcheak, pirajit adarun mhojêa pattlea jivitachem farikponn diuncheak.

 

(2) DUSRO PONT– Patkachi saulli nastanam Joséchem burgepon Innocentponan sorlem, to zanto zata, zata, tache segun vodik porzollunk lagle. Hea sonvsaracho mann ani guirestkai to sodinaslo, punn dadoxi zalo Devan taka gatlolea besar; khalteponan rauncheak. To vortoulo tovoi, ani aplo vaur korun tannem pallo dilo sogleam kaideank. Deva thaim ani pelea thaim.

 

Ah! Joséchea othmeacher kitli curpa simpddailinam zait? Visvasan tiche pormannem cholon to segunanim vaddlo, ani vhodd bhagivontpon favo naslem taka dilam, kiteak tachea adara khall Sorgincho Dev patiencho aslo Aplea Êkleach Putrak ani tache racknne khal patienchi asli Ankvarinche Ankvarik.

Kitli bori Bhagivont José dek-rit dita torneam munxeank, je, kuddicheo patki khoxeo bogouncheak aple bore dis ogunanim sartat ani matare zatoch ani moronk laguim pautoch Devacho mog korunk rautat!

 

Bapano ani avoiano, tumcheam burgeank onodvont Patriarkachea khal dourat, zachea adhara khal Sorgincho Bap patielo Aplea Êkleach Putrak.

 

Tache kodde magat tumcheam burgeanchem Innocentpon ani apounem (vocação) rakcheak, ani ternam, tache baxen, tim bhagivontponan ani zanvaen vaddtelim Deva mukhar ani munxeam mukhar.

 

MAGNNEM

Êh Bhagivonta José, nirmi, Saiba, tujêa burgeponant tuvem segun adarlei tanchi hanvem dekh gheuncheak. Mhojêa callzachi zoton kôr, tem pozddeam khoxeank ondounam zauncheak. Melloun ghê, Saiba, mhojê thaim Devacho Spirit voscheak, ani hanv morcheak sonvsarak ani sonvsar mhaka. Oxem Zanv.

 

EXEMPLO

Novembrache 5ver 1865 vorsa, êka 18 vorsanchea burgeak, zo soiranant naslo, La Motte Servieux mhunnllolea hospitalant velo.  Hospitalache madrin vicharlem tannem Sacrament ghetleat zalear. Nam, Boinim, mhunntlem tea burgeachea bapain, to Cumsar zalear 10 muinnem zale. Voizanim taka siro marun ani eram voktam korun pollelim, punn soglem kiteakuch upkarlenam, ani xekim tannim jiu nam mhonn sanglem.

Hospitalache madrin tea burgeachem nanv José mhonn aikotoch, tinnem mhunntlem ki Bhagivont José aplem nanv galeleam munxeank Sacramentam vinnem moronk diunchonam mhonn. Maguir tinnem angoun keli ki to burgo boro zait zalear, vorsachea-vorsa Bhagivont Joséchea Festa dis Communhanv ghetolo mhonn tachea avoi-bapaichea sangata. Rat aili, punn piddevont kainch bori khunna dakoinam zalo.

Torui madricho visvas dhoundhoulonam, ani sumar sokallcheam 5 horar taka sintid ailo, ani tannem Cumsar zaunk maglem.

Bhagivont Josén, taka sarki bolaiki melloun ghetli, ani to burgo hospitalantlo bhair sorlo, thir nicheu korun vodik visvasan Devachi chakri korunk, ani aplea Podvedar Protectorachea vhodda upkarponan.

 

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

Jevnna Adim Magnnem

Besanv ghal Saiba, amchea jevnnacher ani tachea vorvim amche kuddik boll ani bolaiki dhi, Tujêa Onodak ani amchea othmea-kuddichea borveak amim vavurchea pasun.

V - PANCHVo Dis

Nial ani Magnnim

JOSéCHI VINCHNI (ELEISSAUM

(1) Kedem vhodd vortoulem tem tachem   

      Missanv.

(2) Connam jinsim tannem xarti pailem tem.

 

(1) POILO PONT- Nial ki Bhagivont Josék Devan vinchun kaddlolo Moriêcho Poti zauncheak Virum Mariae, ani Jesuk Postolo Bapui Custos Domini sui. Ankvarichi ani Ballokachi zoton korcheak Devan taka nemlolo, tanche sangata tannem jieunk zai aslem, tankam gorjecheo vostu tannem diunk zai asleo ani tanchea gopant tannem moronk zai aslem.

 

Ah! Kedem vhodd vortoulem Bhagivont Joséchem apounem zaka Sorg ani sonvsar ojap zaunk favo êk apounem zannem famad Gerson mhunntoleak mhunnonk lailem. “Cosolo mann amchean sor korum-et hea mannank ki Devache Maiên, Sorgache Ranniên, Josék mhunncheak aplo Poti ani Dhoni, ki Dev Putran taka mhunncheak Bap, ani 30 vorsam tachem sanglelem aikuncheak! Jesu, Moriê, José tumim vortoutat, êk sonvsarantli Trinidad jika Sorginchi Trinidad dadosponan polleta.”

 

Bhagivont Josék osolea apouneank vinchun kaddlolo dekhun, taka sogleam Santam poros vhodd Sant kela, ani taka borta curpen ani deneanim zanchi taka goroz asli tachea Missanvachea vhoddponnak lagon. Bhagivonta José, tujê sangata mhaka-i Devak argham diundi, tuka Tannem vhoddli curpa dilea tanche pasot.

 

Christanv othmea, heam buzvonimchea sotam voir nial kortanam, monant dor ki Devan, tujê-i adin kelea mhonn Moriêk Tache Maiêk ani Jesuk Tachea Putrak, ani tuka Tannem mhunntlam zoxem Tannem mhunntlolem Josék: dovor hem banddar jem tujê adin kelam, Depositum custodi. Oi, zoton kôr mhojê Maiêchi, di tika mann ani respeit; kiteak ti tuzo bhou chodd mog korta. Zoton kôr mhojêa Putrachi, zaka tum bogtai Communhanchea Sacramentant, ani chotrai dor patok adarun Taka kedinch dusrean khursar mari nam zauncheak.

 

(2) DUSRO PONT– Nial kosolea nirvonnan ani visvasan Bhagivont Josén xarti pailem tem aplem kam Devache kuxer, raji zauncheak tannem sogle segun adarlet, sogleam jinsanche dogd soslet, tannem sosleo dulbolkaecheo konnisttaeo, khonticho pordes ani Devak betoilet aple sogle koxtt, aplea kopolachi um ani soglem aplem jivit.

 

Kosoloch dubau nastanam mhunnoet ki sogleam tacheam kortubani tacho xevott vortoulo ho: Soglem Jesuk, soglem Moriêk! Tannem tankam rakhlim, tankam jeunk khaunk dilem, tankam akantantlim vattailim Beleant, Egyptant ani Nazarethant. Êka utran, taka vaur dilolo to tannem itlo boro kelo ki Igroz Math taka pacharta mhunnon visvasi chakor. Fidelis servus.

 

Christanv othmea, monant dor ki amkam sogleank asa êk kam, jem amim xarti paunk zai, ani kaide, zankam amim pallo diunk zai. Bhagivont José baxen visvasi zaum-ia Devak amim ixeop diuncho poddtolo amchea sasnanchea besa khatir, denneam pasot jim Tannem amche adin keleant.

 

Amchoch othmo tor amim salvar korunk zai aslo, vortoulonam ho iek vhodd kaido, iek vhodd zababdari; punn, ai, anink kitle othmem asat zankam amim modoth diunk zai tanchem salvasanv zoddunk! Tea pasot chotrai dorum-ia ani amche adin keleat te othmem salvar korum-ia, iek dis amim aikoxe zauncheak tim buzvonnechi utram.

 

“Borem keleim, borea ani visvasea chakra... tujêa Dhoniachea sukhant bitor sor.” (SAM MATÊV: XXV : 21).

 

MAGNNEM

Bhagivonta José, melloun ghê, Saiba, mhaka curpa hanvem Devachi zab aikuncheak ani hea sonvsarant sogleam vostum thaim Tachi khoxi korcheak. Nirmi, Saiba tujê baxen hanv curpek visvasi zauncheak, ani sonvsarache xebaskechi vo khalteponnachi porva korinastanam hanvem mhojêm sasnanchem salvasnav zoddcheak.

 

EXEMPLO

Lyon xharant rautalo iek torno munis, mann tache kulliecho, zache motint ailem ki ho sonvsar sanddun apnem Religios Ordint bitor sorunk favo mhonn. Hem tachea avoi-bapaik gomtoch tim zobor chintest zalim, taka bobaulo to korunk sodtalo tem borem noi mhonn sanglem, ani xekim zaitim dukam golloun tachi euzon pois keli ani tachi bass ghetli anink thodo temp punn apun Religios Ordint bitor sorchonam mhonn.

 

Nirbagui avoi-bapui; tim add ailim dekhun Devache khoxer; nirbagui burgo, taka nirvon nam zalem dekhun Devachea apouneank pallo diunk.

 

Tachea avoi bapain taka boll kelem sonvsarachem jivit jieunk, patieun ki oxem kelea uprant taka aplea apouneacho mog nam zatolo mhonn, tike-tike tea burgean boreo korneo adarcheo sanddleo, Sacrament ghenam zalo, ani matxem matxem khotem jivit jieunk laglo.Thoddea tempan maguir; to aplech bitor lozo laglo apleam khotteponank, ani tacho avoi-bapui taka bori xikoun ditalint ti chucouncheak, to garantlo bhair soron soldad zalo.

 

Tachi avoi ani bapui bhou dukest zalint ani rozar korunk legun tim bhie laglint, kiteak thanim aplea burgeak, Deva koddcho kaddun deuncharak dilolo.

Xekim tannim chintlem Bhagivont Josécho alaxiro magonk, melloun gheunchea khatir bhogsonem apnank ani tanchea burgeachea conversavank.

 

Hea tensavan tannim Novenam korunk addailim ani zaiteam apleam ixttam kodde maglem heam Novenank eiat mhonn.Tanchem magnnem aikolem; Bhagivont Josén tea burgeachem conversanv meloun ghetlem, to burgo aplea bapaichea gara ailo, khori dukh dorun apleam patkanchi, sogleank bori dekh diunk laglo apleam boream korneam vorvim.

 

He deki vorvim xikum-ia kitlea gorjechi vortouta ti Devachi zab aikonk; ani Dev amkam curpa dita tea pormonem amchea apouneak veng marunk.

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

 

 

Jevnna Uprant Magnnem

Amkam Tum dispott’to ghiras ditai mhonn Saiba, Tuka argham ditam. Ani riti-bhair jeun ani pieun Saiba Tujêr chuk adarunk amkam nirmunaka.

VI - SOVo Dis

Nial ani Magnnim

JOSÉ ANI MORI

(1) Josécho Mog Moriêk.

(2) Moriêcho Mog Josék.

 

(1) POILO PONT– Ankvar Mori jernam Jesuchi avoi zaunchi asli, tika assunk zai aslo iek Poti zo aplea nirmoll jivita vorvim vavurtolo Dev-munxeacho nomoskarancho guth (mysterio) lipouncheak.

 

Bhagivont José vortoulo to vinchun kaddlolo poti, Virum Mariae, ani Bhagivont Patriarchan aplo modur ani moriadi mog dakoilo aple khot-naslele Potini sovem. Tichi zoton korun ani tika modoth diun sogleam ticheam khontinim.

 

Bossuet mhunntlolo zannar munis sangta ki noinch tichi bhaili suropai bogor tichea othmeachi bitorli ani gupit suropai vortouli mhonn ticho bhov vhodd surnngar, ani iek bhagivont boropi amkam sangta, “ki Josécho mog Moriê thaim vortoulo itlo vorto ani Dev-Mogan nirmoll zalolo ki munxachean bhavartachea adaran legun tachi sarki sozmoni gheunk nozo.”

 

Christanv othmea, he vhodde dekicho pattlau korcheak vavur ani tujêa Patrona Bhagivont Joséchi dekh gheun, soglea tujêa callzan than Moriêcho mog kôr. Ti vortouli tachi Potin ani ti vortouta tuji Avoi: Ecce Mater tua. Monant dor ki khorem ani niz Devosanv Sorgache Rannienk vortouta êk Salvasanvachi khunna, ani Tichea adara xivai êke baxen (moralmente) amchean melloun gheun nozo ti vhodde gorjechi vost amchem Salvasanv. Soglem borvem jem amkam ailam ani etelem vortouta Moriêchea hatantlean Omnia Per Mariam. Zaka ti meullea, taka jivit meullam.

 

Bhagivonta José, melloun ghê mhaka tem khorem Devosanv tujê Bhagivont Potinik jem Bhagivont korta, ani zachi tum vortouloi poili ani bhou sompurn dekh.

 

(2) DUSRO PONT– Mori vortouta sobit Mogachi Avoi, Mater pulchrac dilectionis. Ticho Mog Deva thaim vortouta sogleam Santancho mog ekttaim kelear tachei poros chodd, ani ticho mog pelea sovem vortoulo tichea Devachea moga pormonem. Tea pasot tichea Bhagivont Poticho kedo vhodd mog tika aslo nam zait; taka Devan vinchun kaddlolo tichea Ankvarponacho khot-naslolo govai zauncheak ani ticho mann rakcheak ani tea tichea Dev-Putracho?

 

Ti tacho kori mog Deva-Bapachea ani Deva Spiritache muniaracho koso zanche suater to aslo tiche sovem, ani êka Santacho koso, zaka tichea Jesu-Dev Putrachem bhou vhodd sarkem aslem. Kuinchech Potinim vhodd mog korunk nam vo chodd respeit diunk nam zoso Moriên dilo Josék. Bhagivont Bernadino de Sena mhunntta: “Moriêchem ani Joséchem, dogaichem mellon vortoulem êk calliz ani iek othmo; tim vortoulim êke motichim, êka mogachim sogleam vostum thaim êke khoxechim”. Connachean chintun sarum-et ho Innocent Mog! Ani tache vorvim Bhagivont Josék kedo vhodd mukutt melonam zait?

 

Christanv othmea, sogleam Santam poros Moriêchea Potik chodd mann dium-ia, ani tache Potinik amim mann ditanv tantum taka bhairainam zaum-ia. Zoso Sunvar somorpila Bhagivont Ankvarik, tech jinsim Budvar bettoila Bhagivont Josék. Amim poi Moriêchea muinneachem Devosanv kortanv, tech porim Bhagivont Josécheai muinneachem korum-ia. Him donuim Devosanvam kusin korunk favonant; tim vortoutat dekun upai je amim Jesucho mog korixo korta. Ankvari Moriê amim tuka prartitanv, melloun ghê amkam iek modur mog Josék, tujêa Ankvar Potik ani amchea Mogall Bapaik.

 

 

MAGNNEM

Bhagivonta José, tuka Devan Moriêcho Poti kelo, tea pasot soglo amcho visvas amim tujêr dourunk favo, mag Saiba, amche passun; ugddas dor ki jernam tum Moriêcho Poti vortoutai, Tichean tuka kainch negar zanv nozo mhonn; mag tor; Saiba, Tiche laguim amkam ghê mhonn Tichea adara khal ani polle mhonn amkam Tichim bhurguim koxim. Oxem Zanv.

 

EXEMPLO

Bhagivont José apna laguim magteleank upkar korta noinch othmeacheam vostunim bogor kuddicheaim porian. Roanne mhunntlolea gavant, Fransant, dubleamcheam Lanam Boinink don hozar frank rinn aslem; hem rinn farik korunk temp kelolo to kobar zal-lo; ani tanche laguim kaim naslem.

 

Sanddlelem jevon tim ekttaim korit tem tancheam dubleank posunk puro aslem, punn tem don hozar rinn farik korcheak konnachich moddoth meullinam. “Amim magonk zai Bhagivont José kodde”, tantle êke Boinin mhunntlem “to êkloch amkam he konnisttaentlim soddoit, tea pasot taka Noven korunk addarum-ia,” ani aplem magnnem êka kagdachea kuddkear boroun tem Bhagivont Joséche imajicheam paiam laguim dovorlem.

 

Iek dis, Novenam kobar zaunchea adim, êke porke guirest ostoren, ji hotelant ravo thuim vaittant podleli, superiorik apounk daddli ani tanchea garant apnak iek kuart mellot gai mhonn vircharlem. “Amchean konnak gheum nozo”, boinin mhunntlem “bogor mataream dubleank, punn mhojêan tuka êk ghor dakoum eta zoim tuka zago meutolo amchean tuka dium et tache poros boro.”

 

Ani konuim tuka ismol dit zalear tum ghetai?” vicharlem te guirest ostoren. Dubavavinn,” boinin mhunntlem, “amkam anink kaim nam amcho sambhall korcheak.”

 

Ho zabab aikon te guirest ostoren tika êk duddvanchi poti dili, ani bhou vhodd vortoulem te Boinichem ojap ani upkarpon deklea uprant te potient don hozar frank, zanche pasot tannim sogleanim Bhagivont José laguim maglelem

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

 

 

Fatimacho Sond

“Sodankal Têrsachem Magnnem Kôrat”

- Fatima Saibinn, Mai 13, 1917

 

VII - SATVo Dis

Nial ani Magnnim

BELEM

(1) Bhagivont José Jesuchea zolmanchea Disa.

(2) Jesucho Dusro zolm Sagradint.

 

(1) POILO PONT– Augusto mhunntlolea Imperadorache ocumek khalto zaun José, zoxem sangta Povitr Pustok, Moriê tache Potini sangata Galilea than Judeant ghelo, Nazareth than Davidachea gavant, zaka mhunntat Belem, thuim nanv borouncheak. Tanche dubllekaek lagon tankam puzadar suat mellonam zaun, tim êka gorvanchea gotteant guelint. Anga te Israeliche Ankvarik ojeapanim zolmolo ticho Putr. Tinnem taka pangrailo durbollam angostranim ani taka tea koddar dovorlo ani Josén nomoskaran sorpott poddun, vhodda sontosan Dev Burgueak niallo.

 

Christanv othmea, Joséchea iscolant aiz xik ti Sorginchi xikoun konn baxen Jesuk niallchem tem.Somoz ki tum Jesuk polletai mhonn team angostranim pangrailolo ani koddar dovorlolo tea gorvanchea gotteant.To rodta ani koxtt sosta.

To vortouta oskot ani dublo tuka melloun gheunche khatir guirestkai, voddpon ani sasnnancho onod. Ankvari Moriê, Bhagivonta José, amcheam callzanim rigoiat thode sentiment zantun Dev Putr zolmolo ternam tumchim callzam borlelim.

 

(2) DUSRO PONT–Sant Athanasio sor korta Sagradik, zantum asa Santisim Sacrament, gorvanchea gotteak zantum Ballok Jesuk dovorlolo. Deva zaka amim Altarar nomoskar kortanv, taka Moriên ani Josén nomoskar kelolo Beleant, êkuch ontor asun, ki gotteant amchea Sorvonddarachem Povitr munxeponn mornadik (mortal), ani bodoll khall aslem, punn Altarar tem sodanch vortouta Onodvont ani Mornavinn (immortal). Êke baxen Bhagivont José poros amkam vhodd privilej asa; Jesuk tannem apleam hatancher dorlo, tachean Taka polloum etalo, Taka tenko etalo ani To uloitalo tem aiko etalem, heo sogleo vostu bhaileo, Cummunhanvcho Sacrament; Jesu ani mhojêa othmea modhem kitlo vhodik ekvott korta! To mhojê sovem ieta. To bitor sorta mhojêa othmeant. To mhozo ani Aplo ekvott korta êke baxen To Apnnak ani mhaka êkuch korta, he jinsim mhaka Apununch korcheak, tea pasot nhoim hanv zo jietam punn Christ Zo jieta mhojê thaim.

 

Ah! Kedem vhodd bag ani sukti nasleli curpechi zhor! Koxe baxen goddta zait ki amche Dev Hostuk amim ittle thodde pautti beth kortanv ani itle thodde pautti Taxa xeutanv? Munxeanchea moga pasun To Sagradint asa, ani munis Tachi beporva kortat! Tankam to apoita Aplea mezar, ani te ieinant! Khorench, mhunntta Bhagivont Augustinho, “Mogacho mog korinant.” Amor non amatur.

 

Christanv othmea, Cummunhanchea Sacramentant Jesuk Farikponnacho Act kôr, ani atam Tachea mogall apounneak aik.

 

Êh, Dev-Emmanuel! Mogache bhette, di Saiba amkam Tuji vhodd tan ani bhuk, amim gotteantle Altara sorxem vochun, Ballok amkam murgotta thuim than Dev Apnnak amkam dita thuim vochun, xekim amim paucheak sasnnanchea Mogache Sagradint Sasnnanchea Jivitachea Cummunhavank.

 

MAGNNEM

Bhagivonta José, Jesu zolmololo ternam tuka sontos boglolo tacho mhojêan vantto gheum eta, kiteak Dev munis, zaka Belea nogrant gorvanchea gotteant tuvem nomoskar keloloi, zala amcheam othmeanchem jivit ani khan ani aple koxen iek koidi amcheam Sagradinim. Punn ai! Mhozo bavarth vo mhozo mog pavonam tujêa bavarthak vo mogak. Tea pasot, vhodda Bhagivonta mhaka melloun ghê tujê baxen Jesuch thaim mhaka meullea puro mhonn mhojêm dadospon, kiteak To êkloch vortouta mhojêm banddar, mhozo mog, ani mhojêm soglem.

 

EXEMPLO

Italiachea Cunvrache 29ve poltonicho iek soldad vhodd khottem jivit jielo, vodik korun soldad zatoch. Tannem noich boreo korneo adarcheo sandleleo, bogor burgeponant magnnim xiklolo tim porian to mhunno naslo kaddun êk Noman Moriê ani hem magnnem Bhagivonta Josék, “Bhagivonta José, tum Saiba vortouloi Povitr Familicho Bapui ani Rakhnô tech porim za Saiba mhozoi bapui ani Patron ani mhaka melloun ghê êk borem morn.”Hea rozara bhair to anink kosolinch Devosanvam korinaslo, hem Devosanv matr to dispottem mhunnttalo. Vhodd ojap disoet, taka Bhagivonta Josécho vhodd visvas aslo, ani tacher kosleim dukh vo khont etoch zaite pautti to Bhagivont Joséchem nanv ghetalo. 1809 vorsa, Laybach mhunntlolea gavant loddai zaloli tantun tachea donkeak nallicho gullo boslo, ani tachean ubo ravo nozo zaun taka lagsilea garant velo. Tachi poili bobatt vortouli, “Bhagivonta José, Bhagivonta José,” mhonn, ani tacheam vollvolleam modhem hinch utram to mhunnttalo. Êka pordexi (exilado) Francez Padrin, zo deguechea garant aslo, tachi pirgon aikon ani tea modhem him utram: “Bhagivonta José, Bhagivonta José” tea dukhoulelea soldadak religianvche mozotichi khoxi asot mhonn sozmolo.

Tea pasot, to Padri danvam-danvim tea soldada sorsem guelo ani taka Cumsar zaunchi vhodd khoxi asa mhonn gomon, taka nimanne Sacrament dile, ani thoddeach vogtan maguir Bhagivonta Joséchem nanv gheun tea soldadan jiu sandlo.

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

VIII - ATTVo Dis

Nial ani Magnnim

EPIPHANIA

 

(1) José ani Reis Magos.

(2) Visit Santisim Sacaramentak.

 

(1) POILO PONT– Jesu zolmon thoddo temp zalea uprant, Josén pollele Udentiche Patxai ailele Beleachea gotteant. Ochorianchea neketra vorvim te Belea nogrant paulet, ani Ballok Jesuk dovorlolo thuim bitor sorun sorpott poddlet Balloka Sorvonddara mukhar bettoun Taka bangar, dump ani mirrh. Cossolo sontos ani dadosponn boglenam zait Bhagivont Josék hea disa, jernam vhodde khoxen tannem team Pataxaiank ghetle ani tankam dakoilo Ballok Jesu, tancho nomoskar gheuncheak, ani jernam tannem argham dilim Devachea bolleponnank zannem soglea munxeakullak Salvasanv dilem kosolich ontor korinastanam Nasanvanchi vo zatinchi? Khoxall borit za, José, ho Ballok zaka tum sambhalltai thoddeach tempan kollit zatolo ani soglo sonvsar Taka nomoskar kortolo. Atanch Judevanche ani konkneanche suater, Palestinache gorvam-raknne ani Udentiche Patxai Taka mandtat aplo Patxai mhonn, aplo Sorvonddar mhonn ani aplo Dev mhonn. Atanch tim prophetachim utram goddonk laglim. “Sogle Devache Anj Taka nomoskar korundi.” (HEBREVANKI:6).

 

Christanv othmea, khoxalborit za José ani Moriê sangata he Onodvont Jesuche dakonne pasun ani Devak argham di team Udenticheam Patxaim baxen tuka ollok dili dekun Tachea Dev Putrachi itleam sogleam munxeam modhem zannim Tachem Nanv legun aiconk nam.Team zanvaecheam munxeachi dekh gheuncheak vaur Jesuchi ollok diun ani Tacho mog korunk laun. Erank vat dakoita toslem neketr za, addun Taka nomoskar kortele bhavarti, ani maguir iek dis Bhagivont José tuka aplea Putra sorxem vortolo Sasnnanchea Rajeant.

 

(2) DUSRO PONT– Reis Magos mhunntoleank sontos boglolo to, khoroch vortolo vhodd, Ballok Jesun tankam nirmilem Apnnak mann diuncheak ani Aple upkar tancher simpdaile. Tannim bangar dilolem tache boldek mhunntta iek bhagivont boropi, “Tannim xanneponnanchem dennem ghetlem, dumpache boldek rozarachem dennem ani mirrhache boldek khursachi sozmoni.” Tanche poros amkam unne bag asa zait? Tech porim amchean Jesuk visit korum nozo Tachea khalteponnant, Taka niallum nozo, Taka bhettoum nozo amchim calzam ani mago nozo Tachem Besaum? To vortouta zait unno mogall ani unno ghirest Sagradint gotteantlea poros zantum to zolmololo? Bhavart amkam sangta he mogache bonkonddint to khoroch asa mhonn, thuim amkam To rauta mhonn, Tache hat borleat mhonn curpen jeo sogleo amkam diuncheak. To otregta “Eiat Mhojê thaim”, Tannem mhunnttlam sorv je koxttoutat ani konnisthaeanim fugar zatat ani Hanv tumkam dadoxi kortolom.(SAM  MATÊV XI:28).

 

Christanv othmea, êkui dis bolandunk dium naka amchea mogall Sorvonddarak visit korinastanam Tachea mogachea Sacramentant. Bhagivonta Theresa, Bhagivonta Catharina de Genova, Bhagivont Luis mhunntalet goddtem zalear, soglo vogt Tacheam paiam laguim rautim, ani Bhagivont Francisco Xavier zaite pautti Santisim Sacramenta mukhar adorasanv korun ratincheo rati sartalo. Êka utran, bhagivont munis Santisim Sacramentachem vhodd Devosanv korit, tantun te Sant mhonn gomtale. Tech porim tuim kôr. Ere suater buzvon sodinaka, Santisimak  iek visit kelear tuka somadan meltelem, tuka puro zalear tem tujê thaim borvonso ubzaitelem ani heam utranchem sot, tujê thaim goddtelem. Zo bogta Jesuk to sogleo vostu bogta.

MAGNNEM

Hozar pautti hanv Tuka argham ditam Dhonia team zanvaecheam munxeam baxen Tuvem mhaka amchea Dhonia Jesu Christachi ollok dili dekun. Di Saiba, curpa Bhagivont Joséche vinotin tea apouneak hanv visvasi zauncheak. Hea bhou amolik deneancho hanv mog kortolom ani team zanvaecheam munxeam baxen hanv tem moro pasun sambhalltolom khorea bavarthan.

 

EXEMPLO

Lyon xharant pidda poddleli ternam, 1638 vorsa, Bhagivont Joséche vinotin zaito thuincho lok ti pidda zainastanam urlo vo ti zalea uprant tantlo boro zalo.

 

Êka letradachea satam (7) vorsanchea burgeak ti pidda zali ani sogleo khunnam zaleo ani heo disti podlea uprant somzo-etalem ki morn laguim paulam mhonn. Tachea bapaicho zo boro Christanv vortoulo, borvonso pirder zalonam.

 

Bhagivont Josék tannem ulo marlo ani angounn keli ki aplo burgo boro zait zalear 9 dis Bhagivont Joséche Igorjent Mis aikon mhonn, tachea mannak vati pethoin mhonn ani tache vinotin upkar melloun ghetlolo thuim boroun galin mhonn. Itlea munnosor voiz ieun tea burgeak polloun vocho lagle, zo itlo zodd zalo ki voizanim formailem taka Hospitalant vorcheak, quitem to anink don horam vanchonk kottin mhonn.

 

Voizanim sanglelem tea pormonem kelem, punn to burgo Hospitalant pavonam fudem sarko boro zalo. Bapain, aplea muktivont rakneachea vhodda upkarponnan boron angounn keleli ti farik keli.

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

IX - NOVo Dis

Nial ani Magnnim

CIRCUMCISANV

 

(1) Bhagivont José Balloka Jesuk Nanv galta.

(2) Hea Povitr Nanvachem Devosanv.

 

(1) POILO PONT– Niall Circumcisanvcho Dis kedo vhodd vortoulo to. Bhagivont José zanv Povitr Familicho Voddil ani Balloka Jesucho Postolo Bapui, tacho kaido vortoulo Taka tem Maha Povitr ani sogleam nanvam poros podvedar nanv galcho, Devan kollit kelelem hem Nanv Anj Gabriela vorvim, ani tea nanvachem soglem voddpon taka sanglelem. Tum Taka Nanv galtoloi JesuS. (SAM LUK I:31). Balloka Jesu mukhar sorpott poddun, Bhagivont Patriarchan aplea monant mhunnttlem: “Ghe, Dhonia, hem Povitr Nanv zache mukhar sogott dimbi galtele Sorgar, sonvsarant ani infernant. Tem Nanv vortoutolem êk godd tel jem mhojêa othmeant bitor sortelem. “Oleum effusum nomen tuum.” Tea pasot Devachea Putrak hem Povitr Nanv ghalcheak muktivont Patriarchak aslo to vhodd privilej, ani tannem poilem ghetlem Jesuchem Nanv, zantum amcho soglo borvonso asa. Tethum than 30 vorsam to Devachea Putra laguim uloilo, taka vhodd dadospon aslem hem Povitr Nanv disa pottim zaite pautt gheuncheak. Bhagivont José, munxeanchea Sorvonddarachem Vhodd Nanv galunk vinchun kaddlo dekun hanv khuxalborit zalam!

Hem Nanv sonvsaracheam Patxam ani Nasanvam mukhar vorcheak Bhagivont Paulo tor iek vinchun kadlelem aidon (instrumento) zalo, kitlo vodik tuka Bhagivonta vinchun kadlonam zait jernam tuvem tem Nanv dileim Ballok Jesuk, ani goddie-goddie tem ghetleim munxeam ani Anjam mukhar? Êh vhodda Bhagivonta mhaka curpa melloun ghê, Saiba, Jesuchea Nanvachem hanvem vhodd Devosanv korcheak.

 

(2) DUSRO PONT– Bhagivont Joséchi dekh gheun, sodanch Jesuchem Nanv gheum-ia teach sentimentan je tem ubzaita: Poile suater, gheum-ia tem Nanv visvasan kiteak Jesu thaim amkam asa iek bhou mogal Bapui, bhou vhodd visvasi ixtt, bhou vhodd podveddar sastri, ani Toch amkam sangta, ki sor jem Tachea Nanvan amim Deva thaim magon tem amkam meltelem mhonn. Dusre suater, gheum-ia tem Nanv vhodda upkarponnan, kiteak Devachea Putran Jesu Nanv ghetlem amchea Salvasanvam khatir; ani hem Nanv amkam ugddas korta koxttancho, khalteponnancho ani dogdancho je Tannem sosle amkam sasnnanchem sukh melloun gheuncheak. Tisre suater, gheum-ia tem Nanv mogan. Bhagivont Francisco de Sales boroita êke gou melele bhagivont ostorek: “Ah! kitle goddsaninchem vortouta Jesuchem Nanv! punn tem favo te porim gheuncheak amkam êk mogan pettlelem calliz assonk. “Mhaka sorv vortouta ruchiviretlem,” mhunntta Bhagivont Bernardo, “tantum nam zait tor Jesuchem nanv, soglem tum uloitai tem mhaka dista xellem ani ruch naslelem, tantun tor hanv aikonam zain Jesuchem Nanv. Oi, Jesu vortouta moum mhojêa thonddak, sobit muzg mhojêam canank, ani sontos mhojêa callzak.”

Christanv othmea, sogleam tujêam dogdanim, sogleam tujêam akantanim Jesuchem Nanv ghê; tem vortoutelem tuji girescai, tujo dhir, tujêm Salvasam. Êh Bhagivonta José, melloun ghê, Saiba, iek khorem Devosanv hea Povitra Nanvak jem vortoulem tujêm sorv dadospon. Dhonia Jesu, Tujêa Nanva vorvim amkam Salvar kôr. In nomine tuo salvum me fac.

 

MAGNNEM

Bhagivonta José, nirmi, Saiba, tujê baxen mhaka gottai ani dhir melcheak hem Povitr Nanv gheun jem tuvem galeim Sonvsarachea Tarokak. Nirmi, Saiba, hanvem hem Nanv gheuncheak bavarthan, moriadin ani mogan. Jesuchem Povitr Nanv zanv mhoji buzvon mhojêam dubavanim, mhojêm boll mhojêam talneanim, ani mhozo nimano sobd mhojêa mornachea vellar.

EXEMPLO

Byans mhunntlole firgojecho Vigar Padr Bouveret, sokla dilea ti khobor sangta êke tache chittir ji tannem boroileli Setembrache 20ver 1871. Ghelim 17 vorsam mhojê firgojent iek Protestant aslo. Bore soeg meulla titlei pautti hanvem taka amche Igorjent bitor sor mhonn sanglelem, punn tannem ekui pautti aikolenam.

Ghelea Agostant to vhodda vaittant poddlo, ani ixtanim mhojê laguim maglem tache sorxem voch mhonn, ani hanv vochon novean taka sanglem Protestant Religianv sandd mhonn.

 

Catholik zauncheak to nigut kobul zainam zalo ani tache kodde anink uloun mhaka faido nam so diso, hanv gara vochonk uttlom, mhunnon, hanv atam Mis mhunnonk vetam, vhodda borvonsean hanv tujê pasot magtolom ani thuim Deva laguim mag, kitem korchem tem tuka Tannem kolloilea puro mhonn. Tacheam soiream laguim hanvem maglem jernam tim Catholic vortoulim, mhojê sangata tache pasot magat mhonn.

 

Mis mhunnonk vechea adim hanvem Bhagivont José kodde maglem tea vaittakara pasot, dourun taka tea Santachea alaxirea khal ani hanvem angounn keli ki to mhojêa Protestant munxeak converter korit zalear hanv hi khobor porgott korin mhonn. Bhagivont Josén mhojêm magnnem aikolem.Mis zatoch tea vaittakara sorxem hanv novean ghelom ani to mhaka nigut boldololo meullo; tannem mhoji xikonn aikoli, chuki sodleot ani vhodda otregan nimanne Sacrament ghetle. Kainch vogot naslo pirder korcheak, kiteak fokot don horanim jiu soddlo, punn to melo boro ani khotkhotolo Catholic koso.

 

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

X - DAVo Dis

Nial ani Magnnim

APRESENTASANV

(1) Josén ani Moriên Jesuk bettoilo Templant.

(2) Povitr Sacrifis (Bhett).

 

(1) POILO PONT– Niall Ballok Jesu zolmon chalis dis zalea uprant, Bhagivont José ani Ankvar Moriê vorta Taka Templant Sasnnanchea Bapak bhettounk, zoxem formailem Moiseche Sumurtin. Bhagivont José vortoun Povitr Familicho voddil, Ballok Jesu poros tachean kainch anink vodik moladik bhettoum nozo aslem, zo tacho poslolo Putr zalolo ani zacho to mog kori soglea callzant than. Oxem astanam hich amolik bhett tannem Altarar dovorli ani ti Devak dili ekannem udarponnam (generosidade). Simiaunche Profexi vorvim hea nomoskaranchea Ballokacho taka fuddar gomon, tacho othmo khontin borlo. Amchean bore baxen sotmandu-et ki Moriê sangata tannem ti bhettoili mhonn iek dis sakrifikar korcheak sonvsarachea Salvasanva khatir. Dison etem ki Abraunchea Devachi tannem zab aikoli, mhunnon : “Vor tujêa êkleach Putrak zacho tum mog kortai...ani tacho sakrifis kor.” (GENESIS XXII:2), ani tannem zabab dilo, Dhonia, hanv tem kortolom, kiteak Tuji Sumurt mhojêa callzar boroulea, oi, ghê hi khot nasleli xelli, jichem rogot iek dis sonvsarachim patkam dutelem. Mhojêa sakrifisacho hanv ekvott kortam tea Jesuchea Sakrifisak, mhojêa Putrachea, hanv mhaka bhettoitam Tuka, mhojêa Deva, Tuzoch mog ani xeva chakri korcheak ani pallcheak Tuji Povitr Khoxi. Ah, kitli udar vortouli Joséchi bhett ani kitli ti Devak manoulinam zait?

Christanv othmea, Dev tujê laguim magta Apnnak bhettoi mhonn (thodde bhou pautti punn) tujêo disacheo korneo; hi noich vortouta êk bhagivont sonvoim, bogor iek khoro kaido kiteak Devachi xeva-chakri korcheak tuka rochla. Tea pasot visvasan hea kaideak pallo di, ani sokallincho uttanam mhunn: Mhojêa Deva, hanv Tuka bhettoitam mhojêm calliz ani aichea disacheo sorv mhojêo chintnam, sobd, korneo, dogd Tujêa vhodda Onodak.

 

(2) DUSRO PONT– Ugddas dorum-ia ki amim Povitr Mis aikotanv ternam, Bhagivont José baxen, amim Jesuk Tachea Sasnnanchea Bapak bhettoitanv mhonn, Padri borobor amim mhunnttanv, “Ghe Deva Bapa, hi khot nasleli Host ji amim Tuka bettoitanv...sogleam bavartheam Christanvam pasun, jiveam ani meleleam.”

Bhagivont Josén, Jesuk Templant bhettoilolo ternam tache thaim aitomon aslem tea jinsachem aitomon amim Povitr Mis aikotanv ternam amche thaim asta zait? Amim nialltanv zait ki zoxem Bhagivont Ligor mhunntta,”Iek Mis Devak vhodik Onod dita sogleam Santanchem punem ektaim korun dita tache poros, ani êka Misacho foll amchem soglem jivit rozaran sarun melloun gheum-eta tache poros vodik vortouta.” Misant amim te vhodde Hostuk amcho ekvott kortanv zait, Devak bhettouncheak amkam ani sorv jem amchem vortouta? Amkam dukh bogunk favo zoxem “Imitação de Christo” ho livro mhunntta ki thoddech munis zannot ho Salvasanvacho Mister zo sontos dita Sorgak ani sambhalta sonvsar.

 

Christanv othmea, iek thir nicheu korum-ia hea fudde chodd pautti ani vhodda Devosanvan Mis aikuncheak. Salvasanvachi kalce Devak bhetttoitat tantum sorv attaplam: Nomoskar, Argham, Bhogsonnem, Mozot jiveank ani meleleank. Ankvari Moriê, Bhagivont José, nirmi mhaka tumcho pattlau korcheak, ani hea fudde hanv Mis aikotanam, tumim mhojê kusik asat mhonn niallcheak.

MAGNNEM

Vhodda Bhagivonta, tum zo vortouloi poilo Moriê pattlean Jesuk bhettouncheak Tachea Sasnnanchea Bapak, tujêa callzachea Altarar hanv Povitr Mis aikotanam, di Saiba, mhaka tuzo bavarth, mog ani Devosanv. Mhojê hat, vont ani calliz vhodik nirmoll vortoulelem zalear kitlo mhaka foll melchonam! Hea fudde Mis aikotanam hanv chinttolom tum mhojê kusik asai mhonn, ani tujêa mogacheam sentimentank mhozo ekvott korun, vhodda khotkotean hanv prartolom. Amen.

 

EXEMPLO

Thoddim vorsam zalim Turin xharant iek torno munis rautalo, taka dormancho kainch mog naslo. Tannem don poixeanchi dumti ghetli ani ti êka xaplelea kagdak gutlaili. Vell kaddcheak kagdar aslem tem vachunk laglo. Tacher iek orasanv aslem Bhagivont Josék, borem morn melloun gheuncheak, ani zorui tea boropachi taka thoddi sozmoni meullina, torui tachea tem monant ghelem, ani novean tea kagdacho taka ugddas eun to anink iek paut bolsantlem kaddun tem vachunk laglo. Tacheam sangateanim tem kagot dektoch te kaddun gheunk sodi lagle, punn tannem lipoilem, ani tachea kellant misoll zalo.

 

To êklo zatoch tem kagot tannem bhair kaddlem, kiteak poile pautt tannem vachlelem ternam taka tea kagdachi sango nozo tosoli ruch lagleli. Tea kagda voilem orasanv goddie-goddie vachun tannem tem dekor kelem ani chintinastanam zaite pautti tem monant golloi laglo. Zorui Bhagivont Josék tacho ho mann êke baxen khoxe viretlo vortoulo, torui tachem pag taka mellonastanam raulenam. Bhagivont Josén movailem tachem calliz, ani tachea ghineanak uzvadd diun dormanchim sotam apsinch tacheam dolleam mukhar ailim, ki tannem iek Padre pollelo ani apnak tache xikounne khall gatlo.

Tachem maghirlem jivit, taka ollkotale titleankui bori dekh mellunk lagli, ani zaiteam zannank tannem Bhagivont José kodde disandis iek borem morn magoxe kele.

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

XI - IKRAVo Dis

Nial ani Magnnim

PORDES

(1) Bhagivont José Egyptan Pollon ghello.

(2) To Egyptant raulo.

 

(1) POILO PONT– Nazareth xharant Bhagivont Joségher Sorga porim thonddai vostali, jernam auchituch modeanir Devacho Anj Bhagivont Josék distti poddlo ani mhunnttle: “Utt ani Burgeak ani Tache Avoik ghê ani Egyptant poll, kiteak Herod Burgeak nam korunk sodtolo”.(SAM MATÊV II: 13) Hi kedi vhodd khont vortoulinam zait Bhagivont Joséchea bavarthak! Tachea ani Deva Bapachea Putra pattlean lagla iek nistur kunvor zannem suput dila Tacho prann kaddcheak! Burgeachea akantak Anj porian bhielaxo distalo; ani “diso-etem”, iek bhagivont boropi mhunntta, ki Sorgar kampero poddlolo mhonn to sonvsarar simpoddchea adim. Punn kedem vhodd vortoulem Bhagivont Joséchem khalteponn. Devachea ukumenk tannem rokdoch pallo dilo ani Ballok Jesuk aplea khandar gheun Moriê sangata Egyptak vochonk bhair sorlo. Niall, munxea, konn te jinsim Povitr Famil danv-danvim Egyptant gheli ti, add tujê motint ki tum tanche bori choltai mhonn team porkeam ganvantleam ani revenchea oroneanttlean je tannim bolandle kosolench jevon-khan podrak ghenastanam bogor jem tim ojapanim ghetalim, vo jem konnuim bik koxi galtalo, konnunch tankam vatt dakoitolo nastanam, punn rigut Devachea Bolleponnar patieun; tankam nastanam êkui asor, bogor Sorgachim kupam, ani hem 150 kosanche vattek. Konn sangon dito ghai mhunntta Alberto Grande mhunnttlolo, heam khontinchem vhodponn? Quae major tribulatio?

Khorem ani suttavem vortouta ki Jesu hea sonvsarant ailo mhonn amkam soddouncheak Khursa vorvim. To zolmola tethun than, To Apunn Khuris gheta, ani Aple Avoik ani postelea Bapaik toch Khuris gheunk laita, tankam soddounenchea kamant Aple sangati korcheak. “Je suater Jesu bitor sorta”, mhunntta Bosuet, “To bitor sorta Khuris gheun”, ani tea Khursa bori kantte addta, je To dita apleam mogacheam munxeank.

Tea pasot, Christanv othmea, Dev tuka khuris dita to ghê, to vortouta mogacho ugddas, salvasanvachi khunna, Sorgachi chavi.“Amcheam khursancho mog korum-ia,” mhunntta Bhagivont Francisco de Sales, “te sogle bangarache keleat dekun.”

 

(2) DUSRO PONT– Povitr Famil Egyptak pautoch, thond kattea (tradição) pormonem Heliopolis mhunntlolea gavant tinnem raunem kelem, ani tim raulim sumar 7 vorsam. Konnachean chintun kobar koru-et kosole koxtt, dogd ani kalteponn Bhagivont Josén soslem tem heam 7 vorsanchea pordesant! Sam Boaventura Maria de Agueda, ani dusre boropi mhunnttat ki noich Bhagivont Josén bogor Jesun ani Moriên legun bhou vhodd durbollkai sosli, ani iek devot boropi sangta ki Ballok Jesuk bukh lagtoch Bhagivont José laguim unddo mago ani tache laguim kaim nastalem Taka diuncheak! Itlench vortoulem noim Bhagivont Josénchem dukh; hea bhair tannem pollounchem poddlem thuinchea lokan Sorvonddarak okman kelele zoim sorv vostunk Dev mhonn buzot mandinastanam khorea Devak. Oxem astanam hea soglea dukha modhem Bhagivont Patriarchak gottai kedinch unnim zalinam. Jesuchea ani Moriêchea sangatan taka sogli buzvon meulli jichi goroz asli tannem sosnikaen pordesache dogd bolancheak. Jesu bori asnnem, mhunntta “Imitação de Christo” mhunntlolea livracho author, vortouta dadosponanchea voinkutam asnnem.

Christanv othmea, sonvsar amkam vortouta iek pordes, iek dukanchem kondd, zoim amim tambonastanam roddtanv ani dukam golloitanv, Gementes et flentes. Amchea bhagivonta askarea thaim xikoia, ki Jeusk ani Moriêk amcho vhodd exvott kelear, amkam melteli gottai, dhir ani buzvon. Hea bhair amchem soglem dan ani mon amim dourunk zai amchea Sorginchea Rajar zoim sasnnanchea sasnnank amim sukh bogteleanv Jesu, Moriê ani Bhagivont Josêchea sangata, zaite pautti gollonv-ia amche motint him utram, êke goddieche dogd ani sasnnanchem sukh!

 

MAGNNEM

Bhagivonta José, tuvem Ballok Jesuk sangat keloi Tacheam viaginim, mhaka vatt dakoi ani rakh, Saiba, sogleam mhojêam vaittanim kuinsorui hanv asonv. Kedinch mhaka nirmi naka segunanchea margavelo koddsorcheak vo Jesucho ani Moriêcho hanvem sangat sandcheak, akantantlo mhaka nivar, mhojêa koxttanim gottai dhi, hanv sasnnanchea sukant pavo poriant. Amen.

 

EXEMPLO

Ankvar Moriên êke bhagivont madriche motint galem aplea povitr Potiche, Bhagivont Joséchea, vinotin curpa mag mhonn, rozar ani her magnnem tinnem khorea Devosanvan korcheak. Hi madre sasnnancheam sotam voir nialltali titlei pautti tika vhoddleo talneo etaleo, ani heo talneo tika itlem boll korit, ki ti bhietali aplea salvasanva khatir. Ticheam vollvolleam modhem tinnem Ankvar Moriêk ulo marlo, magon, dhi mhonn, apnak motichi soukasai, tinnem somandanam ani Devosanvan rozar korcheak. “Êh Ankvar Moriê,” tinnem mhunnttlem, "tum tor Saibinni hanv magtam to upkar mhaka mellun gheunchinaim zalear, ghall punn mhojêa motint hanvem magcheak Bhagivonta kodde zo tujêa vhodda mogacho vortouta, ani zache kodde vhodda visvasan mhojêan mago-et ho upkar.” Him utram mhunnon kobar zainam fudde tiche calliz borlem somandanan ani othmeache goddsanin, teach bori tika kollit kelem ki Bhagivont José, Moriêcho mogall Poti, vortoulo mhonn tichea vhodd mogacho sogleam Santam poros ani tacheam vorteam segunam pasot, iek bitorli ani othmik jivit jieunchi khoxi asleleancho Bapui ani Mestir zannk taka favo zalem mhonn.

Tethun than te madrin apnak tachea asrea khal gatli ani tache podveddar vinoticho tika rokddoch gun gomlo, nam zaun sogleo talneo jeo thetun poriant tika bejar kortaleo; ani kernaim tika matsi talni etxi dislear, hea bhagivontacho tinnem ugddasuch kelea puro also to tika motichem somandan melloun ghetalo.

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

XII - BARAVo Dis

Nial ani Magnnim

Bhagivont Joséchem Jivit Nazareth Gavant

(1) Tachem dekol jivit.

(2) Tachem bitorlem jivit.

 

(1) POILO PONT– Herod patxai melea uprant Devacho Anj Bhagivont Josék novean distti poddlo ani mhunnllem taka, “Utt, Bollokak ani Tache Avoik ghê ani Israelachea gavant voch.”(Sam Matêv II: 20). Maguir Povitr Famil Nazareth gheli zoim Munxeponacho Mister goddlolo. Niall Bhagivont Josén him visui (20) vorsam jim tannem sarlim hea dubllea garant. Tachea jivitan kaim naslem ojapanchem dista tosolem. Povitr Pustok porian tachea jivitachi kaim khobor sangonam. Tea tempar Jerusaleak ani Romak xane munis asle, zanchea nanvan soglo sonvsar borlolo, kiteak to temp vortoulo Herod ani Augusto patxaiancho, punn, Nazareth Bhagivont Joséchea garant kitem goddtalem tem konn iek noklo aslo.

 

Taka volkotale team munxeank to distalo iek dubllo vauradi, iek tovoi zo sodanch vaur korit astalo zo tannem korunk zai aslo tachea bhesak lagon ani Jesucho ani Moriêcho sambhall korunk. Punn osoleam chalteam vostum thaim kosolim bandaram ani santipon lipon aslem! Bhagivont José sogleo vostu bore baxen kortalo, tacheo chalteo korneo vortouleo bhou punevont Deva mukhar, to teo kortalo dekun nirmoll monan ani vhodda mogan.

Christanv othmea, hea vorvim sik ki santipon attaponk nam mhonn vhoddam suatanim ani vhoddleo vostu kortat tantum, bogor soimba vortea tensavan bhagivont korun amcheo chalteo korneo. Sorv jem amim Deva pasot korinanv tem amkam kiteakuch upkaronam sasnnank. Kitle zann munis asat je kursod ghenastanam vavurtat, ani je nimanne Zotte Dis riteam hatanim distti poddtele! Tea pasot lanam vostum thaim visvasi zanv-ia ho vortouta sompurnaecho gutt ani bhou sugur vat Sorgar vechi.

 

(2) DUSRO PONT– Bhagivont José vortouta bitorlea jivitachi sompurn dekh. Tachea dubllea garant tannem sarlet aple dis, ani tachi gorozuch poddlear to munxeam modhem distti poddo. Devan tacher Apli Curpa simpdaili ani taka moladik bandaranim borun ghirest kelo. Moriê baxen tannem tim banddaram aplea callzant dovorlim ani ugtim kelinant.

 

Hea bhagivont Patriarkan kitlem punem ani segun ektaim kelenam zatit tachea eksurea jivitant jem tannem sarlem pois korun rochneancho mog ani paixavanchim uchambollai nastanam, aplo bhou vhodd ekvott korun Jesuk ani Moriêk? Utranim sangon diun nozo, iek bhagivont boropi mhunntta, Bhagivont Josécho othmo kosoleam ojapancheam segunanim nettoilolo to, punn amim tem zanno zateleanv nimanne Zotte Disa, ani ternam nenttukaen lipoilele te soimba vorte porzoll dekot zatele, ani sogott volkotole tem santiponachem vhoddpon jem êka khaltea jivitachea danknea talla lipon aslem.

Christanv othmea, tea pasot sik bitorlem jivit jieta ani Devak vhodd ekvott korta tachem dadospon ani sontos. Vhodda otregan ani sompurnaen sodin zalear, amchea Onodvont Modela baxen, amim jieunk zai liplelim ani konn iek noklo tosolim jivitam. Ama nesciri. “Ibaddan soglea sonvsaracho ibadd kela, konn iek nam dekun callzant than nialltolo.” (JEREMIAS  XII, 11).

Bolleponachea ani Mogalla Deva, nirmi, Saiba Bhagivont Joséchi dekh gheun sodanch amim Tujê ujir cholcheak.

 

MAGNNEM

Bhagivonta José, tuvem, Saiba, Nazarethche Povitr Familik rakhli ani sambhauli, tech porim amkam rakh ani sambhall. Vhodda Bhagivonta amkam curpa melloun ghê amim bhieuncheak sonvsaracheam khuxalkaeank ani aikuncheak Devachi zap jednam To amcheam callzam laguim uloita. Oxem Zanv.

 

EXEMPLO

1855 vorsa Fano mhunnttlele Collejicho iek burgo vhodd vaittan poddlo. Zaiteam voizank addle punn tanchim voktam kiteak upkaronk nant, ani to burgo tike tike morta so distalo. Voizanim consult kelea uprant sanglem ki taka boro korcheak kaim upai nam mhonn ani jernam to kuincheai vogtar moro-et aslo, taka nimannem Sacrament diat mhonn sanglem.

 

Tachea Confessorak gomtoch ki munxeachean taka boro koru nozo mhonn, taka bhud dili Bhagivont José thaim visvas dovorcheak ani vhodda borvonsean tachea kodde magcheak. Ani 7 Missam bhettoi mhonn sanglem Bhagivont Josécheam 7 Sontosank ani 7 Dukhink, ani Communhanv ghê mhonn tache Patrocinichea Festa Dis jem laguinch aslem. Hea bhair to aslo tea kuddant Santachi imaz dovorlear borem mhonn sanglem, ani festache adle sange ticha mukhar don vati pettouncheo mhonn. Tea iskolachea burgean hem soglem korunk angoilem, ani heo visvasacheo ani mogacheo khunnam Bhagivont José pollenastanam raulonam. Heo angounneo keleleo teach disa tea vaittakara thaim boro gunn distti poddlo, perigachim kunam nam zalim, ani thoddeanch disanim to sarko boro zalo.

Hem vortoulem bhou vhodd ojap kiteak heach pidden tache familiche zaite munis melele.

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

XIII - TERAVo Dis

Nial ani Magnnim

JESU SANDTA ANI MELLTA BHAGIVONT jOSéK

(1) Bhagivont Joséchi Dukh.

(2) Bhagivont Josécho Sontos.

 

(1) POILO PONT– Povitr Pustok sangta tea pormonem José ani Mori vorsachea vorsa Jerusaleak vetalim Paskanche Porbek, ani Jesu 12 vorsancho zatoch To tanche bore ghelo. Fest kobar zalea uprant, José ani Mori era loka sangata Nazareth eunk bhair sorlint, José cholon dadleam bori ani Mori ostoream bori zoxi tanchea gaunchi chal asli. Tannim dogainim usko kelo nam Jesucho kuim asa kai mhonn, punn tim kothoulint kiteak José sozmotalo ki To astolo mhonn Aple Maiê bori ani Mori sozmotali To José bori asa mhonn.  Iek disbor chollea uprant ani tinsanam tim ekttaim zatoch, Jesu tanche bori nam mhonn tankam gomlem. Amchean chintun sarinozo kitli vortouli ti dukh Moriêchi ani Joséchi jednam tankam gomlem Jesu sandlo mhonn kiteak to vortoutalo tancho mog, tanchem consolasanv ani tanchem jivit. Tannim Taka sodlo ani melta titleaim kodden vicharlem Taka dekla ghai mhonn punn konnuch noklo zalo, To kuim asa to tankam sangcheak: Dolentes quaerebamuste; ani he jinsim sogle don dis sarlet.

Amim Jesuk sandtanv, punn don vegleam bhasanim, poile suater, patka vorvim. Taka amim sandtanv ternam ti vortouta iek khast, Jesu sandta iek calliz zantum deuchar bitor sorlolo asta, to poss gheta ani infernachea nisttur patxaiak thuim raj korcheak nirmita. Cosolem vortounam zait hem odrust, zache pasot gollounk favo, rogtachim dukam! Êh Bhagivont José, osole birankull gotir amkam poddunk dium naka! Êh Jesu, sodankal amchea thaim rau.

Dusre suater, amim Jesuk sandtanv amcheam othmeancher khonti ani dukhi etoch, ani ternam Dev amkam bore vo vaitt te pollounk sodta. Jesu amche borobor asa mhonn amim sozmotaleanv punn To kusin sorla. Khontiborit zalelea othmea, desesperar zanv naka, Jesu sandonk nam sasnnanchea-sasnnank tuka To mellonam zauncheak; tuka veguinch To dusreaim meltolo. Sosnikaen hi dukh sos, vhodde buzvonnem poros ti tuka vodik adavachi zateli. Rozaran tuji mot gott kôr, tum Devosanv kortai tem sandunaka, visvasan Moriêk ani Bhagivont Josék ulo mar, ani tuka tim modoth ditelim mellouncheak motichi soukosai, somandan, ani bitorlo sontos.

 

(2) DUSRO PONT–Tin dis vhodda uskean sodlea uprant, Josék ani Moriêk melta Jesu, Jerusaleachea Templant, Jesu, Povitr Pustoka pormonem aslo Templant, boslolo Dotoram modhem tankam aikotalo ani vichartalo tanche thaim. Ani Taka aikotale titlei ojap zatale Tache zanvaek ani zabab aikun.(Sam Luk II:46,47). Ho vogot kosolea sontosacho vortoulo nam zait itleam nistturam dogdam uprant Josék melta tachea vhodda mogacho Jesu; sandlolo ternam itli khont tannem bogli. Tankam To mellonam sonvsaracheam munxeanche zomatinim, punn Devachea Garant, Dotoram modhem, 12 vorsancho astanam, ojap zaunk laun Israelicheam zanntheam munxeank, ani poile pautti Aplem Devpon ugddapem korun tankam je raji asle tem sotmandcheak. Dubavavin ho vogot vortoulo vhodda sontosacho Bhagivont Patriarkachea jivitant. Tannem Balloka Jesuk apoilo, aple venghent Taka dorlo ani mhunnttlem zait Povit Pustoka porim: Mhaka To meulo zacho, mhozo othmo mog korta, goth Taka dorla ani anink Taka sodchona. Faido nastanam Jesuk sodlea uprant, xekim Josék To meullo Templant, ani tukai, Christanv othmea thuim To meltolo.

Tachean pois vocho nozo, mogacheam bandpasanim Taka Sagradik bandla. Thuim To Apli sikoun dita, thuim To calzam kodde uloita ani tanche kodde magta. Santanchi zantikai ani Sorgacho marog sikcheak zaite pautti Tache sorxem vochum-ia. Êk utor Dhonia Jesuchem amchea callzant vodik chodd amkam sinkoitelem livram poros ani niallam poros je amim vachtanv pustokar; ani kiteak upkartat ghai, zor Dev amcheam callzam kodde uloinam zalear?

 

MAGNNEM

Onodvonta Bhagivont José, mhaka curpa melloun ghê hanvem mhojê voir zoton korcheak jea vorvim kedinch Jesuk sandinam zaunk. Punn osolem odrust tor mhojêr eit; mhaka nirvon ani thirponn melloun ghê, hanv Taka sodiso To mhaka mellosor, ani nirmi dusrean kedinch hanv Tache sorxilo kusin soronaso, punn ravoso Taka ekvott korun moro porian. Oxem Zanv.

 

EXEMPLO

Zaite pautti goddlam ki Bhagivont José modoth ani buzvon dita aplea devotank tanchea mornache vellar. Sokoilo exempl dakoita achem khorepon. Jesuche Sociedadichea Noviciadant, Chiere gavant, Domingos Jemi mhonn iek irmanv aslo taka khevad zaleli. To aslo bhou gunest ani teka aslem vhodd khalteponn, Deva thaim aplo vhodd ekvott kori, ani bhou vhodd Devosanv Bhagivont Joséchem. Tachea vaittant to vortoulo vhodde sosnikaecho ani nigut Devacher patien sogle koxtt bogle itlea khuxalponan ki hea vorvim taka pollounk eteleank tannem bori dekh dili. Mornacho vogot laguim pauta-pauta tacho quarto iek supurlo Sorg zalelea porim diso laglo, fursod ghenastanam aplea callzacho ulas to bhair galtalo, thodde pautti khursar zoddlelea Jesuk, vo Povitr Callzak, Ankvari Moriêk, ani tachea kherit Patronak, Bhagivont Josék. To morche adle rati, dista ki Ankvar Mori ani Bhagivont José taka distti poddlint; aple sokti vortem boll korun to hat voir kaddunk sodi laglo tim taka distti poddlelea baxen, tankam nomoskar korunk ani vhodda sontosan, goddie-goddie mhunno, “Bavano, tumkam dista Ankvar Mori ani Bhagivont José,” “Tanchi mozot magcheak dimbi galum-ia.”Vhodda khotkotean orasanv kellea uprant aple pasun, tache bountonenk asle tanche pasun, ani thuim nasle tanche pasun, vhodda somandanan tannem jiu sandlo. Hem baghichem morn, zaka Ankvar Mori ani Ticho Ondovont Poti, Bhagivont José, ajir zalim, goddlem Dezembrache 11ver, 1828 vorsa.

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

 

XIV - CHOUDAVo Dis

Nial ani Magnnim

JESUCHO MOG BHAGIVONT JOSéK

 

(1) Iek modur (terno) mog.

(2) Iek udar (generoso) mog.

 

(1) POILO PONT– Bhagivont Josék gomtoch Moriêchea Putrachea Inkarnasanvacho Mister teach vogtar Devan Joséchea callzant petoilo iek vhodd mog Jesuk. Hem diso ki êke baxen Sasnnanchea Bapak Aplea Putracho mog asa tantlo thoddo bhou Bhagivont Patriarkachea callzant gatlo. Tea pasot Josécho mog vortoulonam soimbacho, punn soimba vorto mog, nirmoll ani modur, manancho ani nomoskarancho. Bhagivont Bernardino de Sena mhunntta, “Dev Ballok murgottalo, uloitalo, ani vengo mari tantun pettoitalo vhodd mog Joséchea callzant.” “Ah! kedo vhodd mog,” mhunntta Bhagivont Ligor, “Josék aslo nam zait Ballok Jesucho, Taka to aple vengent ghetalo ani aplea callzar dambtalo ternam;” Oi, dubavavin, amchean sotmandum-et ki José itlo, Moriêk kaddun, kuincheach Santan Jesucho mog korunk nam mhonn.

 

Christanv othmea, Moriêchea Potin Jesucho mog kelolo te baxen, tuvem tacho mog keloloi zalear, kitlo baguicho tum vortoutonaim, ani Bhagivont Francisco de Sales porim zo mhunno adlea êka bhagivonta baxen, “Mog korchem vo morchem”. Vo, Ars mhunntlolea gavanchea bhagivont Vigara baxen, zo mhunnttalo, “Amchea borvea Devan sukneank rochleant gaionam korcheak, ani tim gaionam kortat; Tannem munxeak rochlo Aplo mog korcheak ani munis Tacho mog korina.” Dulloba Jesu, dhi Saiba, mhaka hanvem Tuzo zaito mog korcheak zantum pettlelem Bhagivont Joséchem calliz, ani sonvsarantle kuinchech vostuchi mhaka as nasteli.

 

(2) DUSRO PONT– Amchea Dhoniacho Bhagivont Josék mog aslo to noich vortoulo khoro punn tech bori bhou udar mog, “Khoro mog,” mhunntta iek bhagivont, “gomta tacheam korneanim.” Ankvar Moriêk kaddun, khuim asa Sant zo Bhagivont José poros vodik vavurlo Tachea Onodak? Apostlanim Sumurt porgottli, Martirinim tika sopo marlo aplea rogtan, Igorje Matheche Dotor Tache pasot vavurle, cakutsar munxeanim Tacheam dublleank jeunk dilem; punn jem tannim zonn-eklean kelem Tache Mystico Cuddik (Igorjek), punn Bhagivont Josén kelem Tarokakuch. Taka dumaleantlo vattauncheak to oroneantleam akantank bhielo nam, ani Taka gheun Egyptant poullo! Tache pasot to Judea than Galilea ghelo, Herodicho kunnati rag chukounchea khatir; aplea kopala velean gam vavoun to vavurlo Taka jeunk diuncheak. Tachem soglem jivit Dev Munxeak Consagrar kelelem. Heai poros vodik tachean koru-etem vo anink konnam jinsim tachean dakoum eto aplo bhou vhodd mog Jesu thaim?

Niall, Christanv othmea, ki tum Jesucho khoro mog kortai zalear tuka khoxi asonk zai Tache pasot dogd bogchi ani tuka sakrifikar korchi Tache borobor ani Tache pasot.

“Zo konn mhojê pattlean etolo, tannem aplo visor dorunk zai, ani aplo khuris gheun Mhozo pattlau korunk zai.” (Sam Matêv VII:54); ani “Imitação de Christo” mhunntlolo livr amkam sangta ki mogachem jivit kedinch nam mhonn dogd nastanam, ani zaka dogd bogchi khoxi nam taka Khursar zoddlelea Devacho xins zaunk favonam.

 

Êh Dulloba Jesu, kitle zann Tuzo mog kortat apleanch khuxalkaeam pasot, punn kitle thodde asat Tujê pattlean etele Khursachem Morn poriant! Vhodde khoxen Tujê borobor te etit Tabor Dongrar, punn Tujê borobor Calvar Porvotar euncheak te rajinant!

MAGNNEM

Ogonit Bolleponanchea Jesu munxea-kullacho Tuvem itlo mog keloi ani tannem Tuzo mog korcheak, itlem keleim astanam koxem goddta zait ki Tuzo itlo thoddo mog korunk? Hanv punn hea onupkariam munxeantlo zaunchonam; mhaka khoxi Tuzo mog korcheak soglea mhojêa callzan than ani moro poriant. Dhi, Saiba, mhaka hi curpa Tujêa Poslelea Bapache, Bhagivont Josêche vinotin. Oxem Zanv.

 

EXEMPLO

Iek tornom munis zo soldad zaunk bhietalo, Fransache sumurti pormonem, tannem soldad zauncheo sorti kaddunk zai asleo.Sorti kaddchea officant vetanam to êka Copella sorxem raulo jem somorpilelem Bhagivont Josék ani aslem Laval mhunntlolea ganva laguim.

 

Bitor soron tannem dimbi gali ani Bhagivont Josék pacharun mhunntlem, “Tum zannoi Bhagivonta José, kitlo hanv bhietam to soldadachea jivitak, nhoi zuzacheam koxttam vo akantam pasun, punn soldadachea jivitachea khotteponam pasun. Maguir iek numbr Altarar dourun tannem mhunntlem, “ho numbr mhaka ailolo zai, pau mhaka.”

 

Sorti kaddchea officant pautoch, kaxin hat galchea adim Bhagivont Joséchi tannem novean mozot magli. Tachem magnnem aikolem, tannem maglolo toch numbr taka ailo jea vorvim tannem soldad zaunchem chuklem.

 

Tachem calliz vhodda sontosan ani upkharponan boron to portolo tea Bhagivont Joséchea Copelant taka argham diuncheak, tannem apnak ho vhodd upkhar melloun ghetlo dekhun.

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

 

XV - PONDRAVo Dis

Nial ani Magnnim

BHAGIVONT JOSé familichea jivitacho model

(1)Kitem vait korta tem familichea jivitant.

(2)Kitem bori dek dita tem familichea jivitant.

 

(1) POILO PONT– Aiz-kal motteantlem iek vhodd noxtt jem vosta familim modhem vortouta tanche modhem ekvott nam to. Zonn êklo aple sotecho zaunk sodta, jea vorvim veguim-veguim famili modhem ekvott asunk zai to pirder zata. Avoi-Bapoi favo te jinsim apli sotea choloinant; burgeank khoxi nam tanchem sanglelem aikoncheak, zonn êklo aple sotecho zaunk sodta, he vortoutat voddantle prestau famili modhem ekvott nam zauncheak.

Iek vhodde podvecho upai hem noxtt vattauncheak vortouta Devsosanv Bhagivont Josék, zo vortoulo Nazarethche Povitr Familicho Voddil ani Model. Niall hea kirtivont Patriarkak zachem dublem ghor vortouta tache vhoddik apurbaechem êke patxaiache palaci poros. Postolo-Bapui Dev-Ballokacho teach bori to zata Tacho mestir ani xikoun dinnar, to Taka sikoita aplo vaur, ani Taka dakoita koso aplo aspau hatant dorunk zai to, ani Jesu Tacho Bapui sikoita tem vhodde khuxen sikta.

To vortoulo tovoi ani tovoiacho Burgo, Faber et fabri filius, hea navan Taka vhodd onod bogtalo.

Avoi-Bapaino, tumcheam burgueam voir sotea cholounk Bhagivont José kodde sikat, ani tankam voir kaddat vaur korunk laun, jea vorvim tumchea matarponant tim zauncheak tumcho dhir ani adar. Ani tumim, burgeano, tumchea avoi-bapaichem aikat, tankam mann diat, ani sodanch tumchean zata toxem tankam pavat. Vhodik korun, thir borvonsean Deva laguim magat koslo bhes (estado) tumim gheunk favo to tumche motint ghal mhonn.

 

(2) DUSRO PONT– Familim modhem ekvott sambhallcheak goroz vortouta dorm formaita tea pormonem cholchi. Goddta thuinsor soglo gorabo exktaim zaun sokallchem ani sanjechem rozar korchem; kedinch chukoinastanam Aitar-Sontachem Mis aikunchem. Jesu, Mori ani José zaundi amcho model, kiteak bhasaileleam disanim tim sodanch Templant vetalint.

Hanvem zaite pautti polleleam, mhunntta iek bhagivont boropi, Bhagivont Joséchi dekol rakon heam team familinim zoim taka mann ditat ani tachi mozot magtat, zoxem, conversanvam, ojapanim bolaiki meulleli, ani anga boroun kabar koru nozo titlim sonvsarantlim bensanvam.

Tea pasot hea vhodda Santachi zaite pautti mozot magum-ia vhodda visvasan; kiteak, famili taka aplo rakhno korit zalear, tanche modhem vhodd ekvott vostolo.

 

MAGNNEM

Bhagivonta José, sonvsaracheam vostunim hanv misoll zatoch, mhojêa bhesache kaide sambhallcheak mhaka unno ugddas asta ani unni khoxi asta, mhaka curpa melloun ghê, Saiba, êksurea ani gorvostichea jivitacho hanvem mog korcheak. Mhojêa avoi-bapaicher besanv ghal, ani vhodik korun, besanv ghal mhojêa garar, tea vorvim tem zauncheak iek templo, zantun hanvem Devachi xeva-chakri korcheak ani mhojêa bhesache kaide sambhallcheak.Oxem Zanv.

 

EXEMPLO

Sokoili khobor distti poddon eta Veneravel Madre Maria de Incarnação ichea jivitant. Madame de la Paltrie, iek Francez ostori vhoddam segunanchi, tinem iek dis Missanvanchi khobor vachli jem Jesuche Sociedadicheam Padrinim diunk suru kelelem Canada mhunntlolea gavant. Hea Missanvanchi khobor tika bori lagli ani tika zali vhodd khuxi team Padrim sangata vavurcheak dubleam Canadianank converter korchea pasot. Kuinche bore ritin tankam pauchem tem tinnem chintchea adim, ti vhodda vaittant poddli zantun voizanchem sikop kiteakuch upkaronam zalem, je ti vanchchinam mhonn sozmolet. Madame de la Paltrik apleam vollvolleam modhem tichem borem tensanv visorlinam, ani Bhagivont Josék angounn korcheak Devan tiche motin ghalem, (Bhagivont Joséchea podvedar adara khal Jesuit padre vavurtale Canadachea lokak converter korcheak), ki ti bori zait zalear Canada gavant iek Convent bandin ani taka duddu dourin mhonn thuincheam duvank sikoun diuncheak. Hi angounn tinnem korinam fudde tichem magnnem aikolem. Vhodd fodda-fodd ani vollvolle bogtali te khinnam bitor nam zale, ani kaim pidda urlinam bogor thoddi osoktai. Dusrea disa voiz etoch to zobor ojap zalo tika bori zaleli polloun, ani noklo zaun hem koxem goddlem tem, tannem mhunntlem, “Madame, kitem zalem tujê fodda-foddichem; ti khuim gheli?”Mhojêa mogachea voiza”, tinnem anstea thondan portipau kelo, “mhaka dista ti Canada gheli.”

 

Maguir rokdich tinnem apli angounn farik keli, ani Canadacheam burgeank sikouncheak tinnem angoilolo to Convent bandlo, ani Madre Maria de Incarnação, jika favo zalem itli vakandcheak ani Devan tika nirmilli bhaileam Missanvank, tea Conventachi poili Vhoddil (Superiora) vortouli.

 

Êka vizanvant vo sopnant tika kollit kelem, ki Bhagivont José vortoulo mhonn Novea Sonvsaracho Patron, ani tache vinotin tika vinchun kaddli mhonn thuim othmeanchea salvasanva pasot vavurcheak. Novea Conventak tinnem nanv dilem, “Seminario de St. José” mhonn, ani Bhagivont Pariarkachi imaj tacho sopo (selo) kelo asun Bhagivont Joséchea hatant Ballok Jesu.

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

XVI - SOLLAVo Dis

Nial ani Magnnim

BHAGIVONT JOSé AMCHEA REKOLHIMENTACHO MODEL

(1) Deva ujir asta tem.

(2) Dhonia Jesu ujir asta tem.

 

(1) POILO PONT– Bhou augodd nhoi sotmandunk ki Bhagivont José sodanch chintalo mhonn apunn Deva ujir asam mhonn, ani hea pasot zaite pautti Sorginche rekad daddun Devan taka upkar kele. Arcanorum caelestium secretarius. Êke kherit baxen Inkarnasanvacho ani Soddvonecho Mister taka kollit kelo. Particepts mysteriorum. Zaite pautti Anjam laguim ulouncheak Devan taka bag diloli ani zaite pautti Devachem Bollepon ani Povitr Sarquem (Presença) taka dakoilelem, zachea ugddasan borlelem tachem calliz ani mot, ki dispotto vaur kortanam legun tacho ugddas monantlo vochona aslo. Sogleam vostunim ani sogleam suatanr tannem Devak pollelo, nomoskar kelo, ani Taka argham dilim. Sogleam tacheam vhoddam dogdam modhem, zanv Egyptant pollon vetanam ou aplo kottin vaur kortanam, to sodanch chintalo apun Deva ujir asa mhonn, jea vorvim curpechim dennim tannem xarti pailim, ani sogleam vostum thaim Devachi khuxi keli. Tea pasot Povitr Familichea Voddilak amchean laum-et tinch utram jim Genesis mhunntlolea pustokant distti podtat mhunntlolim poilea Josék: “Tache bori Dev aslo, ani tannem keleleo vostu, Devan folladik poddoseô keleo.”(GENESIS XXXIX:23).

Niall Christanv othmea, ki je konn apunn Deva ujir asanv mhonn sodanch chintat te kosleai bhesache munis zanv, tanche thaim vhodd sompurnaechi zhor vosta mhonn sodanch dison ailam: “Mhojê mukhar choll”, Devan mhunnttlem Abravank “ani sompurn za.” (GENESIS XVII: 1). Amim tor chintin ki Dev amkam polleta mhonn, To polleta mhonn sogleo amcheo korneo, sogleo amcheo konti ki To sorv vostunchem kont dovorta tem, ani êka otregachem, êke khoxechem legun, itlench puro amkam nirvon diuncheak ani amim kosloi sakrificio korcheak. Tea pasot Bhagivont Joséche mozotin Deva laguim magum-ia ki amim sodanch Tache ujir asanv mhonn chintisem, punn vodik korun rozar kortanam ani amcheo bhou vhoddleo korneo adartanam.

 

(2) DUSRO PONT– Bhagivont Josén sogleo korneo keleo noinch apunn Deva ujir asa mhonn chintun; punn Devuch Dhonia Jesuchea zonnant tache mukhar aslo mhonn chintun. Bhagivont João borobor tachean bore baxen mhunno-et: “Amim pollelo Tacho Onod, Devachea Êkleach Putracho Onod, borlolo curpen ani sotan.”(SAM JOãO I:14).

 

Ankvar Moriê pattlean, Bhagivont Josén, Jesuk poilo pollelo. Tis vorsam to Jesu borim jielo; Tache bori to êkach garant raulo; Taka vantto korun to aplem jevon jeulo, Taka tannem pollelo vaur kortanam ani magnnem kortanam, sogleam Tancheam korneantli tannem sikoun ekttaim keli, ani Tache dekin segunanim fudde sorlo, êka utran, Jesu bori to sodanch aslo. Nid legun tacho ho ekvott pirder korinasli, kiteak, mhunntta iek bhagivont boropi, zorui tache dolle danklele astale tachem calliz zoton kortalem; zor tor thoddo vogot Sorvonddar kuddi soit tacheam dolleam mukhar nastalo, Tachi imaz sodanch asli tache motint ani callzant. Tea pasot ojap nhoi ki amcho bhagivont Patron sodanch Deva mukhar ason to veguim-veguim sompurnaen vaddlo, ki soglleam rochneanchea santiponam voir soron, Jesu ani Moriê pattlean to Sorginchea moubar zogzoglo êka bhou vhodda neketra porim: Dhoni Jesu 30 vorsam José bori aslo tem vortoulo tacho sontos.

Ah! Christanv othmea, tuvem toch sontos tuzoi korueta; kiteak amche modhem Jesu asa Santisim Sacramentant, ani disachem kuincheai vellar tujêan Taka visit korueta ani Tache kodde uloum eta. Punn amim tem kortanv zait? Ah! amcho bhavart gott korum-ia ani amchea Dev Sorvonddarak zaite pautti visit korum-ia.

 

To asa Sagradint zoxo To aslo sonvsarant jietalo ternam patkeancho rig, nitivontancho ixtt, dukestancho buzvonddar, othmeancho Sorvonddar.

 

 

MAGNNEM

Bhagivonta José, tujê baxen hanv Deva ujir asam mhonn ugddas dorun jieunk otregtam, ani vodik korun Dhonia Jesu ujir Santisim Sacramentant, hanv nicheu kortam Taka zaite pautti visit korcheak Tachea mogachea Sacramentant. Oxem Zanv.

 

 

EXEMPLO

“Carmelitas Reformados”, mhunnttlele Ordiche historint boroilea hi sokla dilea ti khobor ji goddleli tech Ordichea João Evangelista mhunntlolea Padrik, ani ji dakoita Bhagivont Josécho otreg ani mog tachem Devosanv korteleank pauncheak.

 

“Hanv ani Padre Inkarnação, zo Granada gauncheam Bhagivont Martirinchea Conventacho prokurador aslo, Pilastro del Toro thuinchea Carmelit Madrinchea Conventantle bhair sorleanv, vatter amkam iek utar piraecho munis meullo; to distalo gunest ani manadik, ani tannem kallem neson gatlelem.

 

To amche modhem ailo ani amim kuim than aileanv ghai mhonn vicharlem. Mhojêa sangatean sanglem ki amim nigtech Deskalso Carmelit Madrinchea Conventantle bhair sorleanv mhonn.“Padre”, mhunntlem tea porkea munxean, “tujêan mhaka sango-et kitea pasot tumchi Ord Bhagivont Joséchem itlem Devosanv korta ti?”

 

Tea motvachean hem respost dilem “Kiteak amchi Bhagivont Madre Teresa de Jesus tea Onodvont Santak vhodd mann ditali, zannem ojapanim tika modoth dili dekhun zaite Convent bandunk, ani tika zaiteo eri kerit curpa melloun ghetleo dekhun, ki tacho upkar attouncheak tinnem bandlele tantle zaite Convent tache mannak somorpille.” “Hanv tem zannom,” mhunntlem tea porkea munxean. Mhaka polle, ani tiche deki vorvim taka mann diunk sik jitlo tinnem taka dilo. Kiteim poi tum tache vinotin magxi tem tuka meltelem.” Hem sanglea uprant to nanch zalo ani patti vollon pollelear amkam konunnch distti poddlonam.

 

Amchea Conventant porton, zoim bhagivont Padre João da Cruz prior aslo, taka amim kitem goddlelem tem sanglem.” “To porko munis,” mhunnttlem Prioran, “vortoulo konn nhoi bogor Bhagivont José, to distti poddlo vodik mhojê pasot tumche poros, kiteak hea vhodda Santak hanvem mann dilo nam jitlo taka hanvem diunk favo aslo; punn tumkam tannem upkhar kela tacho foll kaddcheak hanv vavurtolom.” Hem goddlem 1584 vorsa.

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

 

Ratcheam Attam Orancher IGROZECHI Ghantt VAZTTA

Mhunn: 1 Amchea Bapa ani 1 Noman Moriê Purgotorintleam otmeank, mhunnun uprant: Dhonia, dhi tankam sasnnanchi sovostai ani sasnnancho uzvadd tankam porzollum. Sovostaien te assum. AMEN.

 

XVII - SOTRAVo Dis

Nial ani Magnnim

BHAGIVONT JOSé, OBEDIENSACHO MODEL

(1) Sogleam vostunim Obediens.

(2) Rokdem Obediens.

 

(1) POILO PONT– “Êkuch Obediens”, mhunntta Bhagivont Augustinho, “sogleam segunam poros vhodik moladik vortouta.” Plus valet quam omnes virtutes, ani Deva mukhar tem sakrifisa poros vortem vortouta. Bhagivnot Josén ho segun adarlo soglea tachea jivitant Povitr Pustok amkam sangta ki Josén aikolem mhonn sonvsaracheam patxaianchem; kiteak Cezar patxiache ukumek pallo diuncheak Moriêk tache Potinik gheun to Beleant ghelo thuim nanv borouncheak. Josén Anjanchem aikolem Moriê sorsilo apunn kusin sorchem ou nam ghai mhonn, to dubautalo, ternam, taka Anjan sanglem thuim rau mhonn, ani to raulo, Josén Devachem aikolem. Sumurtin formailam titleim tannem kelam tea-tea tempar, te te baxen, ani te te suater. Vorsak tin pautti Jerusaleak to Porbek vetalo Sumurtin basailele titleam disanim Ballok Jesuk Circumcisar korunk velo, ani Moriê sangata Taka Templant bhettoilo. Bhagivont Joséchem obediens vortoulem purem ani sogleam vostum thaim, “Kitleam ojapanchem” mhunntta Bhagivont Francisco de Sales, “vortoulem amchea Bhagivont Patriarkachem obediens! Polle koxo to khalto zatalo dor êka Devacheam ukumank.”

Êh! Christanv othmea, tujêm obediens, tea tujêa Onodvont Modela porim, purem vortouta zait? Devache ani Igorje Matheche upordes tum sambhalltai zait, tantlo êkui chukoinastanam ani sarke korun; Asonam kuinchoi upordes zo tum sambhallinam? Santiago mhunntta, “iek munis sogle upordes sambhallit zalear kaddun êkuch upordes, to sogleam upordesancher guneanvkari zata.” (SANTIAGO 11:10). Bhagivont José, bhagicho vortouta to munis zo tuji dekh ghenv, Devacheam pordesam pormonem cholta tujê baxen, tantum taka dadosponachi zhor melteli. Qui custodat legem beator est.

 

(2) DUSRO PONT– Dusre suater Bhagivont Josén sanglelem aikolem ravonastana vo vogot farainastanam. Ani tachem obediens niallin zalear tachea jivitacheam vhoddam khontim ani dogdam modhem amkam gomtelem ki tannem sanglelem aikolem udarponan ravonastanam, ani murmurar korinastanam. Iek zanar boropi tachea othmeak sor korta êka koddoilolea bangarak vo rupeak jem Dev taka rup diunk khoxi vorta tem to gheunk toiar asta. Augusto Patxaiache ukumek pallo diuncheak tannem aplo vaur Nazareth dourun bhair sorchem poddtoch, iek lamb vatt cholunk, pausantlean ani invantlean, tannem iloi vogot lainastana, punn Moriêk gheun rokddoch bhair sorlo. Herodichea kinvantlo Ballok Jesuk vattaunchea pasot Anjan taka sangtoch, “utt ani Ballokak ani Tache Avoik ghê ani Egyptant poll,” tannem vogot kello zait? Nam, dis udeunchea adim, to uttlo ani kainch toiari korinastanam Eyptant poullo. Herod Patxai melo mhonn, ani Povitr Familik gheun Israel gavant porot mhonn taka Anjan sangtoch to raji zalonam zait? Zalo, to uttlo ani Tache Avoik gheun bhair sorlo, zorui Herodichea nisttur putrachi Archelausachi taka bhirant asli. Dusre munis kitleo addkoli addinant? Punn Bhagivont José toxem korinam tannem Anjam baxen sanglolem aikolem êkui goddi pirder korinastanam, khuxen ani suddsuraen. To itloch zabab ditalo: “Dhonia, polle hanv toiar asam.”

Christanv othmea, monant dor ki sanglelem aikonc patti fudde sortat tem inkar (resistir) kelelea porim zata. Sanglelem aikonk tancta titlem patti dourunk ani tem aikonam zaunk zaitim razavam adim addtat hem khuxechem obediens vortounam, punn iek obediensachi korni bollan keloli, hem vortouta baulelea fula porim zachi suropai ani pormoll pirder zala. Osoli korni koxe baxen Devak mandot?

MAGNNEM

Mhojêa Mogalla ani Bhagivonta Rakhnnea soumpurn obediensachea purea modela, mhaka curpa magon ghê hea moladik segunacho adau ani goroz hanvem sozmoncheak, Jesuchea moga passun hanvem sanglelem aikoncheak ravonastanam ani sontosan zoxem tuvem aikoleim, mhaka-i xikoi.Oxem Zanv.

 

EXEMPLO

Padri José Lambillotte, iok vhodd musg, Luis ani Francis tacheam dogaim bavam baxen, noich muzgaponant to vhodd vortoulo punn burgeank sikounchea kamantui to bhou uxar aslo. Ho boro Padri aplea nanvachea Santachem, Bhagivont Joséchem vhodd Devosanv kori. Bori bolaiki nam zaun tannem iscol sikounchem sandchem poddlem, ani tachea jivitachim nimannim tin vorsam taka kevad zaun to Acheul mhunntlolea gavant raulo. Ho pidden astanam matxem borem dislelea vellar tannem iek “Buzvonddar” mhonn livro boroilo, zo zaiteam zonnank vhodda faideak poddlo. 1842 vorsa, Marsachea muinneant tachi pidda zodd zali jea vorvim to morot mhonn sogott bhiele.‘Padre Lambillotte pasun, zaitim magnnim korum-ia’ mhunnttlem Noviciadachea Mestirin, kiteak to vhodd perigant asa; torui mhaka to morot so disonam, kiteak to livro boroita to kobar zaunchea adim apnak moronk dium naka mhonn tannem Bhagivont José kode maglam.

 

Thoddeam disanim to Padri matso boro zalo, ani to sangta tem borounk taka iek novis dilo. Iek dis aplo livr toiar zalo mhonn tannem sanglem; to muinno vortoulo Agostacho, ani teach muinneache 12ver, xapteleachea hatant nimannim paznam dilim, ani 14ver tea borea Padrin jiu sandlo. To dis vortoulo Assumptichi Vigil, ani sogott sozmole ki dusrea disa Sorga Rajant to nialltolo mhonn tachea Podveddar Advogadache Khot Naslele Potinik.

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

XVIII - OTRAVo Dis

Nial ani Magnnim

BHAGIVONT JOSé ANKVARPONACHEA, NIKLAMKPONNANCHO mO

 

(1) Niklamkponnanchi Supurnai.

(2) Niklamponnanchi Muzri.

 

(1) POILO PONT– Sogle rochnem poros Mori vortouta nirmoll, ani Tiche pattlean sogleam munxeam poros Bhagivont José vortouta nirmoll. Tachem nanv Anjanche Ranniêchea nanva baxen, dekol korta ankvarponn. Bhagivont Thomas sangta tea pormonem, Bhagivont Josék Devan curpa dileleo to zolmonchea adim, jea vorvim patkacheo vhoddneo tache thaim nam keleo ani êka Anja baxen taka kelo, zorui munxeachea soimban aslolo. Bhagivont Jeronimo ani zaite Igorje Matheche Padri sozmotat ki Bhagivont Josén lanponinch Ankvar Moriê baxen, angounn keleli mhonn apunn ankvar rautolom mhonn, ani jernam taka Moriêchea ankvarponancho sambhall ani Rakhno kelo, konnam baxen tachem nirmollponn vaddonastanam rautem! Khot Nasleli Ranni vortouli niticho porzollit arso zachim kirnam Tichea nirmoll poticher poddtalim . “To Anja baxen vortoulo ani sogleam vostunim ankvar”, mhunntta Santa Teresa, “ani tea pasot Sorgache gutt ugddape korunk taka Anj dadle.”Sogleam segunam poros nirmollponn vortouta bhou sobit, kiteak tem munxeank voir kaddta ani Anjam sarke korta, vo êke baxen mhunno-et ki tem munxeachem soimb Anjam vortem korta, kiteak Anj noklot kuddicheo vhoddneo vo visoveancheo  fottouneo; dusre vatten nirmollponn Anjanchem jivit jiexem korta, amche kuddicheo patki khoxeo ani oskotaeo astanam. “Nitoll callzache munis vortoutat bhagivont”, (SAM MATÊV V: 8). Bhagivont José, ho Anjancho segun mhaka melloun ghê, ani sorv jem taka addkol galta tem mhojê sorxilem pois kôr. To segun sambhallcheak hanv zoton kortolom, magnnem kortolom ani tujêm Devosanv kortolom.

(2) DUSRO PONT– Bhagivont Joséchea ankvarponachi muzri vortouli bhou ojapanchi. Sogleam munxeam poros to nirmoll vortoulo dekhun taka Moriêcho Poti zauncheak favo zalem; “kiteak” mhunntta Bhagivont Geronimo, “Dhonia Jesuchea morna uprant tor Ankvar Moriêk êka ankvar disciplache adin keli, kitlo vhodd prestau naslo zait êka ankvar potiche tika adin korcheak? Bosuet mhunntta, “tanchem kazar anink khaim zanv nozo bogor don ankvar callzancho ekvott, ternam ani sodankal ankvar tanchea niklonkponnan.” Bhagivont Joséchi muzri itlich nhoi; amchea Dev Dhoniak Poslolo Bapui zauncheak taka vinchun kaddlo tachea ankvarponank lagon. Oi, Jesu zacho sontos vortouta zaiam (lirio) modhem ascheak, Tannem khuxi veli Bhagivont Patriarchak aplo Bapui mhonn pacharcheak, tacheam hatancher somandan zauncheak, ani Aplea jivitachim tis vorsam he sobit zaeche saulle talla sarcheak. Pascitur inter lilia. Sadenv vortoulem Bhagivont Joséchem ankvarponn, zannem Sasnnanchea Bapachea Putrak mhunnonk dilem, “Tum vortoutai mhozo Putr,” ani Devache Maiêk tum vortoutai mhoji Potin. Virginitate placuit.

Christanv othmea, Bhagivont Joséchi dekh gheun tum nirmollponn sambhallxi zalear, Jesu ani Mori tuka upkhar kortelim zoxe tannim taka kele. Povitr Pustok (Cantaranchem Cantar) niklonkponnachea othmeak pacharta mhunnon Devachea Putrachi Boin, ixtt, Potin; Dev khuxal zata tiche gozalin ani tichea talleacho sad aikon, Devak khuxi ti Aple borobor asleli ani tika To dovorta kerit mukutt Sorga Rajant.

Ho Povitr segun amchem munxeachem soimb Anjachea soimba porim korta, jivontponnam (resurreissau) adim legun, tannem kuddi voir zoit voron hi Anja porim zata, Angelica caro ani hea sonvsarant legun ho segun vortouta amchea vhoddponachi bunhad; Ah! kitle bhagivont ani sobit vortoutat nirmoll othme!

 

MAGNNEM

Êh! Bhagivonta José, atam hanv sozmotam kiteak dakoila (representar) to asun tujêa hatant iek lirio; hem dovem ful tujê moddonozo tosole nirmollaechi khunna vortouta. Hi nirmoll lirio ji ankvarponacho pormoll dita, mhaka tenkoi ani mhojêa callzant Devacho mog pettolo, ani hea sonvsarant tujêa callzachea bhagivontponnachi dekh ghetlea uprant, sorv nirmollkaechea Devak hanv bogunk pautolom tujêa borobor Sorgar sasnnanchea sasnnank. Oxem Zanv.

EXEMPLO

Iek gunest burgo aplea Vigara laguim sikonk vetalo Padri zauncheak. Devache chakrent ani othmeanchea salvasanva pasun aplem jivit sarcheak, taka vhodd khuxi asli, punn Latin sikcheak taka zobor augodd lagtalem, jea vorvim tachea mestirik taka sikounchem soddlear boremxem dislem. Oxem astanam, to burgo vhodik vhodik vauro laglo ani taka anink temp dilo sikcheak. Iek dis, tea matarea Vigaran taka mhunnttlem, “Mhojêa borea burgea, tuvem he augoddaentlo suttcheak mhaka êkuch upai asa so dista ani to vortouta tuvem Bhagivont Joséchea alaxirea khal tuka dourunk zai, ani taka tuvem poratunk zai, tannem tuka bori mot melloun gheuncheak; nam zalear tum kedinch sikchonaim. Iê, ilem nirvon ghê; tujêa sangata hanv magnnem kortolom, ani amchim magnnim to aikotolo mhonn mhaka vhodd borvonso asa; kiteak tambonastanam magnnem kelear soglem melloun gheum eta.

 

Tea burgean Vigarachi budh aikon vhodda khot-khotean magnnem kelem ani to upkhar mago to taka meullo, mat-mat tachi mot ugtti zalelea porim disolagli ani tachem ghinean ojapanim fankaron aplea sikpan to boro sair zalo, ani Seminarint sikonk ghelo, ani thuim tannem dakoile nhoich aple vorte segun punn bori mot porian; ani thuim tannem premio velea uprant taka Padri kelo.

 

Maguirleam vorsanim poilo taka Moral ani Teologia mhunnttat tacho Professor nemlo ani xekim taka Vigar-Geral kelo, ji suat (officio) tannem zaitim vorsam choloili, dakoun apunn vortoulo mhonn xanno ani uxear Director Padrincho.

 

Punn êke vostuk to bhou kollit aslo ani ti vortouli, tacho mer naslolo visvas Bhagivont José thaim ani tachem upkarponn aplea udar protectorak.

 

He dekhi vorvim sikum-ia êka nenttuvaechea ani tambonastanam kelelea magnneachi podvi Deva mukhar kedi vhodd vortouta ti, jernam tem amim Taka korin Moriêchea Bhagivont Potiche vinotin.

 

 

 

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

XIX - EKNNISVo Dis

Nial ani Magnnim

BHAGIVONT JOSéCHEM FEST

(1) Tannem diunk favo Sontos.

(2) Tannem diunk favo Visvas.

 

(1) POILO PONT– 1870 voros poriant Bhagivont Joséchem Fest Apostlancheam festam baxen korit mhunnghe dusre classintlem fest, ternam Pio IX Papa Saiban Bhagivont Patriarchak sogle Igorjecho Patron mhonn titl dilo ani tachem Fest poile classichem kelem zoxim amchea Dhoniachim ani Ankvar Moriêchim voddam festam kortat. Dhonia Jesuschea Vigaran, Povitr Familichea Voddilak ho mann dilo dekhun khuxal zanv-ia.

 

Êka bapaik voddponn ani mann melta to tacheam burgeankui lagta ani zata iek soeg tannim khuxal zauncheak, tea pasot, hea fudhem Marçachi 19vi tarik amkam Bhagivont Josécheam devotank vortouteli vhodd apurbaechi, ho vortouta dis zo Dhonian kela Haec dies quam fecit Dominus.

 

Êh! Santa Teresa tum ji Bhagivont Joséchem itlem Devosanv kori ani eranim tujê baxen tachem Devosanv kelea puro mhonn axetali, atam khuxal borit za, tujê otreg xarti pauncheak suru zaleat. Amchea Dhoniacho mog korta tachea calzant sista Bhagivont Josécho mog, sogle Catholic Bhagivont Josék porkontat ani cruttanim munis Anjeancheam Corak aple ekvott korunk hea sonvsarant tachi porob kortat.

Christanv othmea, hea vhodda Festachea disa sonvsaracheam zounzalantlo meklo za ani Povitr Famili bori, bhagivont porim jie zoim sogot Devachea mogacho suskar soddta. He vhodd Porbechea disa tuvem niallunk favo noich Bhagivont Joséchea jivitacho êkuch segun, bogor tacheam sogleam segunancho ugddas kôr ani Devak argham di tuka dilo dekhun oslo mogall Bapui, oslo podveddar rakhno ani oslo supurn model.

Eh! Dhonia, sogli rochnam tuka argham dium, sorv jem Bhagivont Josék Tuvem kelaim tache pasot.

 

(2) DUSRO PONT–Punn amchim callzam sontosanunch boronk favonoim, tech porim, amkam vhodd visvas asunk favo; kiteak Bhagivont Joséchea alaxirear tor amchean patieum eta kuincheai era disa, kitlem vhodik amim tache lagchem ghenam zain hea khuxechea disa, jernam sogli Igorz tacheam paiam laguim sorpott poddleli to polleta, ani jea disa Devacho Putr Apleak Poslelea Bapachea hatant dita Aplim vhoddam dennim amkam diuncheak? Porjecheam vhodde khoxechea disanim sonvsarache patxai tor vhodd upkhar kortat, kosolo upkhar amkam korinam zait Santam bhitorlo vhodd Kakutsar Sant, Bhagivont José, Jesuk Poslolo Bapui, Moriêcho Poti, amche Igorjecho Rakhnar, José zaka Devan Apnench nemla amcheam gorzank pauncheak?

 

Bhagivont Teresa kitem mhunntta ti aikum-ia: “zaitim vorsam Bhagivont Joséchea Festa dis hanvem tache laguim kosloi upkar maglolo to mhaka mellonastanam urla mhonn mhaka ugddas nam; ani mhojêa magneant kiteim vaitt vo vankdem aslem zait zalear tannem tem sarkem kelem mhojêa boreak. Bhagivont Josék  visvasan pachartat ani tachi porob kortat team munxeank tech porim goddtelem.”

 

Tea pasot, Moriêchea Poti kodde vhodda visvasan vochum-ia amkam goroz teo vostu, othmeacheo ani kuddicheo magonk. Tache kodde magum-ia, pau mhonn amcheam familink, amkam borem korteleank, amcheam ixttank ani amcheam soireank, jiveank ani meleleank, Papa Saibak ani Igorje Mathek borem kôr mhonn magum-ia, ani vodik korun melloun ghê mhonn amkam êk borem morn, ani ho bhou vhodd upkhar magcheak kuincho dis amkam boro mellot hea disa poros, jernam sogli Igroz ugddas korta te goddiecho zantum Bhagivont José, bhagivont morn moron sasnnant bitor sorlo, jernam ti porob korta hea disachi zo tachea onodachea jivitacho oromb vortoulo, favo zalelem pag tacheam segunanchem.

 

MAGNNEM

Onodvonta Bhagivonta, aiz Igroz Matha tuji porob korta ani Sorga Rajant tuka porkondtat, hanv vhodda khotkhotean mhozo ekvott kortam hea dobajachea Hozannak zo tujêa manank gaian kantar kortat. Tujêam chakrank hea khoxechea disa tum kosolich vost dinastanam rauchonaim dekhun, goroz teo sogleo curpa mhaka melloun ghê hanv tuka pratitam, punn vhodik korun mhaka melloun ghê ti mol korunk nozo tosoli curpa Jesucho ani Moriêcho hanvem mog korcheak, zoso tuvem tancho mog keloi, ani tanchea gopant morcheak.

 

EXEMPLO

1854 vorsachea Corezmant, Jesuche Sociedadicho iek Padri, Vire mhunntlolea gavant (França) ailo Missanv pregar korcheak, punn, adim kollonasleleam kamank lagon, tache sangati dusre teg Padri hem Missanv diunche asle tankam eunk zainam zalem. Vire gavant, 10 hozar lok aslo ani thuim Missanv dilear bhou folladik zait mhonn zaito borvonso aslo, punn hem koxem korchem? Hea kamank iek Padri pavonaslo. Tea Padrin apleam voddilank boroun mozot magli, punn tem kiteak upkarlenam; taka mozot diunk konankuch tankonaslem.

 

Bhagivont Joséchem Fest laguim aslem, ani tea festachea vespera dis, aplem meditasanv korunk aitomon kortanam Santa Teresichim taka him utram meullim, “Bhagivont José kodde hanvem kiteim maglelem ani tem mhaka mellonastanam urlam mhonn mhaka ugddas nam, ani zaite pautti tachea Festa dis hanvem especial curpa magleat ani to mhojêm kernanch aikonastanam ravonk nam.” Dusrea disa aplem meditasanv kortoch, tannem tin chitti boroileo, ani teo Padre Vigara kodde diun mhunntlem: “Amim Missanv diteleanv; heo assat tin chitti jeo hanv Bhagivont Joséchea alaxirea khall dovortam, hanvem tache kodde Missionar magleat ani to amkam pautolo. Santa Teresa sangta hea vhodda Santachea festa dis tache koddem tinnem maglam tem tika mellonastanam uronk nam mhonn.”

 

Vire gauncho Padri ani lok zorui bhou axelolo êka Missavank, atam tannem borvonso soddlo ani mhunntlem tea Padrik.“Sorg ani sonvsar tuvem portiloi kiteakuch upkaronastanam; torui tuka borvonso asa? Sorgavelam sogleam Santanim tujêm aikolenam ani Bhagivont José tujêm aikotolo xem tuka dista ani taka khoxi thuim daddcheak tache laguim Missionar asat? ”

 

Dubavavin hem goddcheak bhou sonkest aslem, punn Devak khoxi zali Bhagivont Josécho onod vaddouncheak ani dakouncheak kitlem podveddar vortouta tem tachem magnnem. Thodde dis bolandtoch, Belgika than auchituch iek Padri ailo; dusrea disa Anguer than anink dog Jesuit Padri aile.

 

Êke chitin iek Padri addlo; antlea êkan Bhagivont José kodde kitem korchem tem maglea bogor bhou vhodd vaur aslo to dourunk eujilenam. Ho vhodd upkhar kollit zalea uprant, Missanvache sermanv aikonk zaito lok eunk laglo ani tancho zaito foll kaddlo.

 

 

 

 

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

 

Tallnni Pois Korunk Magnnem

Êh Deva, Tum Zo noxtteank borea rostear addtai, ani Zaka naka êk patki aplea patkant melolo, lhanvikaen Tuca Saiba prarthitam, Sorginchea adaran ani êk-sarke mozotin, Tujê Cakuticher  visvasteleam chakranchi rakhoun kôr; tannim sodanch Tuji chakri korunk, Tujê sorxile koslech tallnne vorvim te kuxin soronam zauncheak. Christa amchea Dhonia vorvim. OXEM ZANV.

XX - VISVo Dis

Nial ani Magnnim

BHAGIVONT JOSé ROZARACHO MODEL

(1) Magnnem Vokal (tondan-mhunnchem).

(2) Magnnem Mental (niall).

 

(1) POILO PONT– Vokal magnneacho Bhagivont José vortoulo sompurn model; kiteak tachi goroz ani adau to zanno aslo. Tea pasot, amchean sompeponim sotmandum-et ki vokal magnnim korun tannem bhagivont kele aple dis, apleo korneo, ani apleo viagi ani tannem magnnem kelem vhodda Devosanvan ani Anjachea khotkotean.

 

Christanv othmea, tujêa Dev Mestirichea upordesak pallo di ani sodankal magnnem kôr. Tankta zalear gorantlea lokak ekttaim korun rozar kôr, ani disapottim he jinsim rozar korunk tuka tankonam zait zalear ratchem rozar punn kôr; kiteak vhodda adavachi vortouta hi bhagivont sovoim. Soglo gorabo ratcho ekttaim zaun rozar korta tacho ugddas burgeanchea monant urta ani to kernanch vochona ani he jinsim rozar korit team avoi-bapaincher besanv poddlam. Amchea Dhonian mhunnttlam: “Mhojêa Nanvan dog vo teg ekttaim zalele astat tanche modhem Hanv astolom; ani te magtat tem tankam ditolo Mhozo Bap Zo Sorgar asa.” (SAM MATÊV XVIII:19,20). Kitle buzvonninchi vortoutam zait hi basaunni?

 

Êh Jesu, êh José, koxem magnnem korchem tem amkam sikoiat.

 

(2) DUSRO PONT– Bhagivont Josék bore baxen pachartat mhunnon magnnem mental korteleam othmeancho Bapui ani Model. Bhagivont Bernadino de Sena mhunntta ki tannem rozarachem dennem ghetlem bhou vhodda gravar. Fuit altissimus in comtemplatione. Santa Teresa sangta apnem sodanch pollelam mhonn ki Bhagivont José kodde visvasan magtale te magnnem mentalan veguim fudde sorleat mhonn, ani Igorz Math taka pacharta mhunnon Niallacho Mistir. Bhagivont Joséchem calliz Devachea mogan attlelem dekhun tachem jivit êk sarkem magnnem vortoule, ani tacho othmo segunanim dispotto vaddtalo dekhun sannanchea Jivitak taka bhou vhodd foll meullo.

 

Christanv othmea, dispottem meditasanv korcheak nicheuv kôr, ilo thoddo vogot punn; kiteak salvasanv zodcheak ho bhou podveddar upai vortouta. “Mhaka bhas di,” mhunntta Bhagivont Teresa, “dispotem iek 15 minut punn meditasanv kortam mhonn, ani Dhoniachea Navan hanv tuka Sorg basaitam.” Ere vatten meditasanv korinant tankam, Infernant voddun vorcheak deuncharanchi goroz nasteli, te aponnuch apnank thuim voddun vortat. Dev Spirit Sant mhunntta: “Ibaddan soglea sonvsaracho kela ibadd, kiteak konn iek nam dekhun callzant than nialltolo.”(Jeremias XII, 11). Bhagivonta José, tujêa magnneanchea mogacho ani visvasponnancho hanvem pattlau korcheak mhaka curpa magon ghê tem kortanam.

 

 

MAGNNEM

Bhagivonta José, Nazareth tuvem Jesu ani Moriê sangata magnnem bhettoileleim taka hanvem mhozo ekvott korcheak mhaka nirmi. Dhi Saiba, mhaka hanvem tujê baxen rozar korcheak bhavartan, nenttuvaen ani kedinch tem dourina zauncheak. Nirmi hanvem magnnem korcheak ekvott korun Jesuchea ani Moriêchea magnneank. Oxem Zanv.

 

EXEMPLO

Lyon xharant, Bhagivont Elizabetichea Conventant Margarida Rigaud mhunntleli madre buim poddon tika sintid nam zalo, ani rogot vanvo laglem tichea tonddantlean, nakantlean ani kanantlean.Voddam voktam korun ani bhou vhodd cuidad gheun ticho jiu sambhaullo, punn rogot vochon tichi tokli itli oskoth zaleli ki tichean ti uxeak tenkounk nozo asli, ani tichi mot pirder zaun tichean kainch korunk nozo aslem.

 

Voizani porikxea kelea uprant tika bori korcheak tankam anink upai nam so diso laglo bogor operasanv kelear matr ti bori zaitxi dislem. Hem aikon tika vhodd doko boslo, tea pasot operasanv korunk voizanim ile dis fudde velem.

 

Itlea mhunnosor tanchea Conventachea voddilin êk sompo ani boro upai korun pollounk eujilem, ani sogleo madri ekttaim zaun Bhagivont Joséchea mannak Comunhanvanchem Noven korchem mhonn formailem. Tichi fodafodd kainch unnim zalinam, ani xekim Novenam kobar zaunchea sumarak thoddeo madri, Bhagivont José vorvim ho upkar melcho nam mhonn sozmon, Bhagivont Anselma kodde maglear borem mhonn sozmoleo zacho adar teo sodanch maggot kitench vait goddtoch.

 

Punn tantli iek madre Bhagivont Josécho vhodd mog ani Devosanv kori ti vodik vodik mago lagli, ani te madrik bori kôr mhonn taka poratum lagli, mhunnon ki to hi milagre era Santak korunk dit zalear tem tachea mannank zoktem nhoi mhonn, zo vaddouncheak tim itlim axetat, ani angounn keli ki ti madre bori zait zalear ti apunnunch noven korit mhonn mortificasanvachem, ani Devosanvachem, ani argham attounchem.

 

Hi bhagivont madre tambonastanam rozar korit astanam auchituch ti vaittakan sarki bori zali. Hea vogtar ti êklich asli, ani veguim veguim neson ti Conventant danvo lagli mhunnon vhodda sontosan, “iek milagr, iek milagr, Bhagivont Josén mhaka bori keli.”

 

Tea fudde kitem goddlem tantum sarkem gomlem ti khorich bori zali mhonn teach disa eram madrinchea sangata tinnem Officio mhunntlo, zorui hea adim tanchea talleacho poisilo sad legun tichean sosunk nozo aslo, tech jinsim ti aplo sodancho vaur korunk lagli vhodd nirvonnan, jea pasun sogott ojap zale.

 

Êka utran Bhagivont Josén tika noich bolaiki melloun ghetli punn zaite her upkar jea vorvim ti segunanim vaddli.

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

 

 

Dhonia  Amchea

Adharak  Pav

Dhonia Jesu tufanak lagon, hoddear astanam Apostl ghaborlele tedna, tankam Tuvem adhar diloi, toxench amkam-i amcheam dukhim-khotimnim, Tujo adhar favo kôr. Amcho visvas amim Tujêr thevtanv.

 

 

XXI - EKVISVo Dis

Nial ani Magnnim

BHAGIVONT JOSé DULBOLLKAECHO MODEL

(1)Tannem bogli dulbollkaechi sogli koddsan.

(2)Tannem ruch polleli sogleam       consolasanvanchi.

 

(1) POILO PONT– Zorui Bhagivont José Judeacheam Patxaianche kullicho vortoulo, tachi famil dubli zaleli. Bosuet sangta tea pormonem, tache sogle upau vortoule tache hat ani vaura bhair dusro upai taka naslo. Aplem udarposon korcheak to tovoiacho dondo sinklo. Moriê kodde tacho ekvott korun tachi goth kaim sudarlinam, kiteak tichei purvoz duble zalele.

Nazarethachea lanam garant sogleo vostu dublokai porgott korit; bhou thoddi gorvostichi mustaiki asli ti vortouli khalti ani unnea molachi. Jesu zolmolea uprant Joséchi dublokai vaddli. Bosuet sangta te dublokaechi khobor heam utranim, “José  ani Mori dublim aslim, punn garacho asro tankam falt zalo nam. Punn Dev-Ballok sonvsarant etoch tanche dublokaek lagon, tankam êkui ghor mellonam zalem ani tannim êka gorvanchea gottean vechem poddlem.”

Bhagivont Joséchi dublokai dubavavin vortouli bhou vhodd mhunntta Bhagivont Francisco de Sales zaite pautti jeunna-khannacheo vostu legun nam zataleo tache familiche sambhall korcheak ani hem vortoulem êk vhodd dukh tachea bapaichea callzak. Oxem astanam to mogan khalto zalo he nisttur dublokaek, ji thoddea tempachi vortoulinam bogor soglea tachea jivitachi. Munxea, Devan tor tuka sonvsarachi guireskai diunk nam, buzvon ghê, To tuji apurbai korta Apleam mogacheanchi apurbai korta te baxen, zoxe porim Tannem Bhagivont Joséchi apurbai keli, zo votoulo tacho represetante hea sonvsarant, zoxe porim Jesuk Tacheach Putrak Tannem tratar kelo. Borem noxib nam mhonn tuka murmurasanv korchi talni etoch niallan bitor sor Beleachea gotteant, ani Nazarethachea garant, ani he dublokaechi dekh gheun, mhunn tujê bitor, Jesu, Moriê ani José poros mhaka vodik boreo vostu favot?

 

(2) DUSRO PONT– Jesun apnench dublokaek veng marun, ghireskaecho vorto mog kondenar kelo. Bhagivont Josék dilolo hea sonvsaracheam vostuncho kantallo ani dublokaecho mog. Zaite pautti tachea hatant kainch duddu nastale, aplo ani Povitr Familicho sambhall korcheak, tannem aplea copala velean gam vavouncho poddtalo, tachea vaur korchea dublea kuddant bhagivont Patriark dadospon bogtalo tem vhoddam Palacinim rautele noklot, kainch tachea lagim nastanam to bogtalo sorv vostu; ani khoroch to guirest vortoulonam zait bogun Jesuk ani Moriêk? Bhaguianchim poilim utram Josék laum-et. ‘Tum vortoutai dadoxi dublokaen kiteak Sorginchem raz tujêm vortouta.’

 

Christanv othmea, dublokai bori, Dev consolasanvam dita tachi tuka ruch pollounchi khoxi asa zalear, dubleancho mog kôr, ani tankam pau. Dublokaecho mister sozmota, ani dubleank pauta to vortouta dadoxi. Kakutsar munxeacher dublekai eunchinam. Dubleancho mog kela ani tankam pauleat te munis kedea vhodda visvasan Deva mukhar distti poddchenam zait?

 

MAGNNEM

vhodda Bhagivonta, motint ani callzant tum, Saiba, khoro dublo vortouloi, ani Jesuche dublokaecho tuvem vantto bogloi, tujêam chakrank tea banddarachi apurbai ani mog melloun ghê zachem mol tum itlem borem zanno asloi. Nirmi ki dusreank pautat ani tancho mog kortat tem iek besanvancho ani salvasanvacho penhor vortouta mhonn tannim sozmoncheak. Oxem Zanv.

EXEMPLO

Êk fikricho mataro Padri zo zaitim vorsam Paris xharant avoi bapui nasleleam burgeancho sambhall korta team garancho Voddil aslo, porni irmit asli ti burgeank pavonasli dekhun taka novi irmit bandchi goroz poddli. Hi irmit bandchea khorsacho odmas kelolo sumar 80 hozar frank, ani ti irmit bandun toiar zata mhonnosor tea borea Padrin zaiti minot ani sosnikai gheun unnenxe sogle duddu ti irmit bandchea khorsak zai asle te ekttaim kele. Oxem astanam anik tin hozar frank unnem zatale, ani te irmiticho paunenkar 15 disam modhem te duddu farik korinam zalear apunn Cortin vortolom mhonn sangunk laglo. To babdo mataro Padri kamplo apnak Cortin vorot mhonn, ani Bhagivont Joséche imaji mukhar sorpott podon, teach borabor Noven suru kelem to upkhar melounchea pasot. Dis bollandle punn konnench taka êkui frank addun dilonam. Novenanchea nimannea disa, Bhagivont Joséchea imaji mukhar to dimbier aslo ternam, bhair tache laguim konn ulounk sodta mhonn sanglem. Tem vortoulem ravoilolem zannem tea Padrik thikan (direcção) diun thuim êk ostori rauta ti, tache kodde ulounk sodta mhonn sanglem.

Padri konn borno nam mista mhonn sozmon rokddoch thuim ghelo, ani taka iek ostori meuli, noi piddevont, punn bolaikecho rupkhar. Sodanche ritin zab dilea uprant, te ostoren mhunntlem, atanch mhaka zaitem bens poddlam, ani ismol galun Devak argham attounchea pasun hanvem khobor kaddli, ani tum irmit bandtai mhonn aikolam; tea pasot upkhar kôr ani he duddu ghê zalelea porim tuzo vantto mhojêa borea noxibacho; ani hem uloitanam tinnem taka tin notam dilim êk-êk hozar frankanchem. Tea Padrik itlech duddu zai asle, tea paunekarachem rinn farik korunk, ani zache pasot Bhagivont José kodde tannem maglelem vhodda visvasan ani khotkotean.

 

 

 

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

XXII - BAVISVo Dis

Nial ani Magnnim

BHAGIVONT JOSé AMCHO MODEL DOGDANIM

(1) Tache Bhaile Dogd.

(2) Tache Bitorle Dogd.

 

(1) POILO PONT– Bhagivont Paulache sikounne pormonnem bhagivont othmeanim dogd boguk zai. “Dhonia Jesucho mog korun jietele te dumalo sostele.” ( 2 TIMOTHY III: 12). Amim sotmandunk favo ki Moriê pattlean Bhagivont Josécher Devan dogd daddleat sogleam eram Santam poros chodd. Tachea jivitache sogle dogdog niall jernam to aslo Nazareth, Beleant, Egyptant; ani tuka distti poddtelem ki veta-thuim tannem soschem poddlem vhodd ium, gormi ani bhou vhodd ani kottin pordes, beporva, onit ani munxeanchem onupkarponn. Jesun, Zo tacho bhou vhodd mog kori Aplo Bapui mhonn, tachea jivitant Apleam koxttanchi tannem kalce piexi keli Soddvonenchea Misteracho taka vantto lagcheak. Tea pasot, Bhagivont José vortoulo Khursacho poilo ani bhou visvaxi xins, poilo confesor, ani amchean mhunno et legun Dhonia Jesucho poilo Martyr.

Sodanch khuris vortoulo ani vortoutolo vinchun kaddleleanchea patxaiponacho bautto. Koxttauteleam othmeano, nirvon gheiat; tumche mukhar Jesu veta, Mori ani José tumkam mozot ditelint, Sant tumkam bollaitat fudde sorcheak, Anj boroitat tumchim zuzam ani zoitam. Tumim ghai ghetat te Sorg mezta. Tea pasot, nirvon gheiat, anink thoddim pauvlam dukanchea rostear, thodde anink mogache akt, thoddim anink koddu dukam golloun Moriê sangata, thodde ogle pautti Dhonia Jeus bori Gethsemoni molleant, ani Sorg tuzo vortouta Si compatimur, ita et conglorificemur. Bhagivont José, hanvem dukanim vompcheak mhaka curpa magon ghê, iek dis sontosan hanv luvonk paucheak.

 

(2) DUSRO PONT–Zorui Bhagivont Joséche kuddin bhou vhodd koxtt bogle, punn tache motiche ani callzache koxtt teai poros vhodd vortoule. Bhagivont Simianvche Profeci vorvim to zanno aslo ki munkeakullache Soddvonne pasot aplea Poslelea Putrak jivesim martele mhonn; ani acho ugddas vortoulo iek dukhicho ballo zannem vidarlem tachem calliz; dubavavin ho martyr, tannem boglo disachea disa ani horachea-hora zo moganunch tannem to soscho kelo.

 

Bhagivont Patriarkan kitlim dukham golloilinam zait chintlea uprant Moriêk Khursache mollim, zacher Jesuk zoddlolo, ani to khuris sodanch tache motint aslo. “Zaite pautti” mhunntta iek bhagivont boropi, “mornache khonti osoli to khont bogtalo, ani tachean ti tollu nozo zateli asli Dev-Ballokan tor taka dhir ani ghottai dilinam, gupit ghottaen ji Tachea callzantli bhair sorli.” Ai! patkea munxea, tujêam patkanim kosole vollvolle diunk nant Moriêk ani Josék!

 

Christanv othmea, thuim bitorle voll-volle bogtai, gupit ani calliz toddun kadta tosli dukh ji sonvsar pollenam vo sozmonam, ani ti lu-u korcheak tache kodde upau nam. Punn Bhagivont José kodde tum iê, tujêm calliz taka ugodd, ani tujêa Patronacheam paiam laguim dukham golloi, zannem bhou vhodd dogd bogleat.

 

Tujê taka churchure distele, ani tujim dukham tambouncheak to tuka mozot ditolo. Adjutor in tempore tribulationis.

 

MAGNNEM

Bhagivonta José, zorui tujêm jivit bhou niropradi vortoulem, punn tuvem dogd boglei, ani hanv, vhodd patki vortoutam astanam, mhaka dogd bogchi khoxi nam; somandanan ani khalto zanv tuvem vhodd koxtt soslei, ani mhaka lan akant legun ailear sosnikai nasta. Êh bhagivonta, tuvem edi vhodd dek dili Devache khoxer ajir zaun, hanv tuka pratitam; mhojêr vignam etit tim soglim hanvem sosnikaen soscheak mhaka curpa magon ghê. Oxem Zanv.

 

EXEMPLO

Dogdanchem kedem vhodd mol vortouta tem Bhagivont Josén kollit kelem Veneravel Maria d’Eskobor mhunntlole ostorek. Marçache 19ver, 1627 vorsa, Bhagivont José tika distti poddlo vhodda onodan, tache borobor cruttanim Anj asun. Tachem sarkem zorui dobajeachem punn bapaichea mogan porzolltalem. To laguim ailo, him vortoutat techim utram, ani mhaka zab diun mhunntlem: “Dhoni tujê thaim asum, hanv vortoutam José, Moriêcho Poti ani tuka visit korunk ani buzvon diunk mhaka Devan daddla.”

 

Tachea angar mant aslo to kusin kaddtoch, tachea orddear hanvem iek porzollit Khuris dekhlo sumar dedd vet lamb, zantlean bhou sobit kirnam bhair sortalim. Itlo sobit vortoulo to Khuris, ki mhojêan tache veli nodor kaddu nozo zali. Maguir mhojê kodde Bhagivont uloilo he porim: “Mhojê duve ho Khuris, zaka polloun tuzo othmo sogloch khuxalborit zata, mhojêm dadospon vortoulem sonvsarant astanam.

 

To vortoulo mhozo tovo, mhaka tantum onod bogtalo, ternam hanv dogd bogche curpechi apurbai korim zoxi tichi atam kortam Deva mukhar ti vhodde apurbaechi vortouta mhonn, mhaka vhodd denem dilem zauncheak Ankvar Moriêcho Poti ani Jesucho Bapui. Tujêr Devan dukham daddleant tim khorinch bhou vhoddam vortout, ani tujêa urlelea jivitant tuvem dogd bogche asai te martyrincheam volvoleam poros chodd zanv-e zannim Dhonia Jesuchea moga pasot aplem rogot varoilem.

 

Hea upkarachem mol volkuncheak sik, zoxim Taka favo tuka vinchun kaddlea dekhun. Khursachem mol vortouta ogonit, ani bhou vhodda porzollan to rosrosta Sorgar, Devan vinchun kaddleleam othmeanchi hi vhodd kunna vortouta, zancher Devan curpa xiurailea Aplea Êkleach Putra Jesu baxen te discheak, he curpek tum visvaxi zaxi zalear Dev tuka vhodd onod ditolo dusrea jivitant. Tea pasot buzvon ghê, mhojê duve, kiteak hea jivitache koxtt ani dogd sortat tosole vortoutat, punn onodacho mokutt ani Devak amim bogteleanv tem sasnanchem.”

 

Hem sanglea uprant, Bhagivont Patriarkan ti tachea orddeavelea Khursak ojap zatali ti polloun, tea Khursacho tika umanv gheunk dilo, ani tichea matear ani copolar aplo hat dourun tika aplem besanv galem, ani nanch zalo.

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

Povitr Misachi

Bhett

 

“IMITAÇÃO DE CHRISTO” mhuntlolo livr amkam sangta ki thoddech monis zannot Ho Salvasanvacho Mister Zo Sontos dita Sorgak ani sambhalta sonvsar.

XXIII - TEVISVo Dis

Nial ani Magnnim

BHAGIVONT JOSé VAURACHO MODEL

(1) Jesu ani Moriê pasot tannem vaur kelo.

(2) Jesu ani Moriê sangata tannem vaur kelo.

 

(1) POILO PONT– Bhagivont José kodde kaim guireskai nasli dekhun sodankal kottin vaur korun tannem Povitr Familicho sambhall korcho poddlo; to tovoi vortoulo, ani poile Christanv vhodde apurbaen sambhallun dourit tachea hatan kelelim zunvam ani nangor.

Ho Bhagivont Patriarch, Judeacheam Patxaianche kulliecho putr, Davidacho putr, Dev-Putra ani Sorgache Ranniê pasot soglo dis vaur kortalo to niallum-ia.

 

Tachem missanv munxeank bhou khaltem diso-et, punn Deva mukhar tem bhou vhodd vortoulem. Munis mol kortat, te dektat tea pormonnem, punn Dev polleta calliz.

Êh Jesu; bhagivont vortouta te hat zannim bhou kottin vaur korun Tujêo ani Tujê Povitr Maiêcheo sonvsarantleo gorzo bagoileo!

Vauraddea munxea, Nazareth lissanv sikoita tem visrunaka ani monant dor ki zorui tor tuzo vaur khalto zalo, vauraddi vortoutai, êk mann tujê familik.

Jesun ani Josén mellounk zai aslo tancho dispotto guiraz, hatanim vaur korun ani copola velean gam vanvon, tea pasot, Christanv vavraddeachea bhesa poros kuinchoch bhes vodik manadik vortounam.

(2) DUSRO PONT– Jesu ani Moriê pasun Bhagivont José koso vaur kortalo tacho amim niall kelea uprant, amim atam niallunk zai José vaur korta to Jesu ani Moriê sangata Nazarethachea dublea garant, ani Bhagivont Patriarkan Balloka Jesuk aplo dondo sikoilo, to zantto zatam-zatam Aplea Postelea Bapaik mozot diunk laglo.

 

Bhagivont Ligori mhunntta, “Bhagivont José aplea Dev-Dhoniank êka sangatea vauraddea porim tacho vaur kortanam polletalo ternam tachem calliz mogan pettalem; Ballok Jesu vaurachem kudd ugoddtanam ani danktanam, follim chirunk taka mozot ditanam, soglea tachea vaurant. Jernam Josén, Jesuk pollelo aplo vaur kortanam, ani Mori vaur kortanam, tanchea dublea garant, Joséchean aplea nibra vaura pasot murmurar koruetem zait?”

 

Christanv othmea, Jesu borobor amim vaur korum-ia. Sogleo vostu korum-ia Tache pasot, Tache thaim ani Tache borobor.

 

Monant dorum-ia ki nirmoll tensavan amcho vaur korinam zanv zalear to kiteakuch upkarchonam sasnnank. Amim vomplam asot, punn thuim amkam kainch luvonk melchenam.

 

Ere vatten, Bhagivont José baxen, Jesu ani Moriê ujir, amim vauroun zalear amcho vaur funkot vechonam, tachem pag nastnam, ani amim iek-iek konisttai sostanv, ti vortoutoli iek-iek mannik amchea Sorginchea mokuttant.

 

 

MAGNNEM

Bhagivonta José, tum, Saiba, bhou khalto vortouloi munxeancheam dolleam mukhar punn bhou vhodd Deva mukhar, mhojê koxtt hanvem bhagivont korcheak mhaka curpa magon ghê zoxe tuvem tujê kelei bhavartan, borvonsean ani mogan. Sogleo mhojêo korneo hanvem kelea puro jea vorvim hea sonvsarant mhaka vodik-vodik curpa melloxi ani vhodd onod Sorga Rajeant. Oxem Zanv.

 

 

EXEMPLO

José le Saige de la Villebrune, Bapa Saibachea Zuavos regimentacho tenent, Bhagivont Joséchem vhodd Devosanv kori, tea pasot, Bhagivont Josén taka vhodd farikponn dilem tachea mornachea vellar. Aplem morn laguim paulam oxem dison tannem military Capelaunk apounk daddlo, mhunnon: “Bhagivont Josén mhaka veguim Cumsar za mhonn sanglam, ani mhaka iloi vogot pirder korcheak nam mhonn hanv zannom.”

Taka Cumsar kelea uprant Capelanvan mhunntlem, “tujê pasun hanv atam Mis mhunnunk vetam, ani tem zatoch tuka Saib addtolom;” punn to Mis mhunnonk suru korchea adim tea vaittakaran taka novean apounk daddlo, mhunnon, “mhaka Saib addunk to Mis kobar zai porian ravot zalear, anink vogot melchonam, kiteak titlea vogta modhem mhaka sintid nam zatolo ani to porto eunchonam.”

Maguir tannem Saib gheunchi toiari keli, ani ghetlea uprant, Devak argham dilim taka upkhar kelolo tache pasot, ani morn laguim paulam mhonn kollit kelelem dekhun. Tache sorxem asleleank tannem bori dekh dili vhodda khotkotean Devosanv korun. Tannem rozar korun kobar zainam fuddem, tannem sanglelem teach pormonnem taka madon marlem, tache dolle dankle, punn thoddea vogtan te ugddun tannem uttonk boll kelem ani Bhagivont Joséche imaji mukhar sorpott poddun, tannem criadak ulo kelo, mhunnon, “Veguim mhojim anglim add, kiteak Bhagivont José mhaka rauta; to thuim mhaka vorcheak ubo asa to tuka disonam?” Dusrea disa sumar sokallcheam tin horar tannem apli tokli voir kadli, aple dolle ugoddle ani te imajik pollounk laglo, ani kaim abzaum nastanam jiu sandlo.

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

XXIV - CHOVISVo Dis

Nial ani Magnnim

BHAGIVONT JOSéCHEM BHAGIVONT MORN

 

(1) To mortanam Mori tache sorxem rauli.

(2) To mortanam Jesu tache sorxim raulo.

 

(1) POILO PONT– Bhagivont Joséchem jivit borlolem curpen ani punean, tea pasot, tem kobar zanv nozo aslem bogor êka bhagivont ani baginchea mornan. Nazarethacho bhair soron Jesun Apnnak sonvsarak kollit korcho vogot paulo,ternam Joséchem missanv kobar zalem. Tis vorsam tannem Jesu ani Moriê sangata sarlea uprant êkuch vost urleli tachem dadospon purem zauncheak, ani ti vortouli tannem morchem tanchea gopant. Sorv jem Bhagivont Josén Tiche pasot kelelem tachea upkaran boron, Ankvar Moriên tacho bhou vhodd cuidad ghetlo tachea mornachea vellar. Tinnem tachi zoton keli ani êka vhodd mogan Devache Maiên taka goroz teo vostu dileo.

Bhagivont Bernardino de Sena, Bhagivont Joséchea bhagivont mornachi khobor sangtolo zalear, zaka Sorgachi Ranni asistir zali kedo vhodd mog ani buzvon tea vellar Bhagivont Josék boglem tem sangon diuncheak taka utram mellonant. Êh Ankvari Moriê, maguirleam vorsanim tor itle pautti mornachea vela-velo kallok Tuvem porzollit uzvadd kelai Tujêam visvaxi chakrank, Tujêa bhagivont ani mogachea Potichea mornachea vellar Tum tache sorxem asun, kosli goddsan ani buzvon, taka meulinam zait?

Christanv othmea, tujêa mornachea vellar Ankvar Mori tuka pauleli khoxi zalear, zoxi ti Bhagivont Josék pauli hea onodvont Patriarkachi dekh ghê, ani tujêa jivitant Ticho mog ani Devosanv kôr.

Disa dispottem amim Tichea mannak Devosav kelam tacho ugddas amkam sontos ani borvonso ditolo amchea mornachea vellar, tea kampereachea godier, je godier attapolelem asa amchem sasnnanchem sukh. Ankvari Moriê Tuvem, Saibini, Bhagivont Josécho nimanno suskar ghetloi, Tujêa Dev-Putra lagchi mhaka curpa magon ghê hanvem morcheak mhojêam patkanchi khori dukh dorun ani zoddun borvonsean. Oi, Devache Maiê, sodankal mag amche pasun, punn vodik korun amchea mornachea vellar.

 

(2) DUSRO PONT– Atam niallum-ia amchea Dhoniak, To pallo ditanam burgeacheam nimanneam kaideank Aplea Poslelea Bapa sovem. Amchean kainch dubavo nozo, Bhagivont Josén sorv koxtt boglele tanchem pag taka Jesun dilem hea tachea nimannea goddier diun taka bitorlo vhodd sontos, ki tannem dukam golloilelim tache boldek taka Sorginchi buzvon dili ani zaite pautti tannem vollvolle boglele tanche boldek taka dilem othmeachem somandan ani sasnnanchea sukacho vantto.

 

Patriarkache mornachea vellar Jesu tachi zoton kortalo ternam, Tannem taka kelo morteleancho xarati ani  baghichea mornacho Patron.

 

Povitr Pustok hea mornachi khobor kaim sangonam, punn amchean Devosanvan stomandum-et ki Igorz Math atam utram mhunntta tim tea vellar mhunntelint mhonn ani Jesun taka nimanne pautti besanv galun mhunntlim mhonn him utram: “Voch mhojêa Bapachea othmea ani Anj tuka vorom Araunche venghent, bhou veguim etolo to dis jernam Mhojê borobor tum Sorgar vetoloi.” Ani Anjanim aplea Dhoniachi zab aikon, tachea othemeak Limbant velo zoim Patriarch Soddovnnek rautale.

 

Christanv othmea, Bhagivont Joséchea dadosponancho amim vantto bogcheak amchech laguim asa. Tache baxen Jesuk ekvott korun amchem jivit sarin zalear; amchea mornachea vellar To etolo; kiteak morn vortounam dusri vost bogor iek sad jivitacho.

 

Bhagivonta José hanv mornachea antunnar poddtoch Jesuk sang mhojê sorxem eunk ani visit korunk, ani mhaka besanv galunk. Ternam Povitr Communhanv gheun gott zaun, sonvsarak hanv nimanne adeus kortolom, ani mhozo othmo uddon Sorgar vetolo, zoim tujêa sangata Jesuk ani Moriêk hanv nialltolom sasnnanchea sasnank.

MAGNNEM

Povitr Familichea Manadik Voddila, Jesu ani Moriê sangata tum jielea uprant tanchea gopant tuvem jiu sandloi, melloun ghê ki mhojêa mornachea vellar Jesu ani Mori mhaka paucheak mhojêa callzacho nimannom suskar zauncheak iek mogacho akt, ani mhojêam morteam vonttanim tanchim Povitr Nanvam hanvem ucharcheak. Oxem Zanv.

 

EXEMPLO

Padre Lallemand, zo thoddim vorsam Jesuitanche Collegicho Reitor aslo Bourges gavant, Bhagivont Joséchea festacheam novenanim jim te collegiche burge korit, tannem dogham torneam mistirink apoun addle ani tankam dogainkui khoxi ti omkich curpa melloun ghetam mhonn sanglem classintleam burgeank te Bhagivont Joséchem vhodd Devosanv korunk laitit zalear. Hem korcheak te dogui professor khoxen raji zale, ani tancheam burgeank tannim sikoun dili ti itle folladik zali, ki Bhagivont Joséchea festa dis heam donim classintleam sogleam burgeanim Communhanv ghetlo. Teach disa te dogui professor Reitorachea kuddant vochon taka gutt sanglem, tankam kosoli curpa melloun ghetleli zai ti. Tantlo iek mister vortoulo kirtivont (célèbre) Padre Nouet, ani tannem curpa magli amchea Dhoniachem apunn favo te jinsim uloixo ani boroiso zauncheak. Dusrea mistirin kosoli curpa magli ti kollit zaunk nam, punn tannem magleli ti vost apnak meuli mhonn sanglam. Festachea dusrea disa, Padre Nouet Reitora sorxem novean ghelo ani apnak vodik borem dista mhonn sanglem ki apnem curpa maglea tiche boldek iek curpa magleli jea vorvim apunn vodik sompurnkaechea margar sorcheak, Reitoran taka tum uxir korun ailoi mhonn sanglem, kiteak tannem poili magleli ti curpa taka Bhagivont Josén melloun ghetli mhonn.

 

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

XXV - PONCHVISVo Dis

Nial ani Magnnim

BHAGIVONT JOSé BHAGIVONT MORNANCHO M

 

(1)To vortouta dekhun amchea Jesucho    Bapui.

(2)To vortouta dekhun deuncharacho  Zoitodhar.

 

(1) POILO PONT–“Munis noklo apleak mog vo rag favo zain mhonn,” (ECCLESIASTES IX: 1), ani Bhagivont Paulo tem sangta heam utranim. “Kiteak hanv noklom mhojê thaim kitem vaitt asa tem, ani torui hea vorvim hanv mhaka justifikar korinam, punn zo mhoji Zortti korta To Dhoni.” (1 CORINTHIANS IV:4). Bhiem diso nastanam him uttram vachu-et? Mornacho ani Zoddtecho ugddas kaddlea uprant borem jivit adartat te munis legun kamptat, tea kampereachi goddiek jicher attapon asa amchem sason! O momentum a quo pendét acternitas.

Punn Bhagivont Joséchea chakrank borvonso asu-e. Hea vhodda Bahgivontak zaitim xembor vorsam than Igroz Math pacharta “Bhagivont Mornacho Patron” mhonn. Hea sonvsarant Sorv Munsubdaracho to Bapui mhonn titlo vortolo dekhun, zacher amchem sason attapun astelem hem Devosanv korunk monant ghelear. Moises vortoulo Israeliche porjecho Vhoddil ani rakhnno, ani torui aple kotte porje pasun to Devak magnnem kortalo ternam tachem magnnem iek formonn zalem, zannem Sorv Podveddara Devacho hat patti kaddlo, Taka chukleleank khast launk dinam zaun, êke baxen Moisen tankam khast launk nirmi porian. Punn amcho Bhagivont Patriark kitle vodik soten patti kaddchonam zait amchea Sorv Munsubdaracho hat jernam hea sonvsarant astanam tachem vortem missanv vortoulem zauncheak Rakhnnô, Tutor, Bapui jiveam ani meleleanchi Zoddti kortolo Tacho? Oi, tea kampereachea godier Bhagivont José amcho xarati zatolo vhodda Juiza thaim zache mukhar amim distti poddunk zai. Oslo amkam advogad aslear amchem sasnnanchem Salvasanv sugur zatelem ani kondenar zaunche suater amim aikoteleanv tim consolasanvachim utram, “Eiat, tumim mhojêa Bapacheam bhagivontano, bogat tumim raj jem tumche pasot sonvsar rochloleak tumkam toiar kel’lem.” (SAM MATÊV XXV: 34).

Christanv othmea, amim borem morn meloun gheteleanv zalear, kuincheai vellar moronk toiar zaunk zai ani êke baxen dispotte moronk zai, quotidie morior, jea vorvim Bhagivont José baxen amim jieunk Jesu thaim ani Tachech pasot. Hem Devosanv amim dispottem kelear nimannea disachi birant unnim zateli ani tachi koddsan bodolteli, he jinsim tea disa amchi feliz suttka zateli.

 

(2) DUSRO PONT– Amchea mornachea vellar Bhagivont José amkam deuncharacheam talneantle sambhalltolo, Jesuk Herodichea ragantlo tannem vattailo dekhun, mornachea vellar abzauteleank deuncharacheam addkolintle nivarcheak, ani te infernant vochonam-xe korcheak Jesun taka kerit podvi dilea. Jesu ani Moriê sangata Bhagivont José Egyptak poullolo ternam, kudde dev dornir poddle porsad (orakulos) voghe raule, fottinchea bapaik sankoll ghali ani infernantle deunchar poulle. Tea pasot amchi Igroz Math, Moriê sangata Bhagivont José Mornacho Patron mhonn pacharta, ani he jinsim Bhagivont Joséche devot aplea nimannea zuzant zoit vortat ani susegad nittat. Dhonia thaim Bhagivonta Teresa zaiteam apleam religioz munxeanchea ani vodik korun Bhagivont Joséchea devotanchea mornachi khobor uloun mhunntta: “tanche thaim hanvem pollelam sango nozo toslo somandam ani soukosai, éka vhodda sukhant vo somandananchea rozarant tim bitor sorlelea porim disot. Bhailean kainch khunna diso nasli tim bitorlean somandan bogtalim tim kosli talni eun pirder korta mhonn. Hea Sorginchea uzvadda vorvim, zo upkhar hanvem ghetlolo, mhaka adim mornachi bhirant diso ti nam zali. Atam Bhagivont Josécheam Devosanv korteleank morn zodd noixem mhaka dista.”

Christanv othmea, heach jinsache sentiment amche sovem vosom, amchea mornanchea vellar tich buzvon amkam mellom, ani Bhagivont Paulo borim amchean mhunnoxem zalea puro: “Hanv bori loddai zuzlom hanvem mhozo vaur kobar kelo hanvem bhavart sambhaullo.” (2 TIMOTHY IV: 7).

MAGNNEM

Vhodda Bhagivonta, tum Saiba, vortoutai mornanche tonir pauleleancho Model ani Protector, mhaka melloun ghê hanv bhagivontachem morn morcheak. Ho upkhar mhaka favo zauncheak hanv atanch than mornak toiar zaunk vavurtolom. Jesu, Moriê, José, mhoji cakut korat atam ani mhojêa mornachea vellar. Oxem Zanv.

 

EXEMPLO

Veneravel Madre Pudenencia Zagnoni, ji Franciscan Ordin bhou mananchi zali ticheam segunank lagon, Bhagivont Joséchem vhodd Devosanv kori, ani tichea mornachea vellar tache lagche tinnem bhou moladik upkhar ghetlele.

 

Tea akantachea vellar tichea vhodda sontosan Bhagivont José tika distti poddlo ani tannem hatant dorlo Ballokak. Taka zo vortouta Anjancho sontos, Sorgachem dadospon, bhagivont othmeachim jivit. Hea disttipodneam vorvim te madrichea othmeant kitlo povitr sontos ubzolo to sangon purem paddu nozo, ani thuim aslelem Religiozanim tichea dadosponancho vantto boglo jernam José ani Jesu laguim ti uloitali tem tannim aikolem, poileak argham diun hea campereachea godier koddsan tannem boldun Sorginchi goddsan keli dekhun ani tech porim aplem upkarpon dakoun. Ballok Jesu, osolea mogan tika kazarache banquetik apouncheak To ailo dekhun, ji Tannem Sorgar toiar keleli heam team othmeank zankam Apleo Potinim mhonn pacharcheak Tannem koxi veli. Hea bhair Bhagivont Josén Ballok Jesuk te madrichea hatant dilo to team Religiozanim polelo, he jinsim korun tichem morn aplea morna porim Nazareth; kiteak tachi vhodd bag vortouli Jesucheam povitr hatancher morcheak.

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

XXVI - SOVISVo Dis

Nial ani Magnnim

BHAGIVONT JOSé LIMBANT

(1)Limbantleam Bhagivont othmeank to    buzvon dita.

(2)Purgotorintleam othmeank buzvon diuncheak taka vinchun kaddla.

 

(1) POILO PONT– Bhagivont Josécho othmo tache kuddintlo bhair sorlea uprant to Limbant ghelo, kiteak ternam poriant Sorg ugto kelonam. Veneravel Maria d’Agreda mhunntta ki Santissima Trinidadin Bhagivont Josék podvi dili Dhonia Jesuk porgott korcheak adlea Testamentacheam Santank, je tanchea Sorvonddarak rautale. Zoxe porim fanteavelo uzvadd dis udeta mhonn kollit korta, zo nam korta raticho kallok tech porim Bhagivont Josén Niticho Dev-Dis kollit kelo zo thoddeach tempan tankam visit korcho aslo, ani Aple borobor tankam Sorginchea Jerusaleak vorcho aslo. Cosolea sontosan ghetlo nam zait Bhagivont Josék, Jesuk Posilelea Bapaik ani Moriêchea Potik, team Patriarkanim ani Phophetanim ani hozaram bhagivontancheam othmeanim? Ani kedem vhodd vortoulenam zait tachem dadospon Tarokachi ani Tache Maiêchi khobor aikoncheak? Bhagivont José poros borem korun tankam konn sangto? Tannem soglem deklelem, ani tis vorsam jim to jiello Putra ani Maiê ujir to vortoulolo tancheam jivitanchi govai, ani bore baxen sogli khobor tachean sangoeti ji Apostlanim amkam diunk nam. Ah? team bhagivont othmeank kitle gutt tannem sanglenam zait, tankam to vortoulo noich evangelist, punn iek buzvonddar Anj.

Christanv othmea, Jesuk ani Moriêk erank kollit korun amim Apostl zaum-ia. Ai! hea sonvsarant bhou thoddo lok tankam volkota, tanche xins mhonn choltat te legun tankam sarke volkonant. Zaiteam zonnank vinchunk favo zoxe amchea Dhonian Tachea paxanvanche rati Apostlank vinchlele, “itlo temp than tumche modhem Hanv aslom ani tumim mhaka volkonant?” (SAM  JoãO XIV:9) Oi, Jesuk, ani Moriêk kollit korum-ia; tanchea bolleponanchi khobor uloum ia; sangoia tannim amcher besanvam xiuraileant tim, ani tancho vhodd mog amche pasun, kiteak hem sorv zanno zalea uprant erui tancho vodik mog ani xeva kortelet, ani patkachea gulamponantle othmeank soddouncheak mozot ditelet.

 

(2) DUSRO PONT– Bhagivont José, Limbant vochon thuim soddvonenk rautale team othmeank buzvon dili dekhun taka nanv favo zalem Purgotorintleam othmeancho Bapui ani Protector mhonn. “Devachea Putran” iek bhagivont boropi mhunntta, “Tache kodde jednam Sorgacheo chavieo asat, tantli êk dilea Moriêk ani dusri Bhagivont Josék, apleam visvaxi chakrank tannim Sorgar gheuncheak. Tea pasot amchean visvasan patie-et ki Sorga Rajant amcho Bahgivont Patron tambonastanam magtolo mhonn Purgotorintlea othmeam pasun zankam Devache nitin Purgotorintlea ujean nirmoll zauncheak thuim dovorleat, ani zaite pautti tankam mozot diuncheak ani soddouncheak, Sorgar than to Anj dadta mhonn. Punn Bhagivont Patriark Purgotorintleam othmeancho buzvonddar vortouta mhonn sot vortouta tech porim vortouta sot ki heam sonvsarant tachem Devosanv porgott korcheak vavurteleancho to vodik mog korta mhonn. Poilea Josén dukoll poddlolo ternam Egyptache sogle porjek mozot dili, tannem ekttaim korun dovorlolo to dannom tankam vanttun, punn tachem udarpon tannem vodik dakoilem apleam bavam sovem. Tanche sak dannom borun to dadoxi zalonam, punn dannom vikto gheunk tannim duddu addlele te tankam portun dile. Amcho Onodvont Patron apleam visvaxi charkank ache poros chodd borvem kortolo; kiteak tanche pasot tambonastanam Jesu ani Moriê laguim to magtolo tanche khasttitle tankam te soddoi poriant, ani tankam douri poriant êke porzollit ani Somandananche suater. Tea pasot Purgotorintleam othmeank amim mozot dium-ia,tanche pasot rozar korunk amkam kaido asa niti, karidadi ani upkarpona pasun.

 

Christanv othmea, tujêa bapain, avoin, bhavan ani boinin tuka zaiteo mogacheo khunnam dakoileat tancho ugddas kôr. Tancheam dogdanche suater than apnank pau mhonn tuka porattat ternam tujêan tankam visro-et? Veguim-veguim tankam suttka melloun ghê Povitr Misachea Sacrifisan, Povitr Communhanvan, ani Bhagivont Joséche vinotin.

 

MAGNNEM

Dulloba Jesu, Purgotorintleam othmeanchi cakut kôr, Saiba; tancheam koxttancho temp unno kôr; ani aik amchim magnnim jim Bhagivont Joséche vinotin Tuka amim kortanv. Mogalla Jesu, tankam sasnnanchem sukh di. Oxem Zanv.

 

EXEMPLO

Jesuche Sociedadicho Padre Evangelista, Bhagivont Josécho iek vhodd devot, hea bhagivontache vinotin ho vhodd upkhar tannem melloun ghetlo. Ho Devacho vhodd chakor sumar 20 vorsam vhodik taka los (uboxi) eun volvolle bogtalo. Tachea monant ailem ki apunn melea uprant Devak bogtolom mhonn apleak khorepon mellot zalear, he volvolle kitle lu-u zainam zait gai mhonn.

1626 vorsa, Marsache 19ver Bhagivont Joséche vinotin tannem vhodde nenttukaen Deva laguim maglem khorench apunn sasnnanchem sukh bhogtolom mhonn gomouncheak. To otregtalo to upkhar taka meltolo mhonn vhodda visvasan. Povitr Mis mhunnonk tannem preparasanv kelem ani Bhagivont Joséchea Altarar apnak Mis mhunnonk ukum dila mhonn gomtoch tacho visvas vaddlo. Povitr Misacho Sacrifis bhettounk suru kortanam tacho othmo vhodd Devosanvan pettlo ani Sorga Rajeant Santank vhodd onod melta to niallunk poddlo.

Tea vellar tachem calliz buddlem nenttuvaen, upkarponan, ani mogan ani taka fudde soronk dinam zalem. Xekim to soiranant eun tanem apnak sogloch Devak ani Bhagivont Josék bhettoilo, ani tacho bitorlo umallo nirmitalo tea pormonem Mis mhunno laglo kalce Consagrar kori poriant, punn vhodda Devosanvan him utram mhunntlea uprant que pro vobis (jem tumche pasot) tannem sarko aikolo iek bitorlo tallo, ani hem buzvoninchem utor efficaciter (folladik zaun), maguir sodanche ritin tannem mhunntlim him utram, et pro multis effudetur in remissionam peccatorum (jem varoutelem tumche ani zaiteam pasot patkanchea bhogsoneak).

 

Hea bhagivont munxeak gomlea uprant ki Dhonia Jesun varoilelem rogot taka folladik mhonn, ani tachem Salvasanv sugur asa mhonn, tacho othmo kosolea povitr sontosan buddlonam zait!

 

Fuddlim 17 vorsam jim Padre Evangelista vanchlo, hea upkaracho besttoch ugdas taka ailea uprant othmo Sorginchea sukhant bortalo ani vhoddam vollvolleam modhem to khuxal astalo.

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

 

 

Igorjent bhitor soron dhimbi moddtana mhunnpachem prarthon

Pornipat ani Nomaskar kortam Tuka Dhonia Jesu Christa, tea Tujêa Povitra Khursa vorvim soddoiloi mhonn sogllo sonvsar.

 

XXVII - SATAVISVo Dis

Nial ani Magnnim

BHAGIVONT JOSéCHEM JIVONTPONN (Ressurição)

 

(1) Bhou korun to jivont zala astolo.

(2) Tachem Jivontponn bhou Onodvont.

 

(1) POILO PONT–Zaite bhagivont sotmandtat ki Bhagivont Josék jivont korun amchea Dhonia borobor Sorgar velo mhonn. Ani Bhagivont José poros konnak vodik favo aslem Jesu borobor Tachea sukhant vecheak? Bhagivont José bhou vhodd mogan Tache borobor Tachea pordesant Egyptak ghelolo ani Tachea koxttanchea jivitak sangat kelolo.

“Tarokak tor khoxi zali”, mhunntta Bhagivont Bernadino de Sena, Aple Sodanch Ankvar Maiêchi kudd ani othmo Tika Sorgar vorchea disa ondovont korunk, amchean sotmandu-et ani sot mandunk favo ki Tannem Bhagivont Josécho unno mog kelonam, zo sogleam Santam modhem itlo vhodd Sant vortouta, ki Tannem taka jivont kelo vhodda mannan Apunn Jivont zalo teach disa.

Christanv othmea, niall ki sonvsar kobar zatoch amim sogott jivont zateleanv, zo amchea bhavartacho vhodda buzvonecho artigo vortouta. Credo carnis resurrectinem. Amchi kudd jinnem dogd bogleat ti vhodda onodant jivont zateli. Amchean zonn êkleachean bhavartachea ani mogachea khotkhotean mhunno-et, “hanv zannom ki mhozo Tarok jivo asa ani nimannea disa hanv matie bhair sortolom.” (JOB XIX: 25).

(2) DUSRO PONT– Povitr Pustokim amkam distti poddon eta ki aplea Devacho rakhno onodvont zatolo mhonn, ani him utram Dev Spirit Santan boropiache motint galeant xim distat Bhagivont Josécho onod kollit korcheak. Zaito vogot amchean niallum-et Anjanchem saudasanv ani Jesuchim utram: “Ie, borea ani visvaxea chakra mhojêa Sorginchea Bapan besanv galelea, ie visvaxea rakhnnea pos ghê te razvoddkechi, ji tuka favo zalea kiteak sonvsarant Hanv ugtto aslom ani tuvem mhaka pangronk dileim, Hanv bukelolom ani tuvem mhaka jeunk dileim, Hanv tanelolom ani tuvem mhaka pieunk dileim, Hanv porko (peregrino) aslom ani tuvem mhaka bitor ghetloi; atam Dhoniachea sukhant bitor sor.”

Dulloba Jesu, Tuka sodanch ogonit argham favo itlo manadik kelo dekhun taka zannem sonvsarant Tuzo itlo vhodd mog kelo; amka-i khoxi taka mann diunchi ani tacho mog korchi soglea amchea callzan than. Onodvont zaun amim jivont zalele zai zalear, amim sambhallunk zai amchem niklonponn (castidade) ani tachi apurbai korunk zai. Ho sobit segun zoxem sangta Tertulian, amchi kudd Anja porim korta, Angelifacta caro, ani tika onodvont mornam vinnem. “Zanchem mon nirmoll te bhagivont kiteak Devachem mukhamoll te dektit mhonn,” (SAM MATÊV V: 8); ani iek dis neketram porim te moubar prozolltele.

 

MAGNNEM

Êh Bhagivonta José, mhojêa bhagivont Protectora, vhodd khoxi mhaka bogta ki tum kuddi othmea soit Sorgar asai mhonn. Tujêa onodvont jivontponant hanv khoxi vortam, ani Sorgacho vhodd otreg mhaka melloun ghê mhonn tuka pratitam iek dis hanvem tuzo onod pollexo ani tuka itlo vhodd onod dilo dekhun hanv Jesuk argham diso. Oxem Zanv.

 

EXEMPLO

19 vorsanchem êk burgem, Filomena mhunntlolem zaka zaito temp than nervam zatalim. Setembrache 5ver 1867 vorsa antunnar poddlem; matxem allear taka vhodd dukh bogtali, ani iek culer bor sop legun tachea pottant doronaslo. Voizanim voktam dilelim tantum taka kainch boro gunn disonam zaun, sonvsarantlim voktam apnak pirgotar poddit mhonn taka borvonso naslo. Devan matr apnak borem koru-et mhonn tem sozmotalem ani taka pollounk etalo to lok Deva laguim mago tachi cakut kôr mhonn, ani taka Sorgar voron tachea sosnikaek prem di mhonn jernam tem sorv vollvolle bhogtalem.

 

He tonnir tem astanam, Febrerache 28ver, tem siklelem tea Conventachea Superiorachi taka chit aili, tinnem taka desesperar zainaka mhonn sanglem, punn Marsache 10ver than Bhagivont Josék Novenam korunk addai mhonn boroilem, jim Patriarkachea Festa dis kobar zaunchim aslim. Te Superioracho visvas itlo vhodd vortoulo ki tinnem apli chitt kobar keli heam utranim: “Maka itlo borvonso asa, ki hanv tuka anink kaim iek boroinam punn adeus amim dusreaim mello poriant. Hanv tujêa visitak rautam 19ver; amchea Conventacho Patron, zoxem tum zannai, vortouta Bhagivont José.”

 

Superiorachea callzant riglolo toch borvonso vaittakaracheai callzant riglo, ani tem eta titleankui apunn 19ver borim zatelim mhonn sango laglem. Novenanim tea burgeachi pidda zodd zali ani 17ver tem choduch zod zaunk laglem. Dusrea disa tache thaim matso boro gunn dislo, ani 19ver tem Povitr Communhanv ghexem zalem. Tache sorxem êka mezar Bhagivont Joséchi imaj asli tiche mukhar ilo vogot tem sorpott poddlem. Tem khinam bitor borem zalem ani taka sogleo vaitt khunnam zataleo teo nam zaleot. Filomena, jem maguir sodanch bore bolaiken aslem, mhunntalem ki Bhagivont Joséchea Festa dis tache lagcheo vostu melloun gheum-et mhonn.

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

XXVIII - ATTAVISVo Dis

Nial ani Magnnim

BHAGIVONT JOSé SORGA RAJANT

 

(1) Tacho Onod.

(2) Tachem Sukh.

 

(1) POILO PONT– Jitlo Bhagivont José hea sonvsarant khalto zalo titlo taka Devan vhodd kela Sorga Rajant. Sonvsarant astanam to nimano munis vortoulo, Sorgar Jesu ani Moriê pattlean to asa. Sonvsarant tannem vhodd dubllokai bogli, Sorgar to sogleo vostu bhogta ani Moriê sangata to vortouta Devacheam banddarancho dispenseiro. Sonvsarant tannem sogleanche paem dorunk zai asle Sorgar to vhodd mann bogta ani to vodik diunk laita maglelea poros.

 

Santisim Trindade tachi vhodd apurbai korta, Dev-Bap zacho rupkhar to vortoulo hea sonvsarant, Dev-Putr zacho apleam hatancheam koxttanim tannem sambhall kelo, Dev-Spirit Sant zacheam inspirasanvank ani sangneank tannem visvasan pallo dilo. Ankvar Mori, Sorgachi Ranni, bhou vhodd mog tacho korta, Anj ani Sant tachea onodant khuxal zatat. He jinsim mann ditat taka, zaka patxaiea patxaianch manan dila. Vhodd Theologo Suares mhunntta: “êh José, Sorga Rajant kitlo vhodd vortouta tuzo onod; sogleam Santam poros tum vorto vortoutai curpent ani baguint!” Kernam amkam mellot amchea mogachea Patronacho onod pollouncheak, ani niallcheak Sorga Rajant ani bhogcheak tem sukh jem to apleam chakrank toiar korta! Onodvonta Bhagivonta José, amim hea pordesant dusmananchea villatent asanv êksure ani duble zhuim êka disa amim novi-novi lodai zuzunk zai, amchea pordesant amkam pau amchim dukham unnim kôr, ani hea sonvsarachea moddachea doriar amchem oskot vhoddem choloi tem amchea Sorginchea xharache toddik pavo pasun.

 

(2) DUSRO PONT– Sorga Rajant Bhagivont Joséchem sukh tachea vhoddpona itlem vortouta. Sonvsarant astanam Jesu ani Mori tacho sontos vortoulint, constituit eum principem omnis possessionis suae. Ataim Bhagivont Bernardino de Sena sangta, tachi vodd bag vortouta Sorga Rajant.

 

Cosolem dadospon bogonam zait hea bhagivont Bapaik, Devak polelea uprant, soglea Tachea Onodachea Dobajeant, zaka hea sonvsarantlea jivitant tannem pollelo korddar dovorlolo ani konnank dekol zainastanam. Aple dis sartanam êka dubllea tovoiachea gharant. Sogleam Santam poros Bhagivont Josék vhodd bag asa ki to Jesucho mog korta noich aplea Devacho koso, punn azunuim to Tacho mog korta aplo Burgo mhonn. Tech porim kosolo sontos taka bhogonam zait pollelea uprant Moriêk tache Potinik Jesuchea uzvea hata êke porzollit Sodrer bosleli! Punn Ankvar Moriêchem dadospon kitlem Bhagivont Joséchem dadospon vaddoita tachi amkam sarki sozmoni melcheak amim ticho mog korunk zai zoxe porim Bhagivont Josén ticho mog kelo ani he Povitr Maiêcheam khalteponancho ani akantacho amim vantto bhogunk zai.

 

Êh Onodvonta Bhagivont José, sorpott tujêam paiam laguim poddun, hanv Devak porkondtam tuka itlo vhodd onod ani gosgoseanchea dadosponan tujêm calliz borlam dekhun. Tum asai tujêa korea gavant, punn hanv tujêm burgem hea pordesant dukham golloitam; tum toddik pauloi ani hanv tujêm burgem azunuim sonvsaracheam moddanchea larancher buskottam. Mhaka pirder zaunk dium naka Saiba, zoxo Herodichea kinvantlo tuvem Ballok Jesuk vattailoi, ani pavoi mhaka Jesu ani Moriê sorxem zoim tujêa dadsoponancho hanv vantto bhogtolom.

 

Christanv othmea, kedinch visru naka ki Bhagivont Joséchea sangata tuvem Sorginchem sukh bhogcheak tujêach kodde asa mhonn.

 

MAGNNEM

Bhagivonta José, Jesucho ani Moriêcho tuvem bhou vhodd mog keloi dekhun tuka itlo onod ani sukh favo zalem. Mogalla Bapa, hanv tujêm burgem vortoutam, hanvem tuji dek gheuncheak mhaka curpa melloun ghê; Jesucho ani Tache Povitr Maiêcho hanvem mog korcheak zoxe porim tuvem tancho keloi, ani tujêa sangata hanvem tankam mhozo ekvott korcheak sasnnanchea sukhant. Oxem Zanv.

 

EXEMPLO

1862 vorsa, Abrilachea muineant, Lyon xharant, Dubleancheam Lanam Boininche Ordichea Superiorak matareancheam antunnanchim chadram pizlelim ani galunk upkaro naslim meulim. Novim chadram addcheak Prokuradora laguim duddu nasle. Bhagivont Joséche vinotin zaite upkhar apnem adim ghetleat mhonn Superiorak ugddas ailo, ani tantlea chadrachi goddi korun onodvont Patriarkache imajicheam paiam laguim dovorli, ani tache adin keleat team dublleank visro naka mhonn taka poratlo. Dusrea disa, goddear boson iek tornom munis ailo, ani Superior Madrik apoili.

Ti bhair etoch tika tannem duddu dile, mhunnon, “he duddu tujêam dublleank chadram gheunk.” Madre zobor khoxi zali, Bhagivont Josécher tinnem visvas dovorlolo tachem tika borem pag meullem mhonn.

 

 

 

 

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

 

XXIX - EKONTISVo Dis

Nial ani Magnnim

BHAGIVONT JOSé SOGLE IGORJECHO PATRON

(1) Vhodde Podvecho Patron.

(2) Vhodda Bolleponacho Patron.

 

(1) POILO PONT– Zaiteam Bismancheam ani era lokacheam magnneank chit diun, Pio IX Papa Saibachea monant ghelem hea augodd tempar Bhagivont Pedrochea taruak iek Protector diuncheak, ani vhodda dobajan Bhagivont Josék sogle Igorjecho Patron mhonn tannem porgott kelo. Ani kuinchea Bhagivontak ache poros podveddar protector mhonn tachean porgott koru-eto?

Jesu zaka Sorgar ani sonvsarant sogli podvi dilea, tache sote khal raucheak raji zalo ani 30 vorsam tachem sanglelem aikolem. Hea sonvsarant astanam Bhagivont Joséchem magnnem bhou podveddar aslem tem to atam Sorgar ason unne podvechem zanvchenam; ani Igorz Math aplea vhodda Protectorachi kedi vhodd podvi vortouta ti dakoun dita jernam ti apnachean melloun gheum nozo tem tache vinotin magta. Zannar Dominican Isidoro de Hsle, tannem adim Zuztele vo Militante Igorjecho Patron mhonn taka titlo dilolo, Patronus militantis Ecclesiae; ani Bhagivont Thomas Aquino amkam sangta ki othmeancheam ani kuddicheam vostum thaim to amcho Patron vortouta mhonn. “Thoddeam Bhagivontank”, to mhunntta, “omkeanch vostunim amkam rakhcheak Devan podvi dilea, punn Bhagivont Josék dilam amcheam sogleam gorzanim amkam paucheak ani amkam sambhallcheak, rakhcheak, ani tacho adar magteleanchi bapaichea mogan zoton korcheak.”

 

Christanv othmea, heam vhoddam akantancheam disanim amchea Podveddar Protectorachi mozot magum-ia, ani Igorjek dhir di mhonn taka pratum-ia jicher zaitim vignam uprastat. Pio IX Papa Saiban mhunntlam ki Maria ani José, te don vhodd Igorjeche adar, munxeakullache callzant aplo mog rigoitat ani sonvsar novean salvar zatolo.

 

(2) DUSRO PONT– Bhagivont José tor vhodd podveddar vortouta, tech porim to vortouta bhou doiall Protector. To Igorjecho mog korta titlo kuinchoch Sant korinam, kiteak Igorje ani tache modhem soirigot asa titli konnankuch nam. Bhagivont Paulo sangta tea pormonem sogle Bhagivont mellon vortouta ti, êke baxen Dhonia Jesuchi Kudd; te vortoutat Tache sande ani êka-mekache sande; punn Bhagivont José sogleam bhavarteank aple putr kose polleta. To bhou otregta tankam pauncheak kiteak Bhagivont Josék sogleancho bhou vhodd mog asa. Tea pasot, vhodda visvasan tacho adar magum-ia ani to amkam pautolo, “Mhaka ugddas nam” mhunntta Bhagivonta Teresa, “kitench tache kodde maglelem to dinastanam raulo mhonn.”

Oi, Christanv othmea, Bhagivont Josécheam paiam laguim dimbi galum-ia ani mann dium-ia êke podvek ji noklo mer vo xim ani êka bolleponak jem soglea munxeakullak veng marta. Hea fuddem zaite pautti vhodda visvasan tachi mozot magum-ia. Sogle rochnenche zapen tor amchean uloum etem, zonn êkleak mhunno-etem, “Somoz ki Bhagivont José vortouta mhonn tuzo bhou vhodd ixtt, tuzo bhou podveddar protector.”

MAGNNEM

Bhagivonta José, tuji podvi ani tujêm bollepon mhaka urba dita tuji mozot magcheak. Hanv tujê kodde etam êka burgeachea visvasan jem aplea bhou mogall bapai kodde veta toxem; mhaka rakh, sogle Igorjek rakh, ji vortouta tuji famil ani Papa Saibak rakh, zo vortouta Dhonia Jesucho Vigar hea sonvsarant. Oxem Zanv.

EXEMPLO

Roma xharant revolusanv zalelem ternam 1848 vorsa, Bhagivont Joséche Ordiche religioz, zancho Convent, Campo Vakkino mhunntat thuinsor also, bhou kamplelet munxeanchea adaracho apnank borvonso nam mhonn sozmon Bhagivont Joséchi tannim mozot magli, ani tanchea podveddar protectorak tannim vhodda khot-khotean magnnem kelem. Akant vadta titlo tancho visvas tanchea Bapa sovem vaddo laglo.

Dis ani rat nallinche far aikon tanchim callzam bhirantin borlelim; kiteak lagxileam zaiteam gharancho ibadd kelolo, moron tea bori zaito lok, ani kuincheai vellar apnancheai Conventachi tich got zait mhonn te bhietalet. Amkam jive marlele Devak tor khoxi zalear mhunntlem tannim, Tachi khoxi zanv, punn Copellant morum-ia. Te sogle thuim ghele; modean rat zaleli, ani zaito vogot tannim rozar kelea uprant, bhieun ani kampon tankam nid poddli. Tankam itli bori nid poddli ki te uttchea adim dis udelo ani nallincho avaz, bomb futtale tancho sad; vo goram moddon poddtalim tanche gorgodd tankam kainch aikolenant. Osolea kampereache rati Bhagivont Josén tankam rakhle ani tachea vhodda adarak tannim bhou khot-khotean argham dilim.

Dusre pautti gavank veddo galolo ternam tanchea vaur korchea quartant iek bombacho gullo poddlo, ani te sogott sozmole ki apunn anink vanchonanv mhonn, punn Moriêchea Potin, tanchea kerit Patronan, tankam novean rakhle. Vhoddam ojapanim to bombacho gullo poddlolo thuincho uttlo, ani zonelantlean bhair soron rostear poddon futtlo, kainch luskan kori nastanam. Hi milagr zaiteam zannanim polloun te bhou ojap zale. Futtlolo to gullo Superioran Conventant addunk lailo, ani angounenchi bhett koxi Bhagivont Joséche imaji mukhar dovorl

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

XXX - TISVo Dis

Nial ani Magnnim

BHAGIVONT JOSéCHEM DEVOSANV KITLEM BOREM TEM

(1) Êk especial ritin tem amchea tempak dovorlam.

(2) Atanchea tempacheam gorzank tem bhou upkarta.

 

(1) POILO PONT– Devan nirmilem ki poilo José, Patriarch Jacobacho putr, zaito temp boddkondint ascheak, ani tachea prisanvantlo  taka vhodda manan soddoilo. Tech jinsim Devan kelem xem dista dusrea Josék, Jesuk Poslelea Bapaik. Zaite xekdde Bhagivont Joséchem Devosanv bhou thoddo lok kortalo. Devan Aple zanvaen hem Devosanv akantachea tempak ani Igorjecheam nimanneam zuzank dovorlem. Hea tempar Bhagivont Joséchem Devosanv zaito lok korta, tem vaddta, veguim-veguim vistarta, ani basaita zaitim besanvam. Bhagivont Joséchea mannak zaiteo Igorzo, irmiti ani Altar bandleat, tachea adara khal zaiteo sociedadi ani firgozo dovorleat, ani atam iek soglo muinno kusin kaddun dovorla taka mann diuncheak. Zaite munis disachea disa tachem Devosanv kortat mannan, visvasan ani mogan. Devachea inspirasanvan Igroz Mathen Bhagivont Patriarkak cruttanim Sant asat tantlo meklo (distinguir) kori nastanam dovorlolo, hea tempar soglea tachea vhoddponanchea porzollan taka dekol korta soglea sonvsarak ani sogleam apleam putank, Bhagivont José kodde vosat mhonn sangta ite ad Joseph. Tache kodde visvasan vosat, kiteak sogle Catholic familicho Protector mhonn teka porgott kelo, ani vhodda dobajan tachem Fest korta zoxem korunk favo Devachea Garachea Cunvrachem ani Dhoniachem. Christanv othmea, amchea mogall Patronachem Devosanv itlea bolleponan kollit kelem dekhun Devak argham dium-ia ani amchean zata titulem hem Devosanv vistarcheak vaurum-ia. Oi, hea fudde Bhagivont Joséche urbevont apostl ani bore chakor zaum-ia. Amchea mornanchea vellar kosolem dadospon amkam bogchenam zait, amim kollit kelem dekhun Devosanv Jesuk Poslelea Bapaichem, Moriêchea Potichem, ani sogle Igorjechea Patronachem!

 

(2) DUSRO PONT– Hea khontichea ani uskeachea kallar zantum amim jietanv, Bhagivont Joséchea Devosanvam poros kosolem anink vodik gorjek poddta tosolem Devosanv asue? Tin vhoddam noxttam munxeakullak cheptat ani Igorje Mathek dukh ditta; familim modhem ekvott nam, zonn-êklo khoxi korunk sodta ani vauraddeam modhem ekvott nam. Bhagivont Joséchem Devosanv vortouta bhou podveddar vokot heam tin gaiank. Familincheam vhodilank je apli avoi-bapaichem sanglelem aikonant, tankam amim dakoitanv Bhagivont José familincheam bapaincho model, ani Jesu zo sodanch tachem aikotalo. Atanche pinkeche munis je kainch sodinant bogor dadospon ani khuxalkaeo, ani teo melloun gheuncheak vavurtat tankam, amim dekh ghê mhonn sangtanv Bhagivont Joséchi zo vortouta bhou nigut nirmoll, apli interes sodi naslolo, dublo ani aple vaurachea gharan gupit jietalo; ani xekim dubleam vaureaddeank amim ditanv Bhagivont Josék tancho Patron mhonn. To apununch iek vauraddi vortouta, zacho êkuch xevott vortoulo êk bitorlem ani nenttuvaechem jivit jieuncho, Jesu ani Moriê sangata ekannem Devachi chakri korcho.

 

Hea vhodda Santachem Devosanv amcheam gorzam zoktem vortouta dekhun, ani Devan taka aplea gharacho Dhoni kela dekhun, zoke porim adlea tempar purvilea Patriarkak Egyptacho Dhoni kelolo, jea vorvim Israeliche porjek voron sambhallun dovorlo. Jacobacheam putrachi dekh gheum-ia, ani amkam amim melele naka zalear Bhagivont José kodde vochum-ia. Sonvsar vhodd dukoll poddla, ani jevon falt asa tem vortounam amcheam kuddink posta to unddo, bogor to jivo unddo zo posta amcheam othmeank, tem vortouta sot jem uzvaddaita amchi mot, ani curpa ji amkam povitr korta. Oi, Bhagivont José thaim vochum-ia, ani to amkam ditolo Dhoni Jesu, vinchun kaddleleanche goum, vattsurancho Povitr Unddo.

 

 

MAGNNEM

Onodvonta Patriarka, atanche kallacheam munxeank tujêa adarachi kitli goroz asa ti amim bore baxen zannoum, khoteponam sanddcheak ani munxeanim aple othme salvar korcheak. Amim nicheu kortanv chodd ani chodd tuzo mog korcheak vhodda visvasan tujê kodde magcheak, ani erankui tuzo mog ani Devosanv korunk launk vavurcheak; tea pasot, Bhagivonta José tujêm bapaiponachem besanv amcher ghal.

 

EXEMPLO

Zaite munis Bhagivont Josék vattsurancho Patron mhunnttat, ani sokla dilea ti khobor amchem khorepon dakoita. Êka tornea munxeak, zo vepareancho udeog kori, ukum dili Havre than Marsella xharant vecheak. To aplea gauncho bhair sorchea adim, taka adeus kortanam tache boinnin Bhagivont Joséchi iek imaj tache judiechea bolsant gali, ani teach borobor taka besanv gal ani boreponim add mhonn tea vhodda Santa laguim tinnem maglem. Tarum Cadiz bhair pautoch, voir choddon dor got kôr mhonn taka Copitan sanglem. Hem kam kortanam tem dor, jem oskot zalelem, tutton to doriant poddlo. Boro piunnar also dekhun to tarva sorxem vochonk korunk laglo punn kiteak upkaronam zalem. Taka boll nam zait vetalem ternam aple boininchea magnnean ani Bhagivont Joséche imajichea ugddasan taka novi gotai dilelea porim diso lagli; bhavartan ani visvasan tannem ulo marlo aplea Sorginchea Protectorak ani aplo jiu vattait zalear taka Mis din mhonn angoilem. Tachem magnnem rokddench aikolem, kiteak diso naslolo hat taka larancher sambhallta so diso laglo, to doriek gott dori porian ji itlea mhunnosor tarvar than uddoileli. To Havre pautoch veguim-veguim apli angoun farik korcheak ghelo, ani apnak mornantlo vattailo dekhun Bhagivont Josék argham diuncheak Mis dilelem tem aikolem.

Tech porim amim amcheam viagincher besanv ghal ani sogleam vignantle amkam nivar mhonn taka prathon korum-ia.

 

 

 

 

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

XXXI - ECTISVo Dis

Nial ani Magnnim

KONN TE PORIM BHAGIVONT JOSÉCHEM DEVOSANV CORUNK ZAI TEM

(1) Disachem Devosanv.

(2) Sumanachem Devosanv.

(3) Vorsachem Devosanv.

 

(1) POILO PONT– Amim atam Marsachea muinneachea nimannea disa pauleanv, muinno zo Bhagivont Josék somorpila ani to vortoulo amche vhodde buzvonnecho. Punn to kobar zaunchea adim amim bore nicheu korunk zai je amkam mozot ditele amchea Bhagivont Patronachem Devosanv sodanch korunk, tacho mog korunk ani taka mann diunk. Tachea mannak kiteim punn rozar korinastanam êkui dis bolandunk dinam zauncheak nicheu korum-ia, ani sokallchem uttanam ani ratchem nidonk vechea adim sodanch mhunno-ia Jesus, Maria ani José. Him Povitr Navam disa modhem ghetlear Jakulator magnnem zata, vodik korun talni etoch ani akantachea vellar, vo jernam amim kosolei sakrifis korcho poddta. Santa Getrudin êka vizaunvant pollelem ki offis mhunnttanam religiozanim Bhagivont Joséchem nanv ghetlea upran Sorgavele othmem vhodda mannan tokleo bagaitale te. Monant dorum-ia ki jitle pautti Devosanvan hem Povitr Nanv amim ghetanv titlei pautti amcho Anj Rakhnno vhodda mannan ani mogan tokli bagoita mhonn.

 

(2) DUSRO PONT– Bhagivont Josécheam devotam sangata, nicheu korum-ia Budvarachea-Budvara hea vhodda Santak vodik mann diuncheak ani tea disa tachem kherit Devosanv korcheak. Sunkrar Consagrar kela Povitr Callzak, Sunvar Ankvar Moriêk, ani Budvar Bhagivont Josék. Tea disa tachea mannak Mis aik ani Saib gheunk zainam zait zalear Communhanv Spiritual punn ghê. Amchea Dhonian êka Santak kollit kelam kitlo To khoxi zata to heam Spiritual Communhanvam vorvim ani hem sanglelem dakoun don kalci, êk bangarachi, ani dusri rupeachi, ani tea Santak sozmoni dileli ki bangarache kalcint Sacramental Communhanv asle mhonn, ani rupeache kalcint Spiritual Communhanv. Tech porim dor Budvara kosoloi mortifikasanvacho akt korcheak vaurum-ia  zanv bitorlean vo bhailean, vo ismol galcheak vo kosoli-i vost korcheak Bhagivont Joséchea mannak.

 

(3) TISRO PONT– Amcho nimano nicheu zaunk zai dor vorsa visvasan amim Bhagivont Josécho muinno pallcheak. Kitleo curpa ani besanvam amkam melloun ghenam zait ho muinno! Bhagivont Joséchea muineachem dispottem Devosanv amkam mozot ditelem Corezm povitr korcheak ani Paskanchea Communhanvachem aitomon korcheak. Muinneak iek dis amim kherit kaddun ani êk supurlo retir korin zalear bhou adavachi vost vortouta. Bhagivont Joséchem Fest, Marsache 19ver bolandunk diunk favonam, kosolem punn aitomon kori nastanam; hem korueta Novenam korun, ani tim kobar zatat tea disa Povitr Communhanv gheun tachea mannak. Amkam ismol galxi tank asa zait zalear, tea disa thegham bikareank ismol gallear bhou borem, Povitr Familicheam theghaim membranchea manank.

 

Christanv othmea, aichea disa, hea muinneachem Devosanv  kobar kortanam, Bhagivont Joséchea Altara mukhar bettoum-ia he amche nicheu. He nicheu amim sambhaullea puro nirvonnan amim moro porian. Te vortoutele iek kunam amchea mogacho ani Devosanvacho amchea Bapaik ani Protectorak, ani amkam te vortoutele oromb zaiteam besanvancho. Bhagivont Joséchea hatant te amim dium-ia, ani taka praton korum-ia amkam curpa melloun ghê mhonn te visvasan sambhallcheak.

EXEMPLO

Iek Padri, zo 1867 vorsa Africachea Missanvant aslo, sangta koxe jinsim Bhagivont José pauta to tache kodde magteleank.

Tea Missionarachea Bispan taka formailelem tache khall district asli ti bouncheak, punn sodanchea tempar vochonk tankonam zaun udok mellonam tosolea tempar tannem bhair sorchem poddlem, jea vorvim tacheam gorvank chorou mellonam zaun gaum bouncheak bhou augodd lago-laglem, Sul Africant tonn nam, punn supurlim zaddam zatat zancher zanvaram jietat. Padri bhair soron iek dis zalea uprant iek mataro Italian vauraddi Missanvachea ghara laguim paulo. To ailolo 50 kos vatt cholon Sacrament gheunchea pasot, kiteak aple dis laguim paulet mhonn to sozmotalo. To mataro buim poddon vo tacher kitem poddon patt bagouleli ani domprank hat tenkon taka cholchem poddo. Osole tonnir, zaite dis ani rati vatter sarun, to mataro 50 kos vatt cholon ailolo.

Missanvanchea ghara laguim pautoch tannem Padrik vicharlo; tea garantlea munxean taka sanglem ki Missionar Padri kal bhair soron ghela ani to kernam portot to sango nozo mhonn. To mataro zobor chintest zalo hem aikon, zaitim vorsam apnak Padri mellonk nam mhunno laglo Cumsar zauncheak, nam thoddech dis zale Ouddtshoorn gavant Padri asa mhonn apnem aikolear.

Thodde dis thuim ravon to mataro aplea ghara portolo dusrean ti lamb vatt cholon. Itlea mhunnosor Missionar Padrik bilkul udok mellonam zaun tannem rauchem poddlem. Tannem visit kelolo to ganv taka atvo aslo ani taka vatt dakounk konn iek naslo. Laguinch tannem iek supurlo dongor dekon êk ghor punn distti poddta zalear pollounk to tea dongrar choddlo. Taka êk setkamteachem ghor diso laglem, tea pasot to apleam gorvank gheun tea ghora laguim ghelo. Tannem darar martoch, setkamti bhair ailo ani taka vichar kelo to konn ani kiteak aila gai mhonn. Padrin taka ho zabab dilo: “Hanv Catholic Padri mhojê firgojek visit korunk bountam, punn mhojêam gorvank udok mellonam zaun mhojêan fudde vocho nozo zalem.” Setkamtean to Catholic Padri mhonn aikotoch taka sanglem apunn Protestant mhonn punn thuim iek Italian Catholic zaitim vorsam than asa ani to atam mornache tonnir asa mhunnon tea Padrik tache sorxem velo.

Chinti nastanam tea Padrik polloun to mataro bhou khuxal zalo. Maguir Padrin taka Cumsar kelo ani ti rat tache sorxem raulo, ani dusrea disa Altar ubo korun Mis mhunntlem ani taka Saib dilo ani Sontesanv lailem. Tea disa modhem to mataro melo; tannem Missionarak sanglem ki aple avoiche sikounen dispotti apunn hi Jakulator mhunnom mhonn, “Bhagivont José mag mhojê pasun hanv borem morn morcheak.”Tachem magnnem aiko nastanam urle nam, kiteak Africachea taplelea dongravelean Bhagivont Josén Padri daddlo taka Cumsar korcheak, ani nimannem Sacrament diuncheak, he jinsim to borem morn moroso kelem.

 

Ho muinom kobar zaunchea adim tea dublea matareachi dekh gheuncheak nicheu korum-ia, ani nidonk vechea adim sodanch mhunno-ia, zoxem to mhunnttalo: “Bhagivont José mag mhojê pasun hanv borem morn morcheak.”

Uprant: ‘Sam Josécho Têrs’ ani ‘Sam Joséchi Ladain’ ani her ‘Magnnim’ pagn 53, 54, etc.

Familiche Bessaum

Têrs mhunnun somp’lea uprant, sonvoim amcheam gharamnim, vhochunk voddilam mukhar, tachem bessaum gheunk, mhunnun:

Dev Bori rat somestank dium,

Assul’leank bolaiki ani Curpa;

Meloleank sasnnanchem Sukh.

SAM JOSÉCHEA MANNAK tÊrs

(Mhunnuk Ruzai Saibinnichea Contar)

( Duljens 100 dis )

 

KHURSAR CONTACHEA:

V. Bokta José, ixtta Dhonia Jesuchea Callzachea,

R. Amche pasun vinoti kôr.

MOTTEAM  FODDEANCHER:

( Amchea Bapache suater)

V. Bokta José, Bhagivontam modhem, vinchun kaddlolo Bhagivont,

R. Zauncheak Poti Ankvar Moriêcho ani sambhallar Bapui Dhonia Jesu Christacho.

DAKTTEAM  FODDEANCHER:

(Noman Moriênchea suater)

V. Bhagivonta José, kednanch tum amkam sanddunaka,

R. Pau amkam, amchea mornachea, akantachea vellar.

MOTTEAM  FODDEANCHER:

(Onod Bapache suater)

V. Bokta José, ixtta Dhonia Jesuchea Callzachea,

R. Amche pasun vinoti kôr.

Panch khonn somptoch (xevttim 1 pautt mhunn)

Povitra Callza Jesuchea, Tum amche churchure kôr.

Khotavinn Callza Moriêchea, amche pasun vinot kôr.

 

Ladain bhagivont joséchi

( Disak 300 dis duljens )

Dhonia amchi kakut kôr, Dhonia amchi kakut kôr

Christa amchi kakut kôr, Christa amchi kakut kôr

Dhonia amchi kakut kôr, Dhonia amchi kakut kôr

Christa amkam aik, Christa doien amkam aik

Deva Sorginchea Bapa, amchi kakut kôr

Deva Putra Sonvsarachea Sorvonddara, amchi kakut kôr

Deva Spirita Santa, amchi kakut kôr

Santism Trinidadi, Êkleach Deva, amchi kakut kôr

Bhagivonti Moriê, mche pasun vinoti kôr

Bhagivonta José, amche pasun vinoti kôr

Davidachea Navadik Putra, amche pasun vinoti kôr

Patriarkanchea Porzolla, amche pasun vinoti kôr

Devache Maiêchea Poti, amche pasun vinoti kôr

Ankvar Moriêchea Nirmoll Rakhnnara, amche pasun vinoti kôr

Devachea Putrachea Posnnara, amche pasun vinoti kôr

Christachea Zagrut Sambhallnara, amche pasun vinoti kôr

Povitr Familichea Mustoka, amche pasun vinoti kôr

José, Bhov Nitivonta, amche pasun vinoti kôr

José, Bhov Nikllonka, amche pasun vinoti kôr

José, Bhov Xannea, amche pasun vinoti kôr

José, Bhov Ghottaechea, amche pasun vinoti kôr

José, Vhoddilank Sodanch Aikotelea, amche pasun vinoti kôr

José, Bhov Visvaxea, amche pasun vinoti kôr

Sosnnikaechea Arxea, amche pasun vinoti kôr

Durbollkaecho Mog Kortelea, amche pasun vinoti kôr

Vavraddeanche Dekhi, amche pasun vinoti kôr

Gharachea Jivitachea Surungara, amche pasun vinoti kôr

Ankvarinchea Rakhnnea, amche pasun vinoti kôr

Ghorabianchea Khambea, amche pasun vinoti kôr

Nirbhageanchea Buzvonddara, amche pasun vinoti kôr

Piddestanchea Bhorvanxea, amche pasun vinoti kôr

Mornank Pauleleanchea Askarea, amche pasun vinoti kôr

Deucharanchea Kamperea, amche pasun vinoti kôr

Bhagivont Igorjêchea Sambhallnara, amche pasun vinoti kôr

 

DEVACHÊ XELLIÊ sonvsarachim patkam kaddtele, amkam bhogos Saiba

DEVACHÊ XELLIÊ sonvsarachim patkam kaddtele, doien amkam aik Saiba

DEVACHÊ XELLIÊ sonvsarachim patkam kaddtele, amchi kakut kôr

 

V. Devan taka kelo, Aplea garacho Dhoni,

R. Ani Kunvor sogllea Aplea vitacho.

Prarthum–ia

Êh Deva, sangun sarunozo tosole zanvaen, Tuka puttoulem vinchun kaddcheak Bhagivonta Josék, zavuncheak to Poti Tujê Bhov Bhagivonti Maêcho; porathun magtam amim Tujê lagim, nirmi mhonn, to zaka amim mann ditam sonvsarant amcho sambhallnar mhonn to zavuncheak amcho Askari Sorga Rajant. Oxem Zanv.

Bhagivont Josék

Magnnim

 

Devosanv Marsachea Muinneak (Bhagivont Joséchea, sogle Igorjechea Patronachea mannak hem supurlem magnnem ani versile mhunnun especial upkhar melloun ghetleat):

 

Poilem Magnnem

Onodvonta Bhagivonta José, Dhonia Jesuchea visvasea sangatea, ubarun tuka amchim callzam ani hat tuji podveddar vinot amim magtanv amcheam othmeank ani cuddink. Jesuchea Mogall Callza lagchi goroz, ti mozot ani curpa amkam melloun gheuncheak, vodik korun borem morn, morchi curpa, ani kerit upkhar amim atam magtanv (anga sang kosolo to). Êh Dev-Putrachea Rakhnnêa, tujim magnnim amcheam pasun Dev aikotolo mhonn amchim callzam visvasan bortat.

 

Maguir 7 pautti hi versiklo mhunnonk zai Bhagivont Josécheam sataim sontosank vo sataim dukink.

 

V. Êh! Onodvonta Bhagivonta José, tuka Jesucho mog asa tea pasot ani Tachea Nanvachea Onoda pasot.

R. Aik amchim magnnim ani amim magtanv to upkhar melloun ghê.

 

Prarthum-ia

Onodvonta Bhagivonta José, khot naslele Ankvarichea Poti, mhaka melloun ghê êk nirmoll, nentuvae ani cakutvont mon ani supurn resignasanv Devachea khoxek. Soglea mhojêa jivitant tum za mhozo rakhno, bapui ani model ki mhaka moronk favo zaisem, zoso tum meloi Jesuchea ani Moriêchea hatancher.Oxem Zanv.

Magnnem Bhagivont Josék kosoloi iek sonvsarantlo (temporal) upkhar melloun gheuncheak:

 

Dusrem Magnnem

Vhodda Bhagivonta José, Jesu ani Moriê kodde tum sorv podveddar vortoutai; ani tujê laguim magleli vost kernanch mellonastanam uronk nam, tujêam paiam laguim sorpott hanv poddtam ani thir ani jivea visvasan tujê laguim magtam mhaka melloun ghê mhonn (anga sang tuka koslo upkhar kelolo zai to); punn hanv magtam to upkhar tor Devachea Onodar add eit ani mhojêa salvasanvak upkaronam zait zalear mhaka curpa melloun ghê Sorginchea Bapache khoxer hanv mogan raji zauncheak, zo, mhojêr dukh daddun vo hanv magtam to upkhar korun hanv pirder zainam zauncheak ani vhodd adau ani sasnanchem sukh mhaka mellcheak. Oxem Zanv.

 

 

Bhagivont Josék êka patkeachem conversanv melloun gheuncheak:

 

Tisrem Magnnem

 

Prarthum-ia

Bhagivonta José, hanv tuka pratitam hea othmea N……. pasot zaka Jesun Aplea Amolik Rogtan soddoila. Tum zannoi vhodda bhagivonta kitle nirbagui vortoutat te munis, zannim apleam callzantlo Dev-Sorvonddarak bhair galea uprant, sasnanchea sasnank to pider zaunv-iet, tea pasot nirminaka hea othmeank zo mhojêa bhou mogacho vortouta, Jesucho dusman ascheak. Uzvaddai tachi (tichi) mot gomcheak akant (perig) je taka (tika) guirasunk sodtat, vhoddlean uloi tachea (tichea) callzak; vichitr putrak (duvek) portun add boreantleam borea bapaichea gopant; taka (tika) sanddunaka,

 

Sorgachim daram tum taka (tika) ugttim kori poriant, zoim to (ti) apnak sukh melloun ghetleim mhonn tuka porkondtolo.Oxem Zanv.

Borem morn melloun gheuncheak magnnem Bhagivont Josék:

Choutem Magnnem

Prarthum-ia

Bhagivonta José, mornanche tonnir asleleancho tum vortoutai Modello, Patron ani Buzvonddar, hanv aiz ailam tuzo adar magcheak mhojêa jivitachea nimannea horar, tea kampereachea vellar tuji mozot magcheak mhaka gottai ani sintid nam zanv iet dekhun. Hanv bhagivontanchem morn moroso kôr mhonn tuka pratitam ani hi curpa mhaka favo zauncheak, hanv tujê baxen Jesu ani Moriê ujir jieso kôr ani kernanch tankam okman korinamso kôr patok adarun.Nirmi ki hanv moroso mhaka mhojêam paixanvank, sogleam sonvsaracheam khoxeank, ani sorv vostunk jea vorvim hanv jieuncheak Tachech pason zo melo mhojê passun. Jesus, Maria, José, tumche mozotichea borvonsean hanv he nicheu kortam; mhoji cakut korat atam ani mhojêa mornachea vellar, ani tumchim Povitr nanvam gheun hanv melear puro.Oxem Zanv.

 

Consagrasanvacho ACt Bhagivont Josék

Onodvonta Bhagivonta José, sogleam Santam modhem tuka vodik mann diunk favo, tuzo vodik mog korunk favo, tuka vodik ulo marunk favo tujêam sumpurn segunam pasun, tujêa onodachea vhoddpona pasun ani tujê vinotiche podve pasun, hanv anink êk pautt tujêam paiam laguim sorpott poddtam ani mhaka sogloch tuka somorpitam atam ani sodam sorvotam. Nomoskaranche Trinidadi ujir, Jesu tujêa Posilelea-Putra ujir, ani Moriê tujê Khot Naslele Potini ani mhojê Maiê ujir hanv tuka somorpitam mhoji mot, mhojêm calliz, mhojim chintnam, mhojê sentiment, mhojê visove, mhojêo korneo, sorv jem asa mhojê thaim ani mhojêm soglem jivit. Hanv tuka bettoitam mhoji famil, mhozo avoi-bapui, mhojê ixtt ani mhaka borem kornar, jive ani melele, bhagivont ani patki, duble ani dukhest, vaittakar ani mornahce tonir aslele! Hanv khori bas ditam, mhojêa mogalla Bapa, Tuka kernanch visronam zauncheak, tuka mann diuncheak soglea mhojêa jivitant, ani mhaka tankta te baxen vavurcheak tujêm Devosanv kollit korunk. Hanv tuka pratitam, mhojea poddvedar Rakhnarak tujêam visvansancheam chakram modhem mhaka gheuncheak, ani mhaka pauncheak soglea jivtitant. Mhaka sandunaka, Saiba, mhojêa mornachea vellar, punn melloun ghê iek dis tujê sangata hanv razvott koriso Sorginchea Onodant ani Sukhant. Oxem Zanv.

Apnnanchi Bhett Bhagivonta Josék

Éh, Bhagivonta José, Dev Putrache Ankvar Maiêchea ankvar poti, ani Dhonia Jesu Christachea Rakhnnara ani Posnnara bapa! Hanv korta aiz mhaka, iekanne tujê adin, Jesu ani Moriê huzram, mandun tuka, tum mhozo sambhallnar Bap mhonn. Zorui mhaka nigut favona bhag, zanvcheak iek gorib ani nimanno chakor porian, tujêa ghorabeacho; toruipunn patieun ravta tujê cakutir, tujêa bholleponnan korun ghetoloi mhonn mhaka, iek khalto gulam, Devachea Povitr Ghorabeacho, zache mustok tum vortotai. Xikoi mhaka, Bhagivonta José, xeva korcheak tujê Bhagivont Potinichi; mann diuncheak Tika, ti mhoji Ranni mhonn; ani mog korcheak ticho ti mhoji Mai mhonn. Teach bori sikoi mhaka, Bokta José, hanv moro porian mog korcheak Jesucho, sorvoia vostu pros odik. Zoxem hea sonvsarant, Jesun ani Moriên kelint apnnak iekanne tujê suadin, tuvem korcheak tancho sambhall; tosoch hanv mhakai sodtam iekanne tujêa hatant, mhozo sambhall korcheak ani mhojê huske tuvem vorcheak. Jesu ani Moriê uprant, hanv somorpita tuka, mhoji kudd ani mhozo othmo, ghor ani sonvsar, ani mhozo sasnancho fuddar. Sambhall kôr mhozo, zagrut Rakhnnara, sodankal hea jivitant ani odik korun mhojêa mornachea vellar, tia akantachea vellar, êh, podvedara Bokta, tum mhojê boglek rau, Jesuk ani Moriêk gheun, di terna mhaka, tuji buzvonn ani ghottai, ani xeki favo kôr mhaka bag, tumchea sangata sasnnanchea sasnnank, porkondcheak Devak Sorga Rajant. Oxem Zanv.

Bhettounk Burghuim Bhagivont Josék

Vhodda Bokta José! Tum asloi bapaichea zagear, amchea Dev-Tarokak! Amim bhettoitanv ani sanskartanv tuka him burghuim. Bholleponnan za heam burgheank bap ani rakhnnar; sambhallun dovor, tanchem moladik nirmoll-ponnachem bhanddar; vattai tankam soglleam vignantle kuddi ani othmeanchea, nipji tanche thaim, ginian futta tethun than, dulob mog tuka, Moriêk tujê sodanch Khotavinn Potinik ani Jesuk tichea Onodvont Putrak. Tuji podvechi sasai asonv heam burgheam bori, tanchea sogllea jivitant, rakh tankam tancheam somestam vattanim, choloi tankam salamontim soglleam tancheam kamanim; vor tankam sodanch Devachea upordesancheam rosteanim; ani tanchea mornachea vellar bhitor kadd tankam Sorginchea Jeruzalean, thuimsor sasnnanchea sasnnank vakanncheak Cakut Devachi ani bapaichem bholleponn tujêm. Oxem Zanv.

 

Bhagivont Joséche Upkhar Magon Gheunk

Poti Moriêcho: Bhov pritivonta poti Sodanch Ankvari Moriêchea, mhojêa bhov mogalla Askarea, Bokta José! Hanv tuka lagim sorta, tea tujêa sataim koddu dukhim vorvim, zannim vidarlem tujêm calliz, tujêa sonvsarantlea jivitant; ani dukhanim bhoron mhojê dolle, hanv tujê mukhar ghalta hem mhojêm magnnem, jem mhojêa callzak thar dinam. Mellun ghê mhaka, êh, vhodda Bokta, ho mhojêa vhodda otrekancho upkhar, ugddasak mogache sambhallnechea, Moriên tuji kelele tum mornache tonnir pavloloi terna. Vor mhaka Moriêchea Cakutichea Siasonna mukhar ani mhunn Tika: “Churchure kôr êh Moriê, he gorib rochnnenchê, moga katir hanvem kelelea tuzo, mhojê apurbaieche potinicho.

1 Amchea Bapa, 1 Noman Moriê ani 1 Onod Bapak…

Bap Jesucho: Bhov pritivonta poskea bapa Jesuchea, mhojêa Tarokachea. Hanv ietam tujê hujir, ani sataim sontosam khatir, zanni tujêm calliz dadoxi kelem, hanv tujê mukhar ghalta hem mhojêm magnnem; jem mhojêa chitnank thar dinam.Mellun ghê mhaka, êh vhodda Bokta, ho mhojêa vhodda otrekancho upkhar, ugddasak ojeapvont buzvonnenchea, Jesun tuka dilele, tujêa jivitachea nimannea horanim. Vor mhaka Tachea chodd Bholea ani Ud’dar Callza mukhar, ani mhunn Taka:  “Churchure-kôr, Êh, Jesus, churchure-kôr he gorib rochnnechê moga khatir hanvem kelelea Tuzo, mhojêa vhodda moga ani apurbaechea Putracho.”

1 Amchea Bapa, 1 Noman Moriê ani 1 Onod Bapak…

Rakhnnô Jesu ani Moriêcho: Êh bhov visvaxea rakhnnea sonvsarant team donuim Sorginchea bhanddaranchea, mhojêa bhov mogalla bapa ani Askarea, Bokta José; hanv khalteponnim tuka lagim sorta, polleun dovlot ani dobazo vhodda dennea ani upkarancho, tuvem Sorgincho ghetlelea, hanv ghaltam tujêa hatant, mhojêa axen bhorlelea ani ugttea callzan, hem magnnem zachi mhaka vhodd goroz. Mellun ghê mhaka êh vhodda Bokta ani asirvadanchea bapa, ho upkhar zo hanv magtam, ugddasak tujêa sangun sarunozo tosolea onodachea, tuka dilelea Santisim Trindadin, Jesun tuka Sorg ugtto-kelea uprant. Vor mhaka Devachea Cakutichea Siasonna mukhar ani mhunn: “Êh bhagivonti Trinidadi, churchure-kôr he gorib rochnneche, khaltea mannan, ani moga khatir hanvem Tumcho kelelea sonvsarant, ani hea bhov vhodda onoda khatir, Tumim bholleponnan mhaka dilelea Sorgar.”

1 Amchea Bapa, 1 Noman Moriê ani 1 Onod Bapak…

 

Tin Jaculator: (Khoxi zalear mhunncheak hanga vo kernam ugddas ieta terna).

1. Nirmi, êh, povitra José, ason sodanch sugur tujêa asrea khal, amim sarcheak amchem jivit, guniavam viret.(300 dis duljens)

2. Bokta José, poskea bapa amchea Dhonia Jesu Christachea, ani khorea poti Sodanch Ankvari Moriêchea, vinoti-kôr amche khatir. (300 dis duljens)

3. Bokta José, rupkara ani rakhnnara, Jesuchea Povitra Callzacho mog korteleanchea vinoti-kôr amchea khatir. (300 dis duljens)

Sat Dukhi ani Sat Sontos Bhagivont Joséche

(Duljens 100 dis pautthik. Budvaram dis mhunntlear 300 dis. Donuim Festancheam Novenanim mhunntlear 300 dis dor disak. Dispot’ttem mhunntlear, purem muinneank iek pautt. Hem bhettonv ieta Purgotorintleam othmeank.)

 

Aitomonachem Magnnem

Prarthum-ia: Pau amkam, Êh, Dhonia, amim magtam Tujê lagim, ani je amchean zoddunozo amchech ostogi, te amkam melloxe kôr alaxirea vorvim potichea Tujê Bhou Povitr Maiêchea. Tujê vorvim, zo jietai ani rajvott choloitai Deva Bapa sangata, Sprita Santachea ekvottan sasnanchea sasnank. Oxem Zanv.

 

Muktivonta Patriarka, Bokta José, Jesu ani Moriêchea firkirvont rakhnnea, vinoti-kôr amche khatir atam ani amchea mornachea vellar. Oxem Zanv.

 

I - Poili Dukh ani Sontos: Niallu-ia amim Poili Dukh Bhagivont Joséchi:

Poili Dukh: “Gondoll, kollona zanv sanddun vechi vo nam ti, aple Ankvar Potinik, tika avchituch gorbest polleun.”

Ani tacho Poilo Sontos: “Ieka bodvean forhun sangtoch guth Devachea Putrachea mumxeaponnancho.

Niall: Êh! Nikllok ani povitr José; kosoli dukh ani khont boglina tuka, avchituch sanddchi portoch tujê patkavinn potinik; punn kosolo sontos boglona tuka, ieka Anjean tuka kollit kortoch, Devacho Putr Ankvariche udorint zolmola mhonn. He tujê dukhi ani sontosa pasun, mellun ghê amkam, purn nirmollkai othmea ani cuddichi; boll zoit vorcheak tallneam ani addkholim voir; curpa peleachim vaitt kolponna monant dhorina zauncheak; ani adar Anjeancho, pallcheak amim amche kaide Deva ani pelea sorim. Oxem Zanv.

 

1 Amchea Bapa, 1 Noman Moriê ani 1 Onod Bapak…

II - Dusri Dukh ani Sontos: Niallu-ia amim Dusri Dukh Bhagivont Joséchi:

Dusri Dukh: “Polleunk Ballok Jesu zolmololo bikharponnant, nam zanv kuvet divuncheak Moriêk ani Jesuk bhidar ani vostram.”

Ani  tacho Dusro Sontos:“Ontrollar uzvadd polleun ani aikon khoxechim gaionam Anjeanim kelelim.”

Niall: Êh! Povitr José, Sorgache apurbaechea Santa; Devan tuka vinchun kaddlo zavuncheak tum posko bap Aplea munis zalelea Putracho; tor kosoli dukh tuka bhoglina, polleun Taka zolmololo itle durbollkaen. Punn kosolo sontos tuka rokddoch bhoglona, aikon gaionam boddveanchim ani polleun onod te porzollit ratricho. He tujê dukhin ani sontosa pasun, tuka prarthanv, magun ghê mhonn amchim callzam zavuncheak purtim biddharaum, tujêa Altaravelea Sacramentant rarvlelea Putrak, ani amchi mot, ginian ani khoxi, amim choloun curpechea uzvaddan, amim pavncheak Anjea sangata korcheak gaionam. Oxem Zanv.

 

1 Amchea Bapa, 1 Noman Moriê ani 1 Onod Bapak…

III - Tisri Dukh ani Sontos: Niallu-ia amim Tisri Dukh Bhagivont Joséchi:

Tisri Dukh:“Polleun rogot aplea mogal Putrachem, varoulelem sunot kortanam.”

Ani tacho Tisro Sontos:“Poile pavth tonddi ghetoch Povitr Nanv Jesuchem.”

Niall: Êh! Onodvonta Bokta José, khurapotin pallo ditelia Devache sumurtik! Kosoli dukh tuka bhoglina, Ballka Tarokache sunoti vorvi, poilem rogot varovl’le polletoch; punn kosolo sontos tuka bhoglona, poile pavth uchartoch nanv Jesuche, tea disa ghalelem. He tujê dukhi ani sontosa pasun, mellun ghê amkam, khori dukh amim adarleleam patkanchi; curpa fuddarak pollouncheak patkanchea sorv soegantle; ani xekim bhag, morcheak gheun dulob Nanv Jesuche callzant ani tonddim.Oxem Zanv.

1 Amchea Bapa, 1 Noman Moriê ani 1 Onod Bapak…

IV - Chovti Dukh ani Sontos: Niallu-ia amim Chovti Dukh Bhagivont Joséchi:

Chovti Dukh: “Chintun koxtt-volvolle Jesu ani Moriêche, Bhagivont Simeavan adinch kollit kelele.”

Ani tacho Chovto Sontos:“Tachech tonddim aikotoch, tea koxttam vorvim zavunchi asa mhonn Sorvond somestam othmeanchi.”

Niall: Êh! Visvaxea Bokta José; Bagelea Jesuchea, munxeakullache Sordvonnint; kosoli dukh bhoglina tuka, Bhagivont Simiavan sangun ditoch, koxtt ani volvolle, je mukhar sosche aslet tujê Potinin ani Dev-Putran! Punn kosolo sontos tuka bhoglona, kolltoch tea koxtta vorvim zaunchi asli mhonn somesta othmeachi Soddvon ani Jivontponn! He tujê dukhi ani sontosa pasun magun ghê amkam movall ani cakutsar calliz, churchurcheak peleachea dukhik ani nirbhagak; ani punea vorvim Dhonia Jesuchea ani magnnea vorvim Ankar Moriêchea, favo zauncheak amkam bhag, sasnnank ascheak onodan jivont zaleleam modhem.Oxem Zanv.

 

1 Amchea Bapa, 1 Noman Moriê ani 1 Onod Bapak…

 

V - Panchvi Dukh ani Sontos: Niallu-ia amim Panchvi Dukh Bhagivont Joséchi:

Panchvi Dukh:“Polloun upodre Bhagivont Familiche, Egiptak pollon vetana.”

Ani tacho Panchvo Sontos: “Polleun kudde dev Ejiptache, sorpott poddlele, Devacho Putr lagim soronk.”

Niall: Êh! Onodvonta Bokta José, zagrut rakhnnea ani sangatea Dev-Putrachea!  Kosole huske ani khonti kaddcheo poddleonant tuka, korcheak sambhall ani xeva Jesuchi, odik korun Herodichea ghansatlo Ejiptak pollon vetana! Punn kosolo sontos tuka bhoglona, polleun sodankal Dev aslolo tujêa sangata, ani Tache mukhar nisontton zalelem Ejiptachea sogleam kudiam devanchem! He tujê dukhi ani sontosa pasun, mellun ghê amkam curpa, khoxen ani sukhan amim tolcheak, kosolei khuris ani vigna, Dev aplea xanneponan ani bholleponnan amcher uprasonk nirmit tim, ani nisontton korunk amchea callzantlea kuddia devanche, amchea paixava ani sonvsarachea bhulovnneanchea; tea vorvim amim sodanch korun xeva-chakri Jesu ani Moriêchi, ani jieun iekanne Tanchech kattir, amim morcheak ieka disa dadosponant tanchea mogachea. Oxem Zanv.

 

1 Amchea Bapa, 1 Noman Moriê ani 1 Onod Bapak…

 

VI - Sovi Dukh ani Sontos: Niallu-ia amim Sovi Dukh Bhagivont Joséchi:

Sovi Dukh:“Bhieun Archelaus raksak, Herodichea putak, portotana Israel porjechea desant.”

Ani tacho Sovo Sontos:“Anjean taka kollit kortoch, vecheak ani jieuncheak Nazareth gavant.”

Niall: Êh! Zagrut Bokta José, fikirvont sambhallnara Jesu ani Moriêchea! Kosolo akant tujêr suttlona, Egiptantlo ghara portotana, kolltoch Herodicho putr choloita mhonn raj aplea bapaichem! Punn kosolo sontos tuka bhoglona, Sorginchea uleak raji-zaun, Nazareth nogrant ieun, jietoch khoxealkaen Jesu ani Moriê sangata! He tujê dukhi ani sontosa pasun ghal Sorgar than tuji nodor amcher, jinsavar othmeacheam periganim; bhairai amchea callzantli noixtti bhirant; ani mevoxi kôr amkam khori sovosthai ontoskornachi, ani ixttagot Jesu ani Moriêchi.Oxem Zanv.

 

1 Amchea Bapa, 1 Noman Moriê ani 1 Onod Bapak…

 

VII - Satvi Dukh ani Sontos: Niallu-ia amim Satvi Dukh Bhagivont Joséchi:

Satvi Dukh:“Sud korchi poddtoch Jesuchi, bara vorsancho astana sanddlolo terna, Jeruzaleachea Templant.”

Ani tacho Satvo Sontos:“Melltoch Jesu Templant, ani polletoch zannar Dotor, Jesuchea xanneponnak ojap zalele.”

Niall: Êh! Onodvonta Bokta José, santiponnachea rupkara! Kosoli dukh ani khont tuka bhoglina, tujêa guneava viret sanddlelea Jesuk, tin dis sodunk bhovtanam! Punn kosolo sontos tuka bhoglona, polleunk dusrean Taka Templant, Dotoram modhem! He tujê dukhi ani sontosa pasun, zagrut nodor tuji dovor amche voir, amim kernach sanddina zauncheak Jesuk, mha-patka vorvim; ani zor amim kernai amchea nirbhagan, Taka sanddlo zait, nirmi amche chit lagona zaunk, Tuka portho sodun kaddiver zaun Tacho orn ekvott amche kodde. Mag amche khatir atam, ani amchea mornachea vellar.Oxem Zanv.

1 Amchea Bapa, 1 Noman Moriê ani 1 Onod Bapak…

 

Antifona: Toch Jesu vortotalo sumar tis vorsancho, ani munis Taka mandtalet Josécho putr mhonn.

 

V. Bokta José, amche khatir Deva lagim vinoti kôr.

R.  Jem Jesu Christan amkam di mhunntlam, tem amkam labuncheak.

 

Prarthum-ia

Êh! Deva, sangun sarunozo tosole zannvaien Tuka puttvole vinchun kadcheak Bhagivonta Josék, zauncheak to poti tujê Bhagivonti Maiêcho; porathun magtam amim Tujê lagim, nirmi mhonn, to zaka amim mann ditam sonvsarant amcho sambhallnar mhonn to zauncheak amcho Askari Sorga Rajant. Oxem Zanv.

 

 

 

 

 

 

 

 

 

 

 

Sangatim Magnnem Korta To Ghorabo Sodanch Sangatan Jietolo.

NOVENAM

Folladik Noven Jesuchea Povitra Callz

1 Mhojêa Dhonia Jesu Christa, Tuvem Saiba mhunnttlaim, him utram: “Mag, ani tum ghetoloi, sod ani tuka meutelem, darar mar, ani tem tuka ugortelem.”- Dovorun thir bhavarth ani bhorvanso heam Tujêam bhasanvniar, uttponn zaleleam Tujêa Povitra Callzant ani ucharleleam Tujêam manadik vontthanim, khalteponni Tujêam paeam mukhar sorpotun, fuddem sortam hanv Tujê lagim magcheak ho upkhar. (Mag tuca goroz tem).

 

2 Tujêa xivai anink konna lagim magun, Dulloba Jesu, Zachem Calliz vortouta Ogonnit Zhor soglleam upkharam ani denneanchi? – Khuim vochun sodunk, nhoi zaliar Tujêa Callzant, bhorlelea dhon-dovlotin Tujê cakuti ani bolleponnache?  - Khuinchea darar hanv marunk, nhoi tor darar Tujêa Povitra Callachea zache vorvim Dev amchem thaim ieta ani zantlean amim vetanv Deva thaim?

 

3 Tuji tor, Êh Doiall Callza, hanv sodta mozot khonti-dukhint, Tujêm thaim meuta mhaka dhir-buzvonn, pidhapidh-dumalliant, sasai-adar, koxtt-akantant, boll-ghottai, dubau-kallokhant, uzvadd-prokas. Niza bhavarthan hanv sotmandtam, ki upkhar zo hanv atam Tujêa kode magtam, to Tujêan mhaka divum eta mhonn, ochoriam korchim podlim aslear Tuji khoxich puro, Sorvpoddvedara Dhonia, mhojêa magnneak foll meuncheak.

4 Zannom, Mogalla Jesu, mhaka Tujê upkhar favonant mhonn; punn hea pasun hanv mhozo bhorvanso soddina.Tum vortotai Dev Cakuticho, ani Tum aikonastana rauchonai magnnem ieka dukhivont ani khaltea callzachem. Porot tor mhojêr, Saiba, Tujê konvalle dolle, porathun magtam Tujê kode. Terna Tujêm Doiall Calliz churchurtolem, polleun mhojêm dolldir ani osoktai, ani dinastana rauchona hanv magtam ti vost.

 

5 Punn Êh! Povitra Callza, kiteim Tuji khoxi zanv, hea mhojêa magnnea sorim; hanv magtam ti vost, mhaka mellounk vo na-melounk hanv kernanch Tuka dinastana-rauchonam mhozo nomoskar ani mog, onod ani mann, xeva ani chakri. Tor, Cakutsara Jesu; ghê hi khoxi mhoji, cholunk Tujêa manadik Callzachea formonnam pormonnem. Hanv ani sorv Tujêo rochnnam khoreaponni raji zanv, pallo diunk Tujêa formonnak sasnnachea sasnnak.Oxem Zanv.

 

Perpet Socorr Saibinnic Noven

 

Maiê Perpet Socorriche, Tujêam burgheam passot vinoti kôr.

                             (3 pauttim)

 

Spirit Santak Magnnem

Iô Tum, Iô Deva Spirita Santa, rig callzant Tujêam bhavarteanchea ani pethoi tanchea sovem uzo Tujêa mogacho.

 

V. Patthoi Tujêa Spiritak, Zo rochit sogllem.

R. Ani ho sonvsar novo korit.

Prarthum-ia

Êh Deva, Tum zannem sikoilaim callzank bhavarteanchea Spirita Santachea uzvadda vorvim, dhi amkam Têach Deva Spirita vorvim somjonnim nittaechi mellcheak sodanch tachem vhodda mollachem dadosponn, Têach amchea Dhonia Jesu Christa vorvim. OXEM ZANV.

 

Novennachim Magnnim

I

Êh! Perpet Socorr Maiê, ho asa tujêam paiam sorxem, dimbi galun, êk dolldiro patki, zo Tuzo adar sodta ani Tujêr patieta. Êh Cakutiche Maiê, churchure mhojê kôr. Hanv aikotam sogleanim Tuka pacharleli Asro ani Borvonso mhonn patkeancho, tor za mhuzo adar ani mhuzo borvonso. Jesu Christachea moga passot mhaka pav, di Tuzo hat he poddlele rochnnenk, zo Tuka ulo korta ani apli bhett korta Tujê chakrek sodankal. Hanv upkhar attoitam ani argham ditam Sorvpoddvedara Devak zannem Aple Cakutin dilo mhaka visvas Tujêr, zo hanv sambhalltam zalelea porim Salvasanvanchi khunn. Khorem, Mogall Maiê, adim zaite pauttim mhojêa  dolldirponnan sampoddlom hanv patkak, kiteak hanvem sodlonam Tuzo adar. Hanv zannam Tujêa adaran hanv zoit vortolom. Toxench hanv zannam Tum mhaka adar dilea xivai rauchinaim, zor tor hanv Tuka ulo korin zalear. Punn birant mhaka dista, Mogall Maiê, mhojêa akantachea vellar visron mhonn Tuka ulo korunk ani he bhaxen pirder zait mhuzo othmo. Tor atam hanv Tujê lagim magtam ho vhodd upkhar kedinch hanv visronam zaunk, soitananchea tallneanim, sodunk Tuzo adar khotkhotean. Êh Moriê mhaka pau; Êh Perpet Socorr Maiê, nirmi naka hanv kedinch Devak sanddunk.           

( 9 Noman Moriê )

II

Êh ! Perpet Socorr Maiê, nirmi hanvem sodankal ulo korunk Tujêa Sorvpoddvedar Navank, jem vortouta khunn jivitachi ani salvasanv morteleanchem. Êh Nirmoll Moriê, Êh Dulobi Moriê Tujêm Nanv hea mukhar asum sodankal mhojêam vonttanr. Vell kori naka, Êh Bhagevonti Ankvari adar diunk jednam hanv Tuka ulo korin ; tor sogleam mhojêam tallneanim, soglleam mhojêam gorzanim hanv Tuka ulo kortolom ucharun Tujêm Povitr Nanv Mori. Kitli buzvonn, kitli goddsan, kitlo borvanso, kitli urba dinam mhojêa callzak jednam hanv ghetam Tujêm Povitr Nanv mhojê tonddim vo tacher monan chintam ! Argham hanv attoitam Dhoniak Tuka dilem mhonn itlem godd, itlem podveddar, itlem mogall Nanv mhojê passot. Punn hanv ugi ravchonam, fokot gheun Tujêm Nanv, bogor vavurtolom callzan than noman Tuka diunk, Perpet Socorr Maiê.

( 9 Noman Moriê )

III

Êh ! Perpet Socorr Maiê, Tum vortoutai vanttpinn sogleam denneanchi, jim Dev dita dolldiream patkeank, ani hea pasun Tannem Tuka kelea itli podveddar, itli girest ani mogall, Tuvem diuncheak amkam adar amcheam gorzanim. Tum vortoutai Xaratin dolldiream patkeanchi jê sodtat Tuzo adar. Tor di mhaka Tuzo alaxiro, Mogall Maiê hanv bhettoitam Tuka sogloch mhaka.

Hanv ghaltam Tujêa hatan mhojêm salvasanv ani Tuka ditam mhuzo otmo. Ghê mhaka Tujêam visvaxeam chakram modekot, dor mhaka Tujêa asrea khal ani itlem mhaka puro. Zor tor Tum dixi mhaka Tuzo hat hanv kiteakuch bienam, mhojêam patkanchem porian mhaka bem disonam, kiteak hanv zannom Tum zoddun ghetelo-i mhonn tanchem bogsonnem ; deucharakui hanv bienam kiteak Tuji podvi vortouta odik vhodd soglea infernakui ; Jesu mhuzo Munsubdar, achem porian mhaka bem disonam, kiteak Tujêm êk magnnem Taka thondd korta. Punn êke vostuchi mhaka chodd birant asa ; tallnechea vellar besarmaen visron mhonn Tuka ulo korunk ani he bhaxen moron mhonn khoteponnan. Magon ghê, tor, mhaka mhojêam patkanchem bogsonnem, Jesucho Mog, thirason xevott porian Devache Curpen, ani Curpa Tuzo adar sodunk, Êh ! Perpet Socorr Maiê.

( 9 Noman Moriê )

 

V. Mag amche pasun, Perpet Socorr Maiê.

R. Amkam favo zauncheak Jesu Christan basailam tem.

Prarthum-ia

Êh! Dhonia Jesu Christa Tuvem dili amkam Tuji Mai Mori, jiche imajik amim mann ditam zaunk Ti amchi Mai ji asa sodanch toiar diunk amkam Aplo adhar, nirmi amim Tujê lagim magtanv, amim, jê sodanch sodtanv Tichea Maimponnacho adhar, pavonk bogunk follam soddvonnechim; Zo zietai ani razvodd choloitai sodam sorvankal. OXEM ZANV.

 

Noven Dukhesti Saibinnik

 

Éh Bhou Povitr ani Dukhesti Ankvari! Ranniê Martirinche; Tum, ji rauli ubi halonastana Khursa talla, polleun vollvollianchem morn Tujêa Putrachem; Tujêam mezun sarunozo asloleam koxttam pasot, tujêa dukhinchea jivitacheam; ani dadosponna pasot, jem adleam koxttam dorman, atam Tuka upott-bhor Devan favo kelam, poroth avoichea moipasan, Tujê cakutiche dolle mhojê voir ani churchure mhojê kôr. Polle mhaka! Hanv hanga asam dimbier Tujê mukhar, mann diuncheak Tujêam dukhink ani galcheak mhojim magnnim, putrachea bhorvanxean, devostanant Tujêa vidarlelea callzachea.

Hanv porathun magtam Tujê lagim, dakhoi mhonn mhojim magnnim Jesu Christak, ghalun fudde punem Tacheanch bhou Povitr Koxttam-Mornachem, ani Tujê vollvolle Khursachea mullar; ani dogainchea iektthaim puneam khatir, mellun ghê mhaka, hanv atam magtam tem, N…. Konnank hanv ulo marum, mhojêam gorzam ani dolldiranim, nhoi bogor Tuka. Éh Maiê Cakutiche, ji pielea uprant nimanno thembo porian koddu kalxicho aplea Putrache, xiclea churchuronk dolldirank, azunver haskar-suskateleancheam, hea dukanchea kondant. Tor bhettoi mhojê vatten mhojêa Sorvonddarak, iok thembo Rogtacho Tachea Povitr xirantle vhavlelea; iek dukh Tacheam Dev-bolliantlatlem; iek suskar Tachem manadik Calliz futteleanto. Êh Asrea sonvsarachea ani bhovanxea sogllea munxiakullachea; beporva korunaka mhojêa gorib magnneachi, punn doean mellun ghê mhaka hanv magta ti vost.

 

Sufoll Noven, Bhagivont Josék

 

1.  Êh Muktivonta Bokta José, Poti Moriêchea; ugddas kôr mhozo ani mhaka sanddunaka. Êh boddvea Santa, zaka Devan vinchun kaddlo sambhall korcheak Jesu ani Moriêcho, di mhaka tuzo adar, bhagivont korcheak hanvem mhozo othmo. Mogal posnara Ballka Devachea, tuka Devan dilea Podvi zoddcheak upkhar ani denim mevo nozo mhonn axea ani bhorvanso soddlelim porian; tor ghê tujê sasaie khal, heo mhojêo gorzo (Kosoleo teo dakhoi …). Di mhaka tuzo alaxiro, koxttam ani khursamni, zancho bhar mhaka chepta. Visvaxea Rakhnnara Dev Putrachea, sogttam-hovn uncha molachea banddarachea, ghê tujêa mogall asrea khal hem magnnem hanv atam korta tem ani tacho foll upkaroso kôr, zoddcheak Devacho onod ani mhojêa othmeachem borvem. Bokta José, ixtta Povirtra Callzachea, vinoti kôr amche katir!

 

2. Vhodda Santa José, tujéa hatant asat xevott nasleleo sopnikaeo ani tum bhollea callzan teo vantt’ttai. Polle mhaka hanga sorpottulo tujêa paeam mukhar, porathun tuka, gheuncheak mhaka tuzo chakor ani tuzo putr koso. Jesu ani Moriêchea povitram Callzam uprant zancho khoro rupkhar tum vortotai, hanv boro zannom na-mhonn dusrem calliz, tujêa callza itlem movall ani cakutichem. Tor kosoli bhirant mhaka, ani kitem mhojêan patievn ravunozo, zor tum zaxi mhozo askari, mhozo rupkhar, mhozo bap ani mhozo xarati? Tor êh bhov podveddara Rakhnnara, na mhunnu-naka mhaka atam ani hanv magtam to upkhar dinastana ravu-naka (Sang kosolo to …). Hanv to magtam, tujêa moga khatir Jesuk ani Moriêk.Tujêa hatant hanv ghaltam mhozo othmo ani cudd, odik korun mhojêa jivitachea nimannea vellar. Pavum hanv xekim, dilea uprant mann tuka, chol’lea uprant dekhin tujê, ani kelea uprant sonvsarant chakri tuji, vakannunk tujêa sangata Sorgar, cakut Jesu ani Moriêchi. Oxem Zanv.

CHOTRAI: Hem ani vinchun kadllam tem upkarta korunk Tridun vo Noven, vo sambhallunk akho Marsacho muinno Bhagivont Joséchea mannak.

 

Upkharanchem Noven,

Bhagivont FranCisk Xavierak

(Magnnem ghoddlelem Pe. Mastrilin)

(March 4 – 12)

 

 

Êh bhou pritivonta ani mogall Bhagivont Francisco Xavier! Tujêa sangata hanv vhodda manan pornipat kortam Sorvespora Devak. Amim bhou sontosbhorit zatam dekhun; chintun ochoreanchim dennim zatun Devan tuka surungarlo divun Curpechim hea tujêa jivitant ani Onodachim tujêa mornam uprant, opromit argham hanv Devak ditam. Porathun magtam tujê lagim sogllea ulasan mhojêa callzachea, mellun ghê mhonn mhaka tujê podveddar mozoti vorvim, ho’to sogttan–hovn molacho upkhar: jiêvunk ani morunk bhagivont ponni. Toxench, laleun hanv magtam tujê lagim zoddun gheuncheak mhaka ani êk vhodde gorjêcho upkhar, zo meunchea pasot hem noven hanv kortam (Mag tuka zaitem …). Punn zor hanv axetam ti vost upkarona zait Devachea mannak ani odik vhodda borveak mhojêa othmeachea, mellun ghê mhaka tiche bodlek dusri vost, team donui xeuttank upkaroxi. OXEM ZANV.

 

Mhunn: 3 Amchea Bapa, 3 Noman Moriê ani 3 Onod Bapak…

 

V. Bhagivonta Francisco Xavier, vinoti korun mag amche pasot.

R. Jem Jesu Christan amkam diun mhuntllam, tem amkam labuncheak.

 

Prarthum-ia

Sasnnanchea Deva! Tuvem sincounem ani ojêapam vorvim, Bhagivont Francisco Xavierachea, exkvott keloi Indieche porjecho Tujê Igorje lagim ; nirmi, porathun magtam Tujê lagim amim jê mann ditanv tachea onodvont puneank, gheunk pauncheak dekh tachea segunnanchi ; Dhoni Jesu Christa amchea Dhonia vorvim. OXEM ZANV.

 

Sam Franciso Xavieran Onbhavartiamchea Conversanva Pasot Ghoddlem ani To Mhunno Tem Magnnem

Sasnnanchea Deva ani soglleam vostumchea Rochnnara, ugddas kôr onbhavartianche othme vortoutat mhonn Tujêa hatanchi Korni; ani tankam Tuvem rochleai mhonn Tujêa Sarkeache ani Suropaieche.

 

Tanchem Salvasanv zoddcheak Tujêa Putran Jesu Christan vhodd nixtturaiechem morn soslem; tor ugddas kôr, magtam Saiba, nirmum naka mhonn anink hea mukhar onbhavartianim Tujêa Putrachi beporva korunk.

Tor Tujêa Sodovi Putrachi Potinn ji Igroz Mata, Ticheam ani Bhagivaontancheam magneanim Sovost Zanv; ugddas kôr Tujê Cakuticho ani visrun tanchem kudd’deponn ani onbhavarthponn, amchea Dhonia Jesu Christak te oll’kho-xe kôr, Taka Tuvem dhaddloloi; To vortouta amchem Salvasanv, Jivit ani Jivontponn, Tachê vorvim amim zoddli sotea ani Salvasanv ani Taka favo Onod sasnnanchea sasnnank. OXEM ZANV.

 

Noven Bhagivont Antonik

(Korunk sanddleli, chorleli vost meuncheak; ani gorjek, acantak).

 

1. Noman tuka, Sant Antoni, lily-fulla nirmolkaechea, surumgara ani onoda Christamponnachea! Noman tuka, vhodda Bhagivonta, zanntikaechea Kerobim ani Dev-mogachea Serafim.Dadoxi hanv zatam polleun tuka, Devan nettoillo êke bhorten upkaram ani denneanche. Vhodda khalteponnan ani visvasan hanv porathun magtam tujê lagim, mhaka tuzo adar diuncheak, kiteak hanv borem zannom, Devan dilam mhonn tuka mog ani cakut, ani teach bori podvi.

 

2. Tor ghal tuji doiall nodor mhojêr, ani polle mhojê doldir ani upodre huske ani khonti, bhirant ani akant odik korun he vonstunt (Tuka zai tem mag hanga …).Tujêa moga khatir Ballka Jesuk, tujê vengent ailelea, mellun ghê mhaka ho upkhar ani ugttio kôr Taka mhojêo gorzo. Ugddas kôr, Bhagivonta Anton, kosolea dadosponnan tujêm calliz upott bhorlem tem, tuvem tea Ballkak tujêa callzak vornitoch, tujê vontt Tachea poliank laitoch, ani Tacho dulob tallo aikotoch; ani nivar mhaka huskeam-khontintlo.

3. Noman tuka, êh ixtta Devachea! Tujê hujir hanv bagaitam, mhojêm gunianvkari mustok, vhodda mannan; ani ubartam mhojêm khontist calliz, bhorlelem bhovanxean, Sorgak ani tuka; kiteak To, zannem ghalo Apnnak tujê vengent, To bhortolo tujê hat, mhaka goroz titleaim vostunim.

4. Di tor mhaka hanv axetam tem, êh Anjea mogachea; ani porgotthtolom vizmitancho foll tujêa alaxireacho; onodak ani horkak Devachea. Bhagivonta Anton, zacho Ballok Jesu kori vhodd mog ani ditalo chodd mann, mevo-xem kôr mhaka, hanv tujê lagim magtam tem. Bhagivont Anton, podveddara utran ani korneamni, di mhaka atam goroz tem (Kitem zai tem sang …). Bhagivonta Anton, sodanch raji aslelia, pavunk tuka ulo marteleank, tujê podveddar mozotin, mellun ghê mhaka nirmollkai ani thonddai, lanvikai ani rajiponn vhoddilachea utrak. Oxem Zanv.

 

Noven Bhagivont Filomenak

 

Êh Ondovont Ankvari ani Martir, Bhagivonti Filomena; tujêm nanv ani vizmitam gazlellim aikun sonvsaracheam ximer porian, hanvuim lagim sortam tuka ani porathun magtam tujê lagim, bholleponnan poroth mhonn tujê cakutiche dolle mhojê voir, jernam hanv vhodda bhorvaxean patietam tujê mozotir ani otrektam polleunk, tuka mann dilolo soglea sonvsarant. Tujêa sangata, hanv-ui sonstosborit zatam, Devan dili dekhun tuka podvi Aplea Namvachea onodak ani Aple Igorjechea borveak. Ani doiall mannan, thottakun hanv polletam, tujêa othmeachem nirmollponn, tujêa callzachem ud’darponn, ani tujêa nichevachem thirponn, tujêa Dhonia Devak; jeam segunank lagun, tuka favo zalea iek suat, chodd lagim Taka, Sorginchea mondirant. Hanv dhir ghevun, polleun tuji povitr dekh; ani bhorun hurben, niallun tujêm onodvont farikponn, thir nichev kortam; vattauncheak patok ani korcheak khoxi Devachi sorvoi vostumni. Êh vhodde Santini! Mellun ghê mhaka iek nirmollkai, khota meklli; iek ud’darponn, kosolech koxtt poro korina tosolem, te tolunk Deva pasot; iek mitmer naslolo mog, amchea Povitr Bhavarthak; ani hi vost jichi mhaka chodd goroz (Mag kitem zai tiem …). Korench, kernach kosolich vost, tuka ‘Na’ mhunnchona, Dev cakuticho ani mogacho, Zache khatir tuvem tujêm rogot porian varaileim.

Bhagivonti Filomena, vinoti kôr amche pasot.

3 pavtti mhunn hi Jakulator

 

       Saiba Sam José

1. Saiba Sam José, tum amcho adhar,

    Za tôr tum amcho nimanno suskar

    Vaittam vignam tum amchim nivar

    Atam ani mornnachea vellar.

2. Saiba Sam José, tum amcho onod,

    Deva lagim ghal tuji vhôdd mozôt

    Tujêa tea gopant amkam dovor

    Atam ani mornnacho vogôt.

 

    Sam José, Rakhnnêa

1. Sam José, Rakhnnêa

    Povitr Familichea,

    Kôr tum samball amcho,

    Adar di kurpecho.

2. Sam José, Ixtta

    Jesuchea Callzachea,

    Tum amcho vhôdd Patron,

    Mag tôr amchê pasot.

3. Sam José, Poti

    Nirmollê Moriêcho,

    Tum amcho vhôdd adar,

    Pav mornnachea vellar.

Bhou Moladic Magnnim

Catholic Bhavartian

Zannô Zaunk Zai

 

Santa Khursachi Kuru

Santa Khursache X kurven, / nivar amkam X amchea Deva, / amcheam X dusmanantle, / Bapache Nanvim ani Putrache X ani Spirit Santache. Amen.

 

Curpa Magcho ACt

Iô Tum, Iô Deva Spirita Santa, rig kallzant Tujêam bhavarteanchea ani pethoi tanchea sovem uzo Tujêa magacho.

 

V. Patthoi Tujêa Spiritak, Zo rochit sogllem.

R. Ani ho sonvsar novo korit.

 

Prarthum-ia

Êh Deva, Tum zannem xikoilaim kallzank bhavarteanchea Spirita Santachea uzvadda vorvim, dhi amkam Têach Deva Spirita vorvim somjonnim nittaechi mellcheak sodanch tachem vhodda mollachem dadosponn, Têach amchea Dhonia Jesu Christa vorvim. Oxem Zanv.

 

Amchea Bapa

Amchea Bapa, Tum Sorgar asai, / Tujêm Nanv Vhodd zanv, / Tujêm Raj amkam ieum, / Tuji khoxi zoxi Sorgar zata toxi sonvsarant zanv.

Amcho dispotto giras aiz amkam di./ Ani amchim patkam bhogos, zoxe amim amcher chukleleank bhogxitanv, / ani amkam tallnent poddunk diunaka / punn amkam vaitta vignantle nivar. Amen.

Noman Moriê

Noman Moriê, Curpen bhorlele, Dhoni Dev Tujê thaim assa, / ostoream bhitor Tum Sodovi ani Sodoiv foll Tujê kuxichem, Jesu.

Santa Moriê, Devache Maiê, amim papiam khatir vinot kôr, / atam ani amchea mornnachea vellar. Amen.

 

Onod Bapak

Onod Bapak, ani Putrak X ani Spirit Santak / Zoso adim tosoch atam / ani sodam sorvotam. Amen.

 

Hanv Sotmandtam

Hanv Sotmandtam Deva Bapa Sorv-Hukumdara, Sorgachea ani pritumichea Rochnara, / ani Jesu Christa, Devachea Êkleach Putra, amchea Dhonia ; / Zo Dev Spirit Santa vorvim gorb sombovlo, / Ankvar Moriêche kuxint zolmolo ; / Pons Pilata khal upodre-koxtt sonslet, khursar zhoddlo, melo ani nikipilo ; Limbant denvlo, tisrea disa meleleantlo jivont zalo ; / Sorgar choddlo, Sorv-Hukumdara Deva Bapachea uzvea hata bosla ;/ Thuim than novean Onodbhorit ietolo jiveam ani meleleanchi mun’subi korunk, / Hanv Sotmandtam Deva Spirita Santa, / Santa Mat Igroz Catholk, Bhoktancho Ektar ; / patkanchem bhogsonnem ; / kuddichem jivontponn ; / Ogonnit jinn. Amen.

 

Hanv Patki

Hanv Patki, sorv-guneaunkar mhojim patkam ucharun sangtam, Sorv-hukumdara Devak Bhagivonti Sodanch Ankvar Moriêk, Boddvea Sam Miguelik, Sam João Baptistak, Apostl Sam Pedro ani Sam Paulak, somest Bhoktank ki hanv, monan chintun, tonddan ucharun, ani korneom korun; bhou chuklom, mhozo oprad, mhozo oprad, mhozo thor oprad. Hea pasun, prartam Bhagivonti Sodanch Ankvar Moriêk, Boddvea Sam Miguelik, Sam João Baptistak, Apostl Sam Pedro ani Sam Paulak, somest Bhoktank, mhojê khatir amchea Deva Dhonia lagim vinot korcheak. AMEN.

Sorvpodvedar Dev mhoji Cakut korum, mhoji patkam bhogsum ani mhaka sasnanchea sukhak pavouvum. AMEN.

Sorvpodvedar ani Cakutsar Dhoni Dev mhoje guneanv bhogsum X ani mhojea patkanchem bhogsonnem dium. AMEN.

 

Sorv-Vornitam Tuka Ranniê

Sorv-Vornitam Tuka Ranniê, kakutiche Maiê, / Tum amchem jivit, ambrut ani bhorvanso, / Tuka Sorv-vornitam. / Amim pordexi Evechim ballkam, / hea dukhanchea konndant astanam, / askar ani suskar soddun, rudon korun Tuka prarthanv. / Tor Tum amche Xeratini, / te Tujê kakutiche dolle amche voir porot ghê Maiê. / Ani hea pordesa uprant, / Tujê kuxichem sufoll foll, Jesu, amkam dakhoi. / Êh Xanti, / Êh Konvalle, / Êh Dulobi, Sodanch Ankvar Moriê. / Vinot kôr amche pasun Bhagivonti Devache Maiê, / amkam favo zauncheak jem Jesu Christan bhasailam. Amen.

 

Dev Mogache Dukhicho ACt

Mhojêa Deva, / Tum sorv boro / ani sogllea mhojêa kallzan, hanv Tuzo mog kortam dekhun, / hanvem Tuka okman kelet mhonn, mhaka dukh bhogta, / ani Tujê Dev-curpechea adaran, / mhojêm jivit bodlunk ani kedinch Tuka, novean, okman korina zaunk, / ghott nichev kortam ; mhojêam guneanvanchem bhogsonnem magtam, / ani Tujê ogonnit kakutin, tem mhaka ditoloi mhonn patietam. Oxem Zanv.

 

Bhavartacho ACt

Mhojêa Deva, / Jivea bhavartan sotmandtam Tum Êkuch Niz Dev mhonn, / Zaka asat Teg Zonn khoreponnim vegle ; / Bap, Putr ani Spirit Sant : / ani Putr amche Soddvonne pasot/ Munis zalo, koxttoulo ani melo mhonn, / meleleantlo Jivont zalo, Sorgar choddlo, / thuim Rajvott choloita, / ani novean Onodbhorit ietolo mhonn soglleam mun’xeanchi Zoddti korunk / ani diunk zonn eklea mun’xeak apleam korneam pormonnem, / mokutt Sorga Rajeant vo khast Ifernant. / Hem ani her sogott jem Igroz Matha sotmandta / ani xikoita / hanv sotmandtam, / kiteak Tuvem porgottlaim dekhun / ani Tum kednanch fottoi nai, / nam mhonn Tuka kednanch fottoum-nozo dekhun.

 

Bhorvanxeacho ACt

Mhojêa Deva, / Tum Sorv-podvedar, ani visvas dourun Tujê Ogonnit kakuticher ani bhasauneacher hanv patietam amchea Dhonia ani Sorvonddara Jesu Chritachea puneam vorvim mhojêa patkanchem bhogsonnem ani goroz ti kurpa zoddunk Sasnnanche Jivit.

 

Mogacho ACt

Mhojêa Deva, / Tum Sorv Borvo / ani soglleam vostum poros Tuzo odik mog korunk favo dekhun, sogllea mhojêa kallzan hanv Tuzo mog kortam, / ani Tujêa moga pasun, / mhojo mog kortam tossoch mhojêa peleacho-i kortam./ Mhaka dukounleleank hanv bhogxitam ani havem dukounlelenche bhogsonem magtam.

Dev Bhiranticho Dukhicho ACt

Mhojêa Deva, / patkanchi vitt, Sorginche sukh chuklem mhonn, / ani Ifernanche khastichi bhirant motint haddun, / hanvem Tuka okman kelet mhonn, sogllea mhojêa kallzan than mhaka dukh bhogta, / ani Tujê Dev Kurpechea adaran, / mhojêm jivit bodlunk ani kedinch Tuka novean okman korina zaunk, / ghott nicheu kortam / mhojêa guneavanchem bhogsonnem magtam / ani Tujê Ogonnit Kakutin, tem mhaka ditoloi mhonn patietam. Oxem Zanv.

Spiritual ComMunhanv

Sotmandtam mhojêa Jesu, asai mhonn Altaravelea Sacramentant ; otrektam Saiba, Tuzo mog korunk, sogllea mhojêa callzan ani Tuka bogunk mhojêa otmeant. Punn, jednam mhaka tankonam Tuka gheunk atam hea Sacramentant, vhodd dukh dorun mhojêam patkanchi ani thir nicheu korun dusrim tim adarchonam mhonn, magtam Saiba, nitoll korun mhojêm ontoskorn, bitor sor mhonn, khoxen punn, mhojêa kallzant. Tuka ghetlelea porim nomoskar korun, argham Tuka ditam Saiba ani magtam votoi mhonn Tujim dennim mhojêa otmeaver, kedinch koddsoronam zaunk Tujê sorxilo, bogor sodankal Tuzo chodd mog korunk.

 

Navanchea Santak

Magnnem

Êh vhodda Bhagivonta *S………….. hanv vortoutam vhodda bhagiacho, jêdnam Baptismant kelo mhaka putr Devacho ghalun mhojêa ohtmeachi zoton tujêa tabeant, diun mhaka tujêm nanv. Tor êh dulloba samballnara mhojêa othmeachea, tambonastonam Dhoniachea Trona mukhar za adorar, hanv jiêunk êk niz Christanv Jivit, ballgun kurpa ji mhaka Baptisma vorvim dil’li, ani zorui patka vorvim ti mhaka luscan zalea assot, tor mozout mhaka kôr ti porti mellon gheunk. Mag Deva lagim, hanvem jiêunk tujê bhagivont dekhin hea vorvim aslea uprant sodanch tujê sasaiê khal, sarun he kottin ani lamb dis sonvsarantle, tujê mozotin ani asrean, mellonk mhaka darzonnem bogunk sasnancho onod tujêa sangata Sorgar. OXEM ZANV.

(*S............... tujêa navanchea Santache nav ghe)

 

 CLICK BELOW LINK FOR:-

daily devotion to St. Joseph, to be done everyday for the full month of March